তামিলনাডুৰ পৰা পুনৰ নিৰুদ্দেশ অসমৰ যুৱক, দহদিনে শৰতৰ নাই সন্ধান

নগাঁও: পেটৰ তাড়নাত বহিঃৰাজ্যলৈ গৈ পুনৰ সন্ধানহীন হৈছে এগৰাকী অসমীয়া যুৱক । নগাঁও জিলাৰ ৰণথলী গাঁৱৰ শৰৎ বণিয়া নামৰ যুৱকজন বিগত ১৩ মে'ত নগাঁৱৰ পৰা কামৰ সন্ধানত হায়দৰাবাদলৈ বুলি ৰে'লত যাত্ৰা কৰিছিল । কিন্তু হঠাৎ ১৭ মে'ৰ পৰা সন্ধনহীন হৈ পৰিছে শৰৎ বণিয়া নামৰ যুৱকজন ৷ প্ৰায় দহদিন ধৰি পৰিয়ালৰ সৈতে যোগাযোগ বিচ্ছিন্ন হৈ পৰাত একপ্ৰকাৰ হাহাকাৰ পৰিৱেশৰ সৃষ্টি হৈছে যুৱকজনৰ পৰিয়ালৰ মাজত ।

পৰিয়ালৰ লোকে জনোৱা মতে, ঘৰৰ পৰা হায়দৰাবাদলৈ গৈ থকাৰ সময়ত ৰে'লত চিনাকী হৈছিল অসমৰে দুই যুৱকৰ সৈতে । যাত্ৰাপথত চিনাকী হোৱা এজন যুৱকৰ মোবাইলৰ পৰা শৰৎ বণিয়াই পৰিয়ালৰ লোকক যোগাযোগ কৰিছিল আৰু যুৱকদ্বয়ৰ সৈতে চিনাকী হোৱা বুলি তেওঁ অৱগত কৰিছিল পৰিয়ালৰ লোকক । এই সন্দৰ্ভত নিৰুদ্দেশ হোৱা শৰৎ বণিয়াৰ ভাতৃ লক্ষ্যজ্যোতি বণিয়াই কয়, “হায়দৰাবাদলৈ বুলি ৰে'লত যাত্ৰা কৰাৰ সময়তে শৰতে চিনাকী হৈছিল অসমৰ দুই যুৱকৰ সৈতে ৷ সেই যুৱকদ্বয়ে হায়দৰাবাদতকৈ বেংগালুৰত অধিক দৰমহা পায় বুলি উল্লেখ কৰিছিল ৷ সেই মৰ্মে ৰে'লত চিনাকী হোৱা যুৱকদ্বয়ৰ সৈতে বেংগালুৰলৈ যাত্ৰা কৰিছিল ৷ এই কথা আমাক ফোন যোগে অৱগত কৰিছিল শৰতে ৷"

লক্ষ্যজ্যোতিয়ে লগতে কয়,"১৭ মে'ত তামিলনাডুৰ হচুৰৰ পৰা আমাক অন্তিমবাৰ যোগাযোগ কৰিছিল ৷ তেতিয়া ৰে'লত চিনাকী হোৱা দুই যুৱকে বেংগালুৰৰ পৰিৱৰ্তে তামিলনাডুলৈ যোৱাৰ কথা আমাক জনাইছিল শৰতে । তাৰ পাছৰ পৰাই কোনো যোগাযোগ নোহোৱা হৈছে শৰৎ বণিয়াৰ সৈতে । দাদাৰ মোবাইল অফ হৈ থকাত ৰে'লত চিনাকী হোৱা যুৱক দুজনৰ সৈতে আমি যোগাযোগ কৰিছিলো ৷ তেতিয়া এদিনৰ বাবে লোৱা হোটেলৰ কোঠাৰ পৰা বাহিৰলৈ ওলাই গৈ উভতি অহা নাই বুলি যুৱক দুজনে আমাক জনাইছে ।”

বহিঃৰাজ্যত নিৰুদ্দেশ হোৱা শৰৎ বণিয়া (ETV Bharat Assam)

অৱশেষত উপায়ন্তৰ হৈ পৰিয়ালটোৱে নগাঁৱৰ ননৈ আৰক্ষীৰ আশ্ৰয় লৈছে ৷ কিন্তু আৰক্ষীও অসহায় পৰিয়ালটোক সহায় কৰিবলৈ অসমৰ্থ বুলি কোনো আবেদন গ্ৰহণ কৰা নাই বুলি উল্লেখ কৰিছে ভুক্তভোগী পৰিয়ালটোৰ সদস্যই ৷

লগতে পঢ়ক:ধনদাবীৰ মূল পৰিকল্পনাকাৰী মানস মানৱ গগৈৰ সন্ধান দিওতাক আৰক্ষীয়ে দিব ৫০ হাজাৰ টকা