দীপ্তি শৰ্মাৰ অভিলেখেৰে পুনৰ এবাৰ ভাৰতৰ সন্মুখত শিৰণত পাকিস্তানৰ

গুৱাহাটী: মহিলা টি-২০ বিশ্বকাপত ভাৰতৰ জয় ৷ বিশ্বকাপৰ ষষ্ঠখন তথা পাকিস্তানৰ বিৰুদ্ধে দেওবাৰে অনুষ্ঠিত প্ৰথমখন খেলত সহজ জয়লাভ হৰমনপ্ৰীত কৌৰ নেতৃত্বাধীন ভাৰতৰ মহিলা ক্ৰিকেট দলটোৰ ৷ বাৰ্মিংহামৰ এডগবাষ্টনত অনুষ্ঠিত খেলখনৰ টছত জিকি প্ৰথমে বেটিঙৰ সিদ্ধান্ত লৈছিল ভাৰতে ৷

ভাৰতীয় মহিলা দলটোৱে আইচিচি টি-২০ বিশ্বকাপত এক দৃষ্টিনন্দন আৰম্ভণি কৰিছে । পাকিস্তানৰ বিৰুদ্ধে ৬ উইকেটত মুঠ ১৭০ ৰাণ সংগ্ৰহ কৰাৰ পিছত ভাৰতে বিধ্বংসী বলিং বিক্ৰমেৰে প্ৰতিদ্বন্দ্বীক দলটোক সহজে ধৰাশায়ী কৰে ৷ প্ৰত্য়ুত্তৰত পাকিস্তানে মাত্ৰ ১০৬ ৰাণহে সংগ্ৰহ কৰিবলৈ সক্ষম হয় ৷ ফলত ভাৰতে ৬৪ ৰাণৰ ব্যৱধানত পাকিস্তানৰ বিৰুদ্ধে জয়লাভ কৰে ৷

এই খেলত তাৰকা বেটছমেন স্মৃতি মন্ধানাই দৰ্শনীয় ইনিংছেৰে অৰ্ধশতক অৰ্জন কৰে ৷ মন্ধানাই ৯ টা চাৰি আৰু দুটা ছয়ৰে ৪৪ টা বলত ৬৮ ৰাণ সংগ্ৰহ কৰে ৷ আন এগৰাকী তাৰকা বেটছমেন ৰিচা ঘোষেও বিস্ফোৰক বেটিঙেৰে মাত্ৰ ১৭ টা বলতে ৩৪ ৰাণ সংগ্ৰহ কৰে ৷ আনহাতে, অধিনায়ক হৰমনপ্ৰীত কৌৰে ৩৬ ৰাণ সংগ্ৰহ কৰে ৷ পাকিস্তানৰ হৈ অধিনায়ক ফাতিমা চানা আৰু শদিয়া ইকবালে দুটাকৈ আৰু তছমিয়া ৰুবাব আৰু ৰমীন ছামিমে এটাকৈ উইকেট দখল কৰে ।

এই খেলখনৰ জৰিয়তে ভাৰতীয় দলটোৱে পুনৰ এবাৰ পাকিস্তানৰ বিৰুদ্ধে অপ্ৰতিৰোধ্য বুলি নিজকে প্ৰমাণিত কৰিলে ৷ ভাৰতীয় দলটোৰ অন্যতম সদস্য দীপ্তি শৰ্মাৰ বিধ্বংসী বলিঙৰ আগত পাকিস্তানৰ বেটছমেনসকল একপ্ৰকাৰ দিশহাৰা হৈ পৰে ৷ আন্তঃৰাষ্ট্ৰীয় ক্ৰিকেটত ৩৫০ টা উইকেট দখল কৰা বিশ্বৰ প্ৰথমগৰাকী স্পিনাৰত পৰিণত হয় ভাৰতীয় বলাৰগৰাকী ৷

দীপ্তি শৰ্মাৰ বিশ্বাভিলেখ

পাকিস্তানৰ প্ৰথমটো উইকেট দখল কৰাৰ লগে লগে আন্তঃৰাষ্ট্ৰীয় ক্ৰিকেটত ৩৫০ টা উইকেট সম্পূৰ্ণ কৰা বিশ্বৰ প্ৰথমগৰাকী মহিলা বলাৰত পৰিণত হোৱাৰ অভিলেখ ৰচে ভাৰতৰ দীপ্তি শৰ্মাই ।

প্রাক্তন ভাৰতীয় ফাষ্ট বলাৰ ঝুলন গোস্বামীয়ে ৩৫৫ টা উইকেটৰে এই তালিকাৰ শীৰ্ষত আছে ৷ আইচিচি টি-২০ বিশ্বকাপৰ প্ৰথমখন খেলত দীপ্তিয়ে ৪ অভাৰত ১০ ৰাণ ব্যয় কৰি ৫ টা উইকেট দখল কৰিছে । একেখন খেলত ভাৰতৰ হৈ শ্ৰীচৰনীয়ে ৪ অভাৰত ২১ ৰাণৰ বিনিময়ত ৩ টা উইকেট দখল কৰিছে ৷ আনহাতে, শেফালী বাৰ্মাই এটা উইকেট লাভ কৰে ৷

লগতে পঢ়ক: মহিলা টি-২০ বিশ্বকাপ: পাকিস্তানৰ বিৰুদ্ধে অভিযান আৰম্ভ ভাৰতৰ, নকৰিলে কৰমৰ্দন