২০২৬ৰ আৰম্ভণিতে কঁপি উঠিল ধৰিত্ৰী; ৫.১ প্ৰাবল্যৰ ভূঁইকঁপে কাহিলীপুৱাতে আতংকিত কৰিলে অসমবাসীক

গুৱাহাটী : নতুন বছৰৰ প্ৰথমটো সপ্তাহটোতে ভূমিকম্পই জোকাৰি গ'ল অসম । সোমবাৰে পুৱতি নিশা এই ভূমিকম্পৰ জোকাৰণি অনুভৱ কৰে অসমৰ ৰাইজে । চৰকাৰী প্ৰতিবেদন অনুসৰি ভূমিকম্পৰ অভিকেন্দ্ৰ আছিল মধ্য অসম । ভূমিকম্পৰ প্ৰাবল্য ৰিখটাৰ স্কেলত ৫.১ বুলি জানিব পৰা গৈছে ।

ৰাষ্ট্ৰীয় ভূমিকম্প বিজ্ঞান কেন্দ্ৰৰ এক প্ৰতিবেদনত কোৱা হৈছে যে ব্ৰহ্মপুত্ৰৰ দক্ষিণ পাৰৰ মৰিগাঁও জিলা আছিল ভূমিকম্পৰ অভিকেন্দ্ৰ । পুৱা ৪.১৭ বজাত ৫০ কিলোমিটাৰ গভীৰতাত এই ভূমিকম্পৰ উৎপত্তি বুলি কোৱা হৈছে । ভূমিকম্পৰ কেন্দ্ৰবিন্দু মধ্য অসমত ২৬.৩৭ উত্তৰ অক্ষাংশ আৰু ৯২.২৯ পূব দ্ৰাঘিমাংশত অৱস্থিত বুলিও জানিব পৰা গৈছে ।

ভূমিকম্পৰ অভিকেন্দ্ৰ মৰিগাঁৱত হোৱাৰ ফলত জিলাখনত কিছু ক্ষয়-ক্ষতিৰ তথ্য পোহৰলৈ আহিছে । আনহাতে দুগৰাকী লোক আহত হোৱাৰ খবৰ পোৱা গৈছে । আহতসকলক নীৰজ কুমাৰ আৰু জয়মতী দেউৰী বুলি জানিব পৰা গৈছে । জয়মতী দেউৰী ৮০ বছৰীয়া বৃদ্ধা । ঘৰৰ ভিতৰৰ পৰা বাহিৰলৈ ওলাই যোৱাৰ সময়তে বৃদ্ধাগৰাকীয়ে মূৰত আঘাত পায় । সম্প্ৰতি মৰিগাঁৱৰ শ্বহীদ তিলক-হেমৰাম-গুণাভিৰাম অসামৰিক চিকিৎসালয়ত চিকিৎসাধীন হৈ আছে ।

বৃদ্ধাগৰাকীৰ পৰিয়ালৰ সদস্যই কয়, "ভূমিকম্পৰ সময়ত আইতা বাহিৰলৈ ওলাই আহিছিল । তেতিয়া গ্ৰীলত লাগি মূৰ ফালি গৈছে । ১২ টা চিলাই পৰিছে ।"

ভূমিকম্পৰ অভিকেন্দ্ৰ মৰিগাঁও (ETV Bharat)

উল্লেখ্য যে, কামৰূপ মহানগৰ, নগাঁও, পূব কাৰ্বি আংলং, পশ্চিম কাৰ্বি আংলং, হোজাই, ডিমা হাচাও, গোলাঘাট, যোৰহাট, শিৱসাগৰ, চৰাইদেউ, কাছাৰ, কৰিমগঞ্জ, হাইলাকান্দি, ধুবুৰী, দক্ষিণ শালমৰা-মানকাচৰ আৰু গোৱালপাৰা জিলাৰ ৰাইজেও এই জোকাৰণি অনুভৱ কৰে । একেদৰে দৰং, তামুলপুৰ, শোণিতপুৰ, কামৰূপ, বিশ্বনাথ, ওদালগুৰি, নলবাৰী, বজালী, বৰপেটা, বাক্সা, চিৰাং, কোকৰাঝাৰ, বঙাইগাঁও আৰু লখিমপুৰত এই কঁপনি অনুভূত হয় ।

মধ্য-পশ্চিম অৰুণাচল প্ৰদেশৰ কিছু অঞ্চল, সমগ্ৰ মেঘালয় আৰু নাগালেণ্ড, মণিপুৰ, মিজোৰাম, ত্ৰিপুৰা আৰু পশ্চিমবংগৰ কেইবাটাও অঞ্চলত ভূমিকম্পৰ জোকাৰণি অনুভৱ কৰে । মধ্য-পূব ভূটান, চীন আৰু বাংলাদেশৰ কিছু অংশও ভূমিকম্পত কঁপি উঠি বুলি জানিব পৰা গৈছে ।

পুৱতি নিশা ভূমিকম্পই জোকাৰি যোৱাৰ সময়ত অধিকাংশ লোকে শোৱাপাটীতে আছিল । কিন্তু জোকাৰণি অনুভৱ কৰাৰ লগে লগে লোকসকলে মুকলি স্থানলৈ দৌৰিবলৈ বাধ্য হয় ।

সচৰাচৰ উত্তৰ পূব অঞ্চল ভূমিকম্প প্ৰৱণ হিচাপে জনাজাত । যাৰ বাবে অঞ্চলটোত সময়ে সময়ে এনেধৰণৰ সৰু-বৰ ভূমিকম্প হোৱা দেখা যায় ।ইফালে বছৰৰ আৰম্ভণিতে ভূমিকম্পৰ জোকাৰণি অনুভৱ কৰি এতিয়া আতংকিত হৈ পৰিছে অসমৰ জনসাধাৰণ ।

লগতে পঢ়ক :দীপৰ বিলত আৰম্ভ সমূহীয়া মাছ ধৰা উৎসৱ