৪ উইকেটত জয়লাভেৰে ১-০ ত শৃংখলাত অগ্ৰগতি ভাৰতৰ

হায়দৰাবাদ: বডোদৰাৰ কোট্টাম্বি ক্ৰিকেট ষ্টেডিয়ামত অনুষ্ঠিত তিনিখন মেচৰ এদিনীয়া শৃংখলাৰ প্ৰথমখনত নিউজীলেণ্ডৰ বিৰুদ্ধে চাৰি উইকেটত জয়লাভ ভাৰতৰ ৷ জয়ৰে ২০২৬ বৰ্ষৰ আৰম্ভণি কৰিছে টীম ইণ্ডিয়াই ৷ বিৰাট কোহলীয়ে নিজৰ দুৰ্দান্ত ফৰ্ম অব্যাহত ৰাখি ৯৩ ৰাণৰ ইনিংছ খেলি ভাৰতক জয়ৰ দিশে আগুৱাই নিয়ে ৷

৩০১ ৰাণৰ লক্ষ্য আগত লৈ ক্ৰিজত নমা ভাৰতে অতি কম সময়তে হেৰুৱাই ৰোহিত শৰ্মাৰ উইকেট ৷ হিটমেনে মাত্ৰ ২৬ ৰাণ সংগ্ৰহ কৰিয়েই আউট হয় ।

অৱশ্যে বিৰাট কোহলী আৰু শুভমন গিলে ১০৭ টা বলত সংযোজন কৰে ১১৮ ৰাণ । গিল ৫৬ ৰাণত আউট হোৱাৰ বিপৰীতে কোহলীয়ে শ্ৰেয়স আয়াৰ(৪৯ ৰাণ)ৰ সৈতে যুটি বান্ধি তৃতীয় উইকেটত গুৰুত্বপূৰ্ণ ৰাণ সংযোজন কৰে । কোহলীয়ে ৯৩ টা বলত ৯১ ৰাণৰ দৰ্শনীয় ইনিংছ খেলি ভাৰতক ২৩৪ ৰাণত উপনীত হোৱাত সহায় কৰে ৷

ভাৰতে লক্ষ্যৰ দিশে দ্ৰুতগতিত আগবাঢ়িছিল যদিও কোহলীৰ উইকেটৰ পতনৰ পিছত সলনি হৈ পৰে খেলখনৰ গতি ৷ ৩ টা উইকেট হেৰুৱাই ২৩৪ ৰাণ সংগ্ৰহ কৰা ভাৰতে অতি কম সময়ৰ ভিতৰতে ৫ টা উইকেটৰ বিনিময়ত সংগ্ৰহ কৰে ২৪২ ৰাণ ৷ হৰ্ষিত ৰাণাৰ ২৯ ৰাণ আৰু কে এল ৰাহুলৰ অপৰাজিত ২৯ ৰাণৰ সহায়ত ভাৰতে ৪ উইকেটত জয়লাভ কৰে ৷

এদিনীয়াত দুয়োটা দলৰ মাজৰ প্ৰদৰ্শন

এই খেলখনৰ পূৰ্বে ভাৰত আৰু নিউজীলেণ্ডে ১২০ বাৰ এদিনীয়া মেচত মুখামুখি হৈছে । ইয়াৰে ৬২ খন মেচত ভাৰতে জয়লাভ কৰাৰ বিপৰীতে নিউজীলেণ্ডে ৫০ খনত জয়লাভ কৰিছে । এখন মেচ ড্ৰ' হৈছিল আৰু ৭খন মেচৰ কোনো ফলাফল ওলোৱা নাছিল ।

আজিৰ খেলখনত টছত ভাৰতীয় অধিনায়ক শুভমন গিলে কয়, "আমি বিভিন্ন পৰিস্থিতিত আমাৰ বাবে কোনটোৱে সৰ্বোত্তম কাম কৰে সেয়া চাবলৈ দলত বিভিন্ন যুটিৰ চেষ্টা কৰিছোঁ । বিশেষকৈ আমি যেতিয়া ভাৰতত খেলো । দেখাত উইকেট ভাল যেন লাগে । মই ভাবো দ্বিতীয় ইনিংছত নতুন বলৰ সৈতে বেটিং কৰাটো অলপ সহজ হ'ব আৰু সেইকাৰণে প্ৰথমে বলিং কৰাৰ সিদ্ধান্ত লৈছোঁ ।"

ইফালে নিউজীলেণ্ডৰ অধিনায়ক মাইকেল ব্ৰেচৱেলে কয়, "আমিও প্ৰথমে বলিং কৰিব বিচাৰিছিলোঁ, কিন্তু প্ৰথমে বেটিং কৰিবলৈ পাই সুখী । আমি বতৰৰ লগত অভ্যস্ত হৈছোঁ আৰু কিছুমান বেছি সময়ৰ নেটৰ অনুশীলন পালোঁ । আমাৰ বাবে এইটো এক বৃহৎ শৃংখলা; আমি প্ৰতিবাৰেই নিউজীলেণ্ডৰ হৈ খেলিলে এক গৌৰৱ অনুভৱ কৰোঁ । আমি ভাৰতত বিশ্বকাপ খেলিবলৈ ওলাইছো, গতিকে এই মেচখন আমাৰ বাবে এক ডাঙৰ সুযোগ । দলটোত নতুন মুখ আছে, কিন্তু অভিজ্ঞতা থকাও আছে ।"

দুয়োটা দলৰ প্লেয়িং-১১

নিউজীলেণ্ডৰ প্লেয়িং ১১ : ডেভন কনৱে, হেনৰী নিকোলছ, উইল ইয়ং, ডেৰিল মিচেল, গ্লেন ফিলিপছ, মিচেল হে (উইকেটকীপাৰ), মাইকেল ব্ৰেচৱেল (অধিনায়ক), জাকাৰী ফ'ল্কছ, ক্রিষ্টিয়ান ক্লাৰ্ক, কাইল জেমিছন, আদিত্য অশোক

ভাৰতৰ প্লেয়িং-১১ : ৰোহিত শৰ্মা, শুভমন গিল (অধিনায়ক), বিৰাট কোহলী, শ্ৰেয়স আয়াৰ, কে এল ৰাহুল (উইকেটকীপাৰ), ৰবীন্দ্ৰ জাদেজা, ৱাশ্বিংটন সুন্দৰ, হৰ্ষিত ৰাণা, কুলদীপ যাদৱ, মহম্মদ চিৰাজ, প্ৰসিদ্ধ কৃষ্ণ ।

লগতে পঢ়ক: নিউজীলেণ্ডৰ বিৰুদ্ধে এদিনীয়া শৃংখলাৰ পৰা বাহিৰ পণ্ট, জুৰেলে পালে সুযোগ