আন্তঃৰাষ্ট্ৰীয় আলু কেন্দ্ৰৰ সৈতে অসম কৃষি বিশ্ববিদ্যালয়ৰ বুজাবুজি চুক্তি

যোৰহাট : আলু অসমৰ লগতে উত্তৰ-পূৰ্বাঞ্চলৰ অন্যান্য ৰাজ্যসমূহৰ এক গুৰুত্বপূৰ্ণ শস্য ৷ কিন্তু কম উৎপাদনশীলতা, গুণগত মানসম্পন্ন বীজৰ অভাৱ, যান্ত্ৰিকীকৰণৰ সীমিত ব্যৱস্থা, কীট-পতংগ আৰু ৰোগৰ আক্ৰমণ, মূল্য শৃংখলৰ অপৰ্যাপ্ত বিকাশ তথা শীতল সংৰক্ষণৰ সুবিধাৰ অভাৱ আদি বিভিন্ন কাৰকে উত্তৰ-পূৰ্বাঞ্চলত আলু উৎপাদনৰ সম্প্ৰসাৰণত বাধাৰ সৃষ্টি কৰি আহিছে ৷

এই সমস্যাসমূহৰ মোকাবিলা কৰাৰ লগতে আলু খণ্ডত গৱেষণা, প্ৰশিক্ষণ, সম্প্ৰদায়ৰ সৈতে সংযোগ আৰু উপযুক্ত মূল্য শৃংখল গঢ়ি তোলাৰ উদ্দেশ্যে অসম কৃষি বিশ্ববিদ্যালয়ে (AAU) আন্তঃৰাষ্ট্ৰীয় আলু কেন্দ্ৰ (CIP) ৰ সৈতে এক বুজাবুজি চুক্তি স্বাক্ষৰ কৰিছে ৷

নতুন দিল্লীত আয়োজিত এক অনুষ্ঠানত অসম কৃষি বিশ্ববিদ্যালয়ে আন্তঃৰাষ্ট্ৰীয় আলু কেন্দ্ৰৰ সৈতে এই বুজাবুজি চুক্তি স্বাক্ষৰিত কৰে ৷ চুক্তিখনত অসম তথা উত্তৰ-পূৰ্বাঞ্চলত আলু খণ্ডৰ সামগ্ৰিক উন্নয়নৰ বাবে গৱেষণা আৰু প্ৰযুক্তিগত সহযোগিতাৰ নতুন সুযোগ সৃষ্টি কৰিব বুলি আশা কৰা হৈছে ৷

বিশেষকৈ উত্তৰ-পূবৰ নিৰ্দিষ্ট উন্নত জাতৰ বিকাশ, জলবায়ু-সহনশীল প্ৰযুক্তিৰ প্ৰসাৰ, গুণগত আলু বীজৰ উৎপাদন আৰু সংৰক্ষণ, আলু-ভিত্তিক শস্য ব্যৱস্থাৰ সম্প্ৰসাৰণ তথা ৰোগ আৰু কীট-পতংগ নিয়ন্ত্ৰণৰ ক্ষেত্ৰত সহযোগিতাৰ ওপৰত গুৰুত্ব আৰোপ তথা পৰিৱৰ্তন হ'ব বুলি আশা কৰা হৈছে ৷

অসম কৃষি বিশ্ববিদ্যালয়ৰ উপাচাৰ্য ডঃ দীপজ্যোতি ৰাজখোৱাই এই বুজাবুজি চুক্তিৰ জৰিয়তে আলুৰ খেতি আৰু ইয়াৰ উৎপাদন আৰু প্ৰক্ৰিয়াকৰণ, মূল্য সংযোজনৰ আৰু বিপণন আদিৰ ক্ষেত্ৰত অধিক আগুৱাই যোৱাৰ সম্ভাৱনা ব্যক্ত কৰে ৷

তেওঁ কয়, "জলবায়ু পৰিৱৰ্তনৰ প্ৰভাৱ মোকাবিলা কৰিব পৰা প্ৰযুক্তি, উন্নত বীজ, দক্ষ পুষ্টি ব্যৱস্থাপনা আৰু উপযুক্ত সংৰক্ষণ ব্যৱস্থাৰ বিকাশে ৰাজ্যখনৰ আলু খেতিয়কসকলক যথেষ্ট উপকৃত কৰিব ৷"

তেওঁ লগতে নিৰ্দিষ্ট লক্ষ্যৰে জাতৰ বিকাশ, জলবায়ু স্থিতিস্থাপক প্ৰযুক্তি, আলুৰ বীজ উৎপাদন আৰু সংৰক্ষণৰ সুবিধা সৃষ্টি, আলুভিত্তিক শস্য ব্যৱস্থা তীব্ৰতৰ কৰি ৰোগ আৰু কীট-পতংগ নিয়ন্ত্ৰণৰ পৰামৰ্শ আদিৰ ক্ষেত্ৰত যথেষ্ট সম্ভাৱনা আৰু সুযোগ সৃষ্টি হ'ব বুলি আশা ব্যক্ত কৰে ৷

এই বুজাবুজি চুক্তিৰ জৰিয়তে অসম, পঞ্জাৱ আৰু ৰাজস্থানকে ধৰি অংশীদাৰ ৰাজ্যসমূহত আলু সম্পৰ্কীয় গৱেষণা আৰু উন্নয়নৰ ক্ষেত্ৰত সহযোগিতাৰ নতুন দুৱাৰ মুকলি হ’ব বুলি অনুষ্ঠানত অংশগ্ৰহণ কৰা প্ৰতিনিধিসকলে আশা প্ৰকাশ কৰে ৷