মেছি জ্বৰত আক্ৰান্ত কলকাতা: পুৱতি নিশাতে আদৰণি জনাবলৈ ওলাই আহিল হাজাৰ হাজাৰ মেছি অনুৰাগী

কলকাতা : মেছি জ্বৰত আক্ৰান্ত কলকাতা । দুভৰিৰ যাদুকৰক দৰ্শনৰ বাবে অনুৰাগীৰ উন্মাদনা । নিজৰ প্ৰিয় তাৰকাগৰাকীক ফুটবল চহৰৰূপে খ্যাত কলকাতাত আদৰিবলৈ মাজনিশাৰে পৰা অপেক্ষা হাজাৰ হাজাৰ অনুৰাগী । ডিচেম্বৰৰ শীতৰ লহৰকো আওকাণ কৰি কেৱল নিজৰ চহৰখনলৈ আদৰণি জনাবলৈ ব্যাকুল সকলো । আৰ্জেণ্টিনাৰ ছুপাৰষ্টাৰ ফুটবলাৰ লিয়নেল মেছিয়ে তিনিদিনীয়া ভ্ৰমণ কাৰ্যসূচীৰে চাৰিখন চহৰৰ GOAT India Tour 2025ৰ অংশ হিচাপে শনিবাৰে কলকাতাত উপস্থিত হয় ।

শনিবাৰে পুৱা ২.২৬ বজাত বাৰ্চিলোনাৰ কিংবদন্তি ফুটবলাৰগৰাকী কলকাতাত উপস্থিত হোৱাৰ লগে লগে সমগ্ৰ চহৰখনত আনন্দৰ জোৱাৰ উঠে । আন্তঃৰাষ্ট্ৰীয় আগমন ক্ষেত্ৰৰ ৪ নং গে'টত শ্লোগান, পতাকা আৰু উজলি থকা ফোনবোৰেৰে এক গৰ্জনকাৰী সাগৰলৈ পৰিণত হয় । অনুৰাগীসকলে নিজৰ প্ৰিয় তাৰকাগৰাকীক এপলক দেখাৰ আশাৰে গে'টলৈ দৌৰি যায় ।

মেছি জ্বৰত আক্ৰান্ত কলকাতা (PTI)

কটকটীয়া নিৰাপত্তা ব্যৱস্থাৰে ভি আই পি গে'টৰে ওলাই অহাৰ সময়ত অভিভাৱকৰ কান্ধত বহি থকা শিশুৰ পৰা আৰম্ভ কৰি ঢুলীয়ালৈকে সকলোৱে হৰ্ষধ্বনি দিয়ে । ইয়াৰ পিছত এক বিশাল কনভয়ে তেওঁক হোটেললৈ লৈ যায় । তাতো তেওঁক মাজনিশাৰ পৰা আন এক বিশাল জনসমাগমে অপেক্ষা কৰি আছিল ।

বেৰিকেড, বৃহৎ মাত্ৰাত নিয়োগ কৰা আৰক্ষী আৰু অবিৰত উল্লাসে সমগ্ৰ চহৰখনত 'মেছি উন্মাদনা'ৰ সৃষ্টি কৰে । দীৰ্ঘদিনীয়া 'ষ্ট্ৰাইক পাৰ্টনাৰ' লুইছ ছুৱেৰেজ আৰু আৰ্জেণ্টিনাৰ সতীৰ্থ ৰড্ৰিগো ডি পলৰ সৈতে কলকাতাত উপস্থিত হয় মেছি । আগন্তুক ৭২ ঘণ্টাত তেওঁ কলকাতা, হায়দৰাবাদ, মুম্বাই আৰু দিল্লী ভ্ৰমণ কৰি তেওঁ মুখ্যমন্ত্ৰীসকল, কৰ্প'ৰেট নেতা, বলীউডৰ চেলিব্ৰিটি আৰু অৱশেষত সোমবাৰে প্ৰধানমন্ত্ৰী নৰেন্দ্ৰ মোদীক সাক্ষাৎ কৰিব ।

নিদ্ৰাবিহীন অপেক্ষাৰ অন্ত হতাশাৰে

কিন্তু নিশাটো উজাগৰে থাকি অপেক্ষা কৰি থকাৰ পিছতো বহু অনুৰাগীৰ বাবে অপেক্ষাৰ অন্ত পৰে হতাশাৰে । কাৰণ তেওঁলোকে নিজৰ আদৰ্শ তাৰকাগৰাকীৰ সামান্য দৰ্শনো লাভ কৰিব নোৱাৰিলে । কিয়নো কটকটীয়া নিৰাপত্তাৰ মাজেৰে মেছিক বিমানবন্দৰৰ পৰা উলিয়াই আনি পুৱা প্ৰায় ৩.৩০ বজাত পিছফালৰ প্ৰৱেশদ্বাৰেৰে তেওঁৰ হোটেললৈ লৈ যোৱা হয় । যাৰ ফলত অপেক্ষাৰত শ শ সমৰ্থকৰ সকলো আশাত চেঁচাপানী পৰে ।

