প্ৰকৃতি সেউজীয়া কৰাৰ লক্ষ্যৰে ৩৭ বছৰে বিৰামহীনভাবে কাম কৰা এগৰাকী প্ৰকৃতিপ্ৰেমী
ৰাইজৰ মাজত প্ৰকৃতি সুৰক্ষা আৰু জৈৱ বৈচিত্ৰ ৰক্ষাৰ বাৰ্তা বিলোৱা দেহ বৰা ।
Published : June 5, 2026 at 5:43 PM IST
যোৰহাট: আজি বিশ্ব পৰিৱেশ দিৱস । ১৯৭২ চনত ষ্টকহ’মত অনুষ্ঠিত মানৱ পৰিৱেশ সম্পৰ্কীয় ৰাষ্ট্ৰসংঘৰ সন্মিলনৰ সময়ত এই দিৱস অনুষ্ঠিত কৰাৰ বাবে প্ৰস্তাৱ গ্ৰহণ কৰা হৈছিল । সেই বছৰৰ শেষৰ ফালে ৰাষ্ট্ৰসংঘৰ সাধাৰণ পৰিষদে ৫ জুনৰ দিনটোক আনুষ্ঠানিকভাৱে বিশ্ব পৰিৱেশ দিৱস হিচাপে নিৰ্ধাৰণ কৰে ।
প্ৰকৃতি, জৈৱ বৈচিত্ৰ সুৰক্ষাৰ বাবে আজি সকলোৱে ৰুইছে গছপুলি । প্ৰকৃতিৰ বাবে সকলোৱে এই দিনটোত সংকল্প লৈছে । এই বিশ্ব পৰিৱেশ দিৱসৰ দিনটোত এজন ব্যক্তিৰ বিষয়ে ক'ব খুজিছো, যিগৰাকীয়ে প্ৰকৃতিৰ বাবে নিজক উছৰ্গা কৰিছে । বিলাই দিছে প্ৰকৃতি সুৰক্ষা আৰু জৈৱ বৈচিত্ৰ ৰক্ষাৰ বাৰ্তা । এইগৰাকী ব্যক্তি হৈছে যোৰহাটৰ গৰুমৰাৰ দেহ বৰা ।
বিগত ৩৭ বছৰে প্ৰকৃতি সেউজীয়া কৰি তোলাৰ লক্ষ্যৰে কাম কৰি আহিছে । নিজৰ একক প্ৰচেষ্টাৰে ১৪ বিঘা মাটিত গছপুলি ৰোপণ কৰি গঢ়ি তুলিছে সেউজ স্বৰ্গ । তেওঁ জীৱ-জন্তু, চৰাই চিৰিকটি, পখিলা, মৌ-মাখিৰ বাবে সুকীয়াকৈ গঢ়ি তুলিছে অৰণ্য ।
তেওঁ পুৱা শোৱাপাটিৰ পৰা উঠিয়ে সেউজীয়া পৃথিবীখনলৈ চকু ফুৰায় । হাতত এটা বেগ আৰু এখন কোৰ লৈ ওলাই আহে গছপুলি ৰোপণ কৰিবলৈ । তেওঁ গছপুলি ৰোপণ কৰি সকলোকে পৃথিৱীখন সেউজীয়া কৰি তুলিবলৈ আহ্বান জনাইছে ।
প্ৰকৃতিপ্ৰেমী দেহ বৰাই আজিৰ এই বিশেষ দিনটো বুলিয়ে নহয়, প্ৰত্যেক দিনাই কাম কৰি আহিছে প্ৰকৃতিৰ বাবে । বিশ্ব পৰিৱেশ দিৱসৰ দিনা নিজা চাৰিবেৰাৰ ভিতৰত গছপুলি ৰোপণ কৰিয়ে ক্ষান্ত থকা নাই, বিভিন্ন ঠাইতো ৰোপণ কৰিছে গছপুলি । তেওঁ ১৪ বিঘা ভূমিত গঢ়া অৰণ্যত বিভিন্ন জীৱ-জন্তু, চৰাই-চিৰিকটি আৰু বিভিন্ন প্ৰজাতিৰ ৰঙীন পখিলা বিৰাজমান ।
এই সন্দৰ্ভত দেহ বৰাই কয়, "৩৭টা বছৰে মই প্ৰকৃতিৰ বাবে কাম কৰি আহিছো । এদিনো ৰৈ নাথাকো । যিমানেই মানুহ ইয়ালৈ আহে সিমানেই মোৰ ভাল লাগে । বিভিন্ন শিক্ষানুষ্ঠানত মই গঢ়ি তুলিছো ফুলৰ উদ্যান আৰু শিক্ষাৰ্থীসকলক লগত লৈ ৰোপণ কৰিছো গছপুলি । অৰণ্যখনত হৰিণা, শহাপহু, মেচেকা, শিয়াল, বিভিন্ন ধৰণৰ সৰীসৃপ, দেশী-বিদেশী পক্ষীকে আদি কৰি বিভিন্ন জীৱ-জন্তু পোৱা যায় ।"
দেহ বৰাৰ একক প্ৰচেষ্টাত গঢ়ি উঠা অৰণ্যখনত হৰিণা, শহাপহু, মেচেকা, শিয়াল, বিভিন্ন ধৰণৰ সৰীসৃপ, দেশী-বিদেশী পক্ষীকে আদি কৰি বিভিন্ন জীৱ-জন্তু পোৱা যায় । আনহাতে হাতী আৰু মানুহৰ সংঘাত ৰোধৰ বাবে তেওঁ গঢ়ি তোলা বনাঞ্চলখনৰ কাষে কাষে আৰু বৃহৎ এলেকাত ভীমকল, কঁঠাল, আম আদি ৰোপণ কৰিছে ।
উল্লেখ্য় যে দেহ বৰাই গঢ়ি তোলা পখিলা উদ্যান, ফল-মূলৰ উদ্যান তথা বিশাল অৰণ্যলৈ বিভিন্ন প্ৰান্তৰ পৰা প্ৰকৃতিপ্ৰেমীয়ে আহি সুবাস গ্ৰহণ কৰিছে । আনহাতে এইগৰাকী প্ৰকৃতিপ্ৰেমী দেহ বৰাই হিয়াৰ আমঠু জুবিন গাৰ্গৰ নামত সৃষ্টি কৰিছে এখন ফুলৰ উদ্যান ।
লগতে পঢ়ক:হাতী বন্ধুৰ প্ৰচেষ্টাত হেৰোৱা মৰ্যাদা ঘূৰাই পালে টকলা হৈ পৰা এখন পাহাৰে
টীয়কৰ জুবিন সেউজ চাপৰিতো বিশ্ব পৰিৱেশ দিৱস পালন, ৬,০০০ গছপুলি ৰোপণ
