পঞ্চদশ বাক্সা বড়োলেণ্ড শ্বহীদ স্বৰ্ণকাপ ফুটবলৰ চূড়ান্ত মেচত বিজয়ী ছালবাগান এফ চি
এই মেচত ছালবাগান এফ চি গোসাইগাঁও দলে বাৰহুংসা এথলেটিকছ ক্লাৱ কোকৰাঝাৰক ২-০ গলত পৰাজিত কৰে ৷
Published : October 30, 2025 at 2:54 PM IST
বাক্সা: বড়োলেণ্ড শ্বহীদ স্বৰ্ণকাপ ফুটবলৰ ফাইনেল খেলত বিজয়ৰ হাঁহি মাৰিবলৈ সক্ষম হ’ল ছালবাগান এফ চি গোসাইগাঁও দলে ৷ বৰমাত চলি থকা পঞ্চদশ বাৰ্ষিক বাক্সা জিলা বড়োলেণ্ড শ্বহীদ স্বৰ্ণকাপ ফুটবলৰ ফাইনেল খেলত ছালবাগান এফ চি গোসাইগাঁও দলে বাৰহুংসা এথলেটিকছ ক্লাৱ কোকৰাঝাৰক ২-০ গলত পৰাজিত কৰে ৷
এই খেলখনত শ্ৰেষ্ঠ খেলুৱৈৰ সন্মান লাভ কৰে ছালবাগান এফ চি গোসাইগাঁও দলৰ ৭ নং জাৰ্চি পৰিহিত ৰাজকুমাৰ হেমৰঙে ৷ খেলখনৰ শ্ৰেষ্ঠ গলৰক্ষকৰ সন্মান লাভ কৰে ২১ নং জাৰ্চি পৰিহিত চানচাৰাং মুছাহাৰীয়ে ৷ বাক্সা জিলা বড়োলেণ্ড শ্বহীদ স্বৰ্ণকাপ ফুটবল ট্ৰফি ২০২৫-ৰ শ্ৰেষ্ঠ খেলুৱৈৰ সন্মান লাভ কৰে মৈখুম নাৰ্জাৰীয়ে ৷
ফাইনেল খেলখন উদ্বোধন কৰে বি টি চিৰ ই এম বিজিৎগৌৰা নাৰ্জাৰীয়ে ৷ এই খেলত উপস্থিত থাকে বাক্সা জিলা স্পৰ্টচ এছ’চিয়েশ্যনৰ সভাপতি তথা প্ৰাক্তন বিধায়ক হিতেশ বসুমতাৰী ৷
হিতেশ বসুমতাৰীয়ে কয়, ‘‘পৃথক বড়ো ৰাজ্য দাবী আন্দোলনত শ্বহীদ হোৱাসকলৰ স্মৃতিত প্ৰতি বছৰে এই ফুটবল খেল চলি আহিছে ৷ প্ৰতি বছৰৰ দৰে এইবাৰো বাক্সা জিলা বড়োলেণ্ড শ্বহীদ স্বৰ্ণকাপ ফুটবল ট্ৰফি ২০২৫ বৰমাৰ জুলি মৈদানত অনুষ্ঠিত হৈছে ৷ আৰ্থিক ফালৰ পৰা যথেষ্ট দুৰ্বল কাৰণে এই প্ৰতিযোগিতাখন বিস্তৃত কৰিব পৰা নাই ৷ পূৰ্বতে এই প্ৰতিযোগিতা সৰ্বভাৰতীয় পৰ্যায়ৰ প্ৰতিযোগিতাৰ সমানে আছিল ৷ মণিপুৰ, মিজোৰাম, কেৰালা, পঞ্জাব, মহাৰাষ্ট্ৰ আদি ৰাজ্যৰ পৰা যোগদান কৰিছিল ৷ এই ফুটবল প্ৰতিযোগিতাৰ নামত বছৰত বি টি চি চৰকাৰে পাঁচ লাখ টকা বহন কৰে ৷ এই টকাই যথেষ্ট নহয় ৷ তাৰোপৰিও ট্ৰফিসমূহো ব্যক্তি বিশেষে দান দিছে ৷’’