মেছি জ্বৰত আক্ৰান্ত কলকাতা (PTI)

আনহাতে, বগা টি-চাৰ্টৰ ওপৰত ক’লা ছ্যুট পিন্ধি ব্যক্তিগত গালফষ্ট্ৰিম ভি বিমানৰ পৰা নামি অহাৰ সময়ত মাত্ৰ এমুঠিমান ভাগ্যৱান বিমানবন্দৰৰ কৰ্মচাৰীয়েহে আৰ্জেণ্টিনাৰ ছুপাৰষ্টাৰগৰাকীৰ ক্ষন্তেকীয়া আভাস এটা ল’বলৈ সক্ষম হয় । তাৰ পিছত তেওঁক ৰাণৱে'ৰ পৰা পোনে পোনে লৈ যোৱা হয় ।

আনহাতে, হায়াট ৰিজেন্সিৰ লবীত অনুৰাগীসকলে কৰিড'ৰৰ মাজেৰে দৌৰি গৈ 'মেছি... মেছি...' বুলি চিঞৰিবলৈ ধৰে । সমগ্ৰ লবীটো যেন তেতিয়া আৰ্জেণ্টিনাৰ ফেন ক্লাবৰ দৰে হৈ পৰিছিল, নীলা ৰঙৰ জাৰ্চি, ডিঙিত লোৱা কাপোৰ আৰু পতাকাৰে তেতিয়া গোটেইখন জিলিকি আছিল । মাতৃদুগ্ধ পান কৰি থকা কেঁচুৱাবোৰো মাতৃৰ কোলাত আছিল, শিশুবোৰে দৌৰি ঘূৰি ফুৰিছিল আৰু ক্লান্ত সমৰ্থকসকলে উন্মাদনা বৃদ্ধি পোৱাৰ লগে লগে লবীৰ চোফাতে শুই পৰিছিল ।

মেছিয়ে ৭৩০ নং কোঠাটোত প্ৰৱেশ কৰে । আনহাতে, তেওঁৰ কোঠাৰ চাৰিওফালে যিকোনো ধৰণৰ গতিবিধি বন্ধ হোৱাটো নিশ্চিত কৰিবলৈ সমগ্ৰ সপ্তম মহলাটো বন্ধ কৰি দিয়া হয় । ইফালে নিৰাপত্তা ব্যৱস্থাৰ শিখৰত উপনীত হোৱাৰ লগে লগে সামৰ্থ্যৱান একাংশ অনুৰাগীয়ে মেছিৰ যিমান পাৰি ওচৰত থাকিবলৈ হোটেলখনত কোঠা বুকিং কৰে ।

মেছি জ্বৰত আক্ৰান্ত কলকাতা (PTI)

মেছিৰ GOAT India ভ্ৰমণৰ পূৰ্বে সমগ্ৰ চহৰখনতে নিৰাপত্তা ব্যৱস্থা কটকটীয়া কৰা হয় । প্ৰতিটো ক্ৰছিঙতে আৰক্ষীয়ে স্নিফাৰ ডগেৰে বাহনবোৰ পৰীক্ষা কৰে আৰু হোটেলখনৰ চাৰিওফালে চোৰাংচোৱাগিৰি বৃদ্ধি কৰে ।

আনহাতে, হোটেলখনৰ কৰ্মচাৰীসকলে বৰদিনৰ ৰঙেৰে ৰঙীন দুটা ডাঙৰ তিনিটা তৰপীয়া ফণ্ডেণ্ট কেককে ধৰি থিমযুক্ত সজ্জা প্ৰস্তুত কৰাত ব্যস্ত আছিল । বিমানবন্দৰৰ বাহিৰত আৰু পিছলৈ হোটেলৰ ওচৰতে শীতৰ প্ৰকোপকো নেওচি মেছিক আদৰিবলৈ বিশাল ভিৰ হয় । অনুৰাগীয়ে আৰ্জেণ্টিনাৰ পতাকা আৰু জাৰ্চি জোকাৰি, তেওঁৰ নাম লৈ চিঞৰিবলৈ ধৰে । আৱেগৰ ঢল ভাঙি কোনোবাই হাত চাপৰি বজাইছিল, কোনোবাই কান্দিছিল, বহুতে নিজৰ চহৰত এবাৰ প্ৰজন্মৰ কিংবদন্তিগৰাকীক দেখা পাই আপ্লুত হৈছিল ।

