গোলাঘাট, 3 আগষ্ট: গোলাঘাটৰ নামবৰ দৈগ্ৰোং সংৰক্ষিত বন্যপ্ৰাণী অভয়াৰণ্যৰ হুৰহুৰি বন শিবিৰৰ সমীপত শুকুৰবাৰে মৃত অৱস্থাত এটা মেঠোন উদ্ধাৰ কৰে বনবিভাগে ৷ এই খবৰ লাভ কৰাৰ পাচতে ঘটনাস্থলীত উপস্থিত হয় গোলাঘাট আঞ্চলিক বন বিষয়া কাৰ্যালয়ৰ এটা চিকিৎসকৰ দল ৷ চিকিৎসকৰ দলটোৱে মেঠোনটোৰ মৰণোত্তৰ পৰীক্ষা সম্পন্ন হোৱাৰ পাচতে গাঁত খান্দি পুতি থোৱাৰ ব্যৱস্থা কৰে ৷
আনহাতে, সৰ্প দংশনৰ ফলত মেঠোনটোৰ মৃত্যু হোৱা বুলি চিকিৎসকে জানিবলৈ দিয়ে ৷ উল্লেখযোগ্য যে, নামবৰ দৈগ্ৰোং সংৰক্ষিত বন্যপ্ৰাণী অভয়াৰণ্য ক্ৰমান্বয়ে সংকুচিত হৈ অহাৰ ফলত লুপ্ত হ'বলৈ ধৰিছে মেঠোনৰ সংখ্যা । বন বিভাগে লুপ্তপ্ৰায় মেঠোনৰ সংৰক্ষণৰ ব্যৱস্থা কৰিবলৈ সচেতন ৰাইজে আহ্বান জনাইছে ।
