কলকাতা টেষ্টৰ পৰা বাহিৰ শুভমন গিল

হায়দৰাবাদ : কলকাতাৰ ইডেন গাৰ্ডেনত ভাৰত আৰু দক্ষিণ আফ্ৰিকাৰ মাজত চলি থকা দ্বিপাক্ষিক শৃংখলাৰ প্ৰথমখন টেষ্টৰ বাকী অংশ খেলিব নোৱাৰিব ভাৰতীয় অধিনায়ক শুভমন গিলে ৷ দেওবাৰে ভাৰতীয় ক্ৰিকেট নিয়ন্ত্ৰণ ব’ৰ্ডে প্ৰকাশ কৰা শেহতীয়া আপডেট অনুসৰি সোঁহাতৰ বেটছমেনগৰাকী ডিঙিত আঘাতৰ বাবে খেলৰ পৰা বাহিৰ হৈছে ৷

ভাৰত আৰু দক্ষিণ আফ্ৰিকাৰ মাজত প্ৰথমখন টেষ্টৰ দ্বিতীয় দিনা গিলে দক্ষিণ আফ্ৰিকাৰ স্পিনাৰ চাইমন হাৰ্মাৰৰ বলত বেকৱাৰ্ড স্কোৱাৰৰ ওপৰেৰে এটা উজ্জ্বল ছুইপ শ্বট মৰা সময়তে ডিঙিত আঘাতপ্ৰাপ্ত হয় ৷

কলকাতা টেষ্টৰ পৰা বাহিৰ শুভমন গিল (AP)

বি চি চি আইয়ে এক বিবৃতিত কয়, "কলকাতাত দক্ষিণ আফ্ৰিকাৰ বিৰুদ্ধে চলি থকা টেষ্ট মেচখনৰ দ্বিতীয় দিনা অধিনায়ক শুভমন গিল ডিঙিত আঘাতপ্ৰাপ্ত হয় ৷ দিনটোৰ খেল শেষ হোৱাৰ পিছত তেওঁক মূল্যায়নৰ বাবে চিকিৎসালয়লৈ লৈ যোৱা হয় ৷ বৰ্তমান তেওঁক চিকিৎসালয়ত পৰ্যবেক্ষণ কৰা হৈছে ৷ তেওঁ টেষ্ট মেচত আৰু অংশগ্ৰহণ নকৰে ৷ বি চি চি আইৰ চিকিৎসা দলে তেওঁক নিৰীক্ষণ কৰি থাকিব ৷"

গিল অতি কম সময় ক্ৰীজত আছিল ৷ তেওঁ খেলপথাৰৰ পৰা ওলাই অহাৰ আগতে মাত্ৰ তিনিটা বলহে খেলিছিল ৷ সোঁহাতৰ বেটছমেনগৰাকীয়ে হাৰ্মাৰৰ পৰা ডিপ বেকৱাৰ্ড স্কোৱাৰ লেগৰ ফালে চাৰিটা মাৰিলে যদিও গতিৰ ফলত হোৱা প্ৰভাৱৰ বাবে শ্বট সম্পূৰ্ণ কৰাৰ পিছত লগে লগে তেওঁৰ ডিঙিত ধৰিলে ৷

ড্ৰিংকছ ব্ৰেকৰ পিছত ৩৫ নং অভাৰত বেটছমেনগৰাকীৰ আঘাতৰ প্ৰতি টীম ফিজিঅ’ই তৎক্ষণাত গুৰুত্ব দিয়ে ৷ একেটা অভাৰতে হাৰ্মাৰে ৱাশ্বিংটন সুন্দৰক আউট কৰিছিল ৷ ভাৰতে ১৮৯ ৰাণ কৰি প্ৰথম ইনিংছত ৪০ ৰাণৰ অগ্ৰগতি লাভ কৰে ৷

মেচৰ তৃতীয় দিনা দক্ষিণ আফ্ৰিকাই টেম্বা বাভুমাৰ অৰ্ধশতকৰ সহায়ত দ্বিতীয় ইনিংছত ১০০ ৰাণৰো অধিক অগ্ৰগতি লাভ কৰিছে ৷

এই শৃংখলাত ১-০ত অগ্ৰগতি লাভ কৰিবলৈ ভাৰতে এতিয়া ১২৪ ৰাণ সংগ্ৰহ কৰিব লাগিব । অৱশ্যে তেওঁলোকৰ হাতত থাকিব মাত্ৰ ৯টা উইকেট, কিয়নো ডিঙিত আঘাতৰ বাবে অধিনায়ক শুভমন গিল খেলৰ পৰা বাহিৰ হৈছে ।