হায়াট ৰিজেন্সি এই উন্মাদনাৰ কেন্দ্ৰবিন্দু হৈ পৰিছিল । ৰাজপথৰ বিক্ৰেতাসকলে স্কাৰ্ফ, পতাকা আৰু মেছিৰ ১০ নং জাৰ্চি বিক্ৰী কৰিছিল । উইগ আৰু সম্পূৰ্ণ আৰ্জেণ্টিনাৰ ৰঙৰ পোছাক পিন্ধি কেইজনমান অনুৰাগীয়ো উপস্থিত হয় । এজন অনুৰাগীয়ে কয়, "এয়া আজীৱনৰ বাবে সুযোগ । আজি নিশা আমি শুব নোৱাৰো আৰু পুৱা পোনে পোনে ষ্টেডিয়ামলৈ ৰাওনা হ'ম । আজি উদযাপনৰ দিন ।"

মেছি জ্বৰত আক্ৰান্ত কলকাতা (PTI)

ভ্ৰমণসূচী

শনিবাৰে মেছিয়ে স্পনছ'ৰৰ সৈতে এক বৈঠক আৰু আদৰণি কাৰ্যসূচীৰ সৈতে তেওঁ নিজৰ GOAT India ভ্ৰমণৰ আৰম্ভণি কৰিব । ইয়াৰ পিছত তেওঁ ছল্ট লেক ষ্টেডিয়ামলৈ যাব । তাত সংগীত, নৃত্য আৰু মোহন বাগান ‘মেছি’ অল ষ্টাৰ্ছ আৰু ডাইমণ্ড হাৰ্বাৰ ‘মেছি’ অল ষ্টাৰ্ছৰ মাজত প্ৰদৰ্শনীমূলক খেল আৰু এক শ্ৰদ্ধাঞ্জলি অনুষ্ঠানৰ আয়োজন কৰা হৈছে ।

তেওঁ পুৱা ১০.৫০ বজাত দুয়োটা দলৰ সৈতে মত বিনিময়, বংগৰ সন্তোষ ট্ৰফী বিজয়ী দলটোক সম্বৰ্ধনা আৰু শিশুসকলৰ বাবে "মাষ্টাৰ ক্লাছ উইথ মেছি" অনুষ্ঠানত অংশগ্ৰহণ কৰিব । লুইছ ছুৱেৰেজ, ৰড্ৰিগো ডি পল আৰু শ্বাহৰুখ খানেও এই কাৰ্যসূচীত যোগদান কৰিব । লগতে মুখ্যমন্ত্ৰী মমতা বেনাৰ্জী আৰু অন্যান্য গণ্য-মান্য ব্যক্তিসকলকো আমন্ত্ৰণ জনোৱা হৈছে ।

আনহাতে, লেক টাউনত ৭০ ফুট উচ্চতাৰ নিজৰ মূৰ্তিটো তেওঁ ভাৰ্চুৱেলী উন্মোচনৰ পূৰ্বে তেওঁ 'লেপ অব অনাৰ' গ্ৰহণ কৰিব । ইয়াৰ পিছত বিয়লি তেওঁ ২.০৫ বজাত হায়দৰাবাদলৈ ৰাওনা হ'ব । তাত সন্ধিয়াৰ ভাগত ৰাজীৱ গান্ধী ষ্টেডিয়ামত অনুষ্ঠিত হ’বলগীয়া অনুষ্ঠানত অংশগ্ৰহণ কৰিব । তাত এখন চমু প্ৰদৰ্শনী মেচ, তেলেংগানাৰ মুখ্যমন্ত্ৰী ৰেৱন্ত ৰেড্ডীৰ পাঁচ মিনিটৰ উপস্থিতি, এক ফুটবল কৰ্মশালা আৰু সম্বৰ্ধনা অনুষ্ঠানত অংশগ্ৰহণ কৰিব ।

উন্মোচন কৰিব নিজৰ সুবিশাল প্ৰতিমূৰ্তি (PTI)

ইয়াৰ পিছত তেওঁ ৱাংখেড়েত অনুষ্ঠিত হ'বলগা তেওঁৰ অনুষ্ঠানৰ বাবে মুম্বাইলৈ ৰাওনা হ'ব । এই ভ্ৰমণসূচীত ছুৱেৰেজ আৰু ডি পলৰ সৈতে ৪৫ মিনিটৰ এক ফেশ্বন ইভেণ্টত অংশগ্ৰহণ কৰিব । তাৰ পূৰ্বে চি চি আইত পেডেল কাপ অনুষ্ঠিত হ’ব ।

এই ভ্ৰমণৰ অন্ত পৰিব দিল্লীত । দিল্লীত মেছিয়ে প্ৰধানমন্ত্ৰী নৰেন্দ্ৰ মোদীক সাক্ষাৎ কৰিব । আনহাতে, মিনাৰ্ভা একাডেমীৰ তৃতীয়বাৰ যুৱ ট্ৰফী বিজয়ীসকলক সম্বৰ্ধনা জনোৱা হ’ব । তাৰ পিছত ৯ গৰাকীকৈ খেলুৱৈৰ এটা দলৰ এক চেলিব্ৰিটি মেচত অংশগ্ৰহণ কৰিব ।