লৰ্ডছৰ খেলপথাৰত ভাৰতীয় মহিলা দলৰ ঐতিহাসিক জয়, ঘৰৰ মাটিতে পৰাস্ত ইংলেণ্ড

লণ্ডন: এক অনন্য কৃতিত্বৰ অধিকাৰী হ’বলৈ সক্ষম হৈছে ভাৰতীয় মহিলা ক্ৰিকেট দল ৷ ঘৰৰ মাটিতে বিপক্ষৰ প্ৰতিদ্বন্দ্বী ইংলেণ্ডক হৰুৱাই দলটোৱে এই কৃতিত্ব অৰ্জন কৰিবলৈ সক্ষম হৈছে ৷

ঐতিহাসিক লৰ্ডছৰ খেলপথাৰত অনুষ্ঠিত একমাত্ৰ টেষ্টত আয়োজক ইংলেণ্ডৰ বিৰুদ্ধে ঐতিহাসিক জয়লাভ কৰিছে ভাৰতীয় মহিলা ক্ৰিকেট দলটোৱে । খেলখনৰ চতুৰ্থ তথা অন্তিম দিনটোত ভাৰতে ইংলেণ্ডৰ সন্মুখত বান্ধি দিয়া ৪৫৭ ৰাণৰ প্ৰত্যুত্তৰত ঘৰুৱা দলটোৱে আটাইকেইটা উইকেটৰ বিনিময়ত ১৮৬ ৰাণ সংগ্ৰহ কৰে ৷ তাৰ লগে লগে লৰ্ডছত অনুষ্ঠিত মহিলাৰ প্ৰথমখন টেষ্টত ভাৰতে ২৭০ ৰাণত জয়লাভ কৰে ।

খেলখনত ভাৰতৰ হৈ স্মৃতি মন্ধানা আৰু যস্তিকা ভাটিয়াই অসাধাৰণ বেটিং প্ৰদৰ্শন আগবঢ়ায় ৷ আনহাতে, ক্ৰান্তি গৌড় আৰু স্নেহ ৰাণাই উৎকৃষ্ট বলিঙৰ জৰিয়তে দলটোৰ ঐতিহাসিক জয় নিশ্চিত কৰাত গুৰুত্বপূৰ্ণ ভূমিকা পালন কৰে ।

স্মৃতিয়ে প্ৰথম ইনিংছত ৮৩ ৰাণ আৰু দ্বিতীয় ইনিংছত ৭০ ৰাণ সংগ্ৰহ কৰে ৷ বিপৰীতে দ্বিতীয় ইনিংছত ১১৩ ৰাণৰ দুৰ্দান্ত ইনিংছ খেলি যস্তিকাই লৰ্ডছত টেষ্ট শতক অৰ্জনকাৰী প্ৰথমগৰাকী মহিলা ক্ৰিকেটাৰত পৰিণত হয় ।

বলিং বিভাগত ক্ৰান্তি গৌড়ে প্ৰথম ইনিংছত ৫টা আৰু দ্বিতীয় ইনিংছত দুটা উইকেট দখল কৰে ৷ তদুপৰি স্নেহ ৰাণাই দ্বিতীয় ইনিংছত ৪টা আৰু প্ৰথম ইনিংছত দুটা উইকেট দখল কৰি ইংৰাজ বেটছমেনসকলক ধৰাশায়ী কৰে ৷

প্ৰথম ইনিংছত ভাৰতীয় দলটোৱে ২৮৫ ৰাণ সংগ্ৰহ কৰে ৷ ইংলেণ্ডৰ প্ৰথম ইনিংছ ১৭০ ৰাণতে সীমাবদ্ধ থাকে ৷ যাৰ ফলত ভাৰতে ১১৫ ৰাণৰ অগ্ৰগতি লাভ কৰে । ইয়াৰ পাছতে ভাৰতে দ্বিতীয় ইনিংছত দুৰ্দান্ত বেটিঙেৰে তৃতীয় দিনৰ চাহ বিৰতিৰ পূৰ্বে ৭ উইকেটত ৩৪১ ৰাণত ইনিংছ ঘোষণা কৰি ইংলেণ্ডক জয়ৰ বাবে ৪৫৭ ৰাণৰ লক্ষ্য বান্ধি দিয়ে ৷

ইয়াৰ পাছতে ইংলেণ্ডে দ্বিতীয় ইনিংছত মাত্ৰ ১৮৬ ৰাণ সংগ্ৰহ কৰে ৷ দলটোৰ হৈ এমি জ’নছে ৫৪ আৰু ছফী এক্লেষ্টনে ৫০ ৰাণ সংগ্ৰহ কৰে । তেওঁলোকৰ বাহিৰে আন কোনো এগৰাকী বেটছমেনে ভাৰতীয় বলাৰসকলৰ বিপক্ষে উন্নত প্ৰদৰ্শন দাঙি ধৰিব নোৱাৰিলে ৷

লগতে পঢ়ক: আইচিচিৰ মাহটোৰ শ্ৰেষ্ঠ মহিলা খেলুৱৈ বঁটাৰ বাবে মনোনীতৰ নাম ঘোষণা