কাছাৰত ১৬৮ কোটি টকাৰ য়াবা টেবলেট জব্দ
৩৭নং ৰাষ্ট্ৰীয় ঘাইপথৰে অনা এই নিচাজাতীয় টেবলেটবোৰ অসমৰ মাজেৰে পৰিবহণ কৰাৰ পিছত দেশৰ আন প্ৰান্তলৈ সৰবৰাহ কৰাৰ পৰিকল্পনা কৰা হৈছিল ৷
Published : August 27, 2026 at 1:33 PM IST
তেজপুৰ: আন্তঃৰাজ্যিক ড্ৰাগছ সৰবৰাহ চক্ৰৰ বিৰুদ্ধে অসম ৰাইফলছ আৰু ৰাজহ চোৰাংচোৱা সঞ্চালকালয়ৰ বৃহৎ সফলতা ৷ এক যুটীয়া অভিযানত কাছাৰ জিলাৰ লক্ষীপুৰৰ জুজাং পাহাৰ অঞ্চলৰ পৰা ৫.৬ লাখ য়াবা টেবলেট জব্দ কৰা হৈছে ৷ জব্দকৃত য়াবা টেবলেটখিনিৰ মূল্য প্ৰায় ১৬৮ কোটি টকা ৷
আজিৰ পৰা দুদিন পূৰ্বে অৰ্থাৎ ২৫-২৬ আগষ্টৰ নিশা চলোৱা এক অভিযানত প্ৰায় ৬০ কিলোগ্ৰাম ওজনৰ য়াবা টেবলেটখিনি জব্দ কৰিবলৈ অভিযানকাৰী দলটো সক্ষম হয় ৷ অভিযানকাৰী দলটোৱে এটা ড্ৰাগছ সৰবৰাহকাৰীক ইতিমধ্যে কৰায়ত্ত কৰিছে ৷ আনহাতে, সৰবৰাহকাৰীটোৱে এনে কাৰ্যত ব্যৱহাৰ কৰা এখন ট্ৰাকো অভিযানকাৰী দলটোৱে জব্দ কৰে ।
উল্লেখ্য যে, জব্দকৃত য়াবা টেবলেটখিনি মণিপুৰৰ পৰা অসমলৈ অনা হৈছিল বুলি অভিযানকাৰী দলটোৱে প্ৰাথমিক তদন্তত সন্দেহ প্ৰকাশ কৰিছে ৷ ৩৭নং ৰাষ্ট্ৰীয় ঘাইপথৰে অনা এই নিচাজাতীয় টেবলেটবোৰ অসমৰ মাজেৰে পৰিবহণ কৰাৰ পিছত দেশৰ আন প্ৰান্তলৈ সৰবৰাহ কৰাৰ পৰিকল্পনা কৰা হৈছিল বুলি অভিযানকাৰী দলটোৱে প্ৰাথমিক তদন্তৰ অন্তত জানিবলৈ দিয়ে ৷
ইয়াৰ লগতে কাছাৰ আৰু শ্ৰীভূমি জিলাক আন্তঃৰাজ্যিক ড্ৰাগছ সৰবৰাহৰ কৰিডৰ হিচাপে ব্যৱহাৰ কৰিবলৈ এক প্ৰচেষ্টা চলি থকা বুলি অভিযানকাৰী দলসমূহে সন্দেহ প্ৰকাশ কৰিছে ।
এনেবোৰ খবৰৰ মাজতে অৱশ্যে অসম আৰক্ষীৰ ড্ৰাগছ বিৰোধী অভিযান অব্যাহত আছে ৷ বুধবাৰে নিশা কোকৰাঝাৰ আৰক্ষীয়ে ১৩১ টা চাবোনৰ বাকচত লুকুৱাই অনা অৱস্থাত প্ৰায় ১০.৫ কোটি টকা মূল্যৰ হেৰ’ইন জব্দ কৰিবলৈ সক্ষম হৈছিল ৷
জব্দকৃত হেৰ’ইনখিনিৰ ওজন প্ৰায় ১.৪৮ কেজি ৷ ৰাজ্যৰ মুখ্যমন্ত্ৰী ডঃ হিমন্ত বিশ্ব শৰ্মাই নিজে সামাজিক মাধ্যমৰ জৰিয়তে এই খবৰ প্ৰকাশ কৰে ৷
লগতে পঢ়ক: কিয় আত্মহননৰ পথ বাচি ল'লে বিটিচিৰ উপাধ্যক্ষ বিজিৎ গৌৰা নাৰ্জাৰীয়ে ? স্তম্ভিত সকলো
