৪৫ বছৰতেই বিজেপিৰ ৰাষ্ট্ৰীয় কাৰ্যকৰী সভাপতি পদত অধিষ্ঠিত কোন এই নীতিন নবীন ?

নতুন দিল্লী: বিহাৰ চৰকাৰৰ গড়কাপ্তানী মন্ত্ৰী ৪৫ বছৰীয়া নীতিন নবীনক বিজেপিৰ ৰাষ্ট্ৰীয় কাৰ্যকৰী সভাপতি হিচাপে নিযুক্তি দিয়াৰ পিছতেই প্ৰধানমন্ত্ৰী নৰেন্দ্ৰ মোদীৰ লগতে বহু নেতা-কৰ্মীয়ে তেওঁক শুভেচ্ছা জ্ঞাপন কৰিছে । পাটনাৰ বাংকীপুৰ সমষ্টিৰ বিধায়ক নীতিন নবীনক বিজেপিৰ সংসদীয় ব’ৰ্ডে দেওবাৰে নতুন ৰাষ্ট্ৰীয় কাৰ্যকৰী সভাপতি হিচাপে ঘোষণা কৰিছে ।

বৰ্তমানৰ ৰাষ্ট্ৰীয় সভাপতি জগত প্ৰকাশ নাড্ডাৰ পিছত তেওঁ এই দায়িত্ব গ্ৰহণ কৰিব । বিজেপিৰ প্ৰবীণ নেতা তথা প্ৰাক্তন বিধায়ক প্ৰয়াত নবীন কিশোৰ প্ৰসাদ সিনহাৰ পুত্ৰ নীতিন নবীন হৈছে দলটোৰ ইতিহাসৰ আটাইতকৈ কম বয়সীয়া কাৰ্যকৰী সভাপতি । তেওঁ বিহাৰৰ এগৰাকী পৰিচিত ৰাজনৈতিক ব্যক্তি । পাটনাত ৰাজনীতিৰ শিপা আৰম্ভ কৰাৰ পৰা দলীয় সংগঠনত উত্থানলৈকে সকলোবোৰৰ সবিশেষ জানিবলৈ পঢ়ক এই প্ৰতিবেদন ।

দলৰ ৰাষ্ট্ৰীয় কাৰ্যকৰী সভাপতি হিচাপে নিযুক্তি লাভ কৰা কনিষ্ঠতম বিজেপি নেতা নীতিন নবীন (ETV Bharat)

নীতিন নবীন কোন ?

পাটনাত জন্মগ্ৰহণ কৰা নীতিন কায়স্থ সম্প্ৰদায়ৰ । বৰ্তমান বিহাৰৰ নীতিশ কুমাৰ নেতৃত্বাধীন চৰকাৰত গড়কাপ্তানী মন্ত্ৰী হিচাপে কাৰ্যনিৰ্বাহ কৰি আছে । পিতৃ নবীন কিশোৰ সিনহাৰ মৃত্যুৰ পিছত নীতিন সক্ৰিয়ভাৱে ৰাজনীতিত জড়িত হৈ পৰে ।

৪৫ বছৰ বয়সতেই তেওঁ ইতিমধ্যে পাঁচবাৰকৈ বিধায়ক নিৰ্বাচিত হৈছে । ২০২৫ চনৰ বিহাৰ বিধানসভা নিৰ্বাচনত তেওঁ বিজেপিৰ টিকটত পাটনাৰ বাংকীপুৰ সমষ্টিৰ পৰা পঞ্চমবাৰৰ বাবে জয়লাভ কৰিবলৈ সক্ষম হয় । তেওঁ ৫১,৯৩৬টা ভোটৰ ব্যৱধানত আৰ জে ডিৰ প্ৰাৰ্থী ৰেখা কুমাৰীক পৰাস্ত কৰে । তেওঁ লাভ কৰিছিল ৯৮,২৯৯টা ভোট ।

বিহাৰৰ এইগৰাকী জনপ্ৰিয় নেতাই ২০০৬ চনত পাটনা পশ্চিম সমষ্টিৰ পৰা উপ-নিৰ্বাচনত জয়লাভ কৰি প্ৰথমবাৰৰ বাবে বিধানসভাত প্ৰৱেশ কৰিবলৈ সক্ষম হৈছিল । ইয়াৰ পূৰ্বে তেওঁৰ পিতৃ নবীন কিশোৰ সিনহাও এই সমষ্টিটোৰ পৰা বিধায়ক হিচাপে নিৰ্বাচিত হৈছিল । তেওঁ ২০১০, ২০১৫, ২০২০ আৰু ২০২৫ চনত বিধানসভাৰ নিৰ্বাচনত জয়লাভ কৰিছিল ।

মুখ্যমন্ত্ৰী নীতিশ কুমাৰৰ সৈতে নীতিন নবীন (ETV Bharat)

কনিষ্ঠ হিচাপে গুৰু দায়িত্ব লাভ :

মাত্ৰ ৪৫ বছৰ বয়সতে বিজেপিত এনে গুৰু দায়িত্ব লাভ কৰা কনিষ্ঠ নেতাৰ ভিতৰত অন্যতম নীতিন নবীন । উল্লেখ্য় যে ৰাষ্ট্ৰীয় সভাপতি হিচাপে কাৰ্যনিৰ্বাহ কৰাৰ সময়ত জে পি নড্ডাৰ বয়স আছিল ৬৫ বছৰ । আনহাতে গেৰুৱা দলৰ মুৰব্বী হোৱাৰ সময়ত অমিত শ্বাহৰ বয়স আছিল প্ৰায় ৫০ বছৰ । উল্লেখ্য় যে ২০২০ চনতেই আনুষ্ঠানিকভাৱে নাড্ডাৰ কাৰ্যকাল সমাপ্ত হৈছিল । তেতিয়াৰে পৰাই নাড্ডাৰ কাৰ্যকাল বৃদ্ধি কৰি অহা হৈছে ।

কিয় নীতিন নবিনৰ ওপৰত বিজেপিৰ বিশ্বাস ?

তেওঁৰ ওপৰত এই দায়িত্ব অৰ্পণ কৰাত স্বাভাৱিকতেই সকলোৰে মাজত চৰ্চা হৈছে যে বিজেপিৰ নীতিন নবিনৰ ওপৰত কিয় ইমান আস্থা ? দলটোৰ এই আস্থা মূলতঃ তেওঁৰ সাংগঠনিক অভিজ্ঞতা । ছত্তীশগড় বিধানসভাৰ নিৰ্বাচনত তেওঁক দায়িত্ব দিয়া হৈছিল, য’ত দলটোৱে বিজয় সাব্য়স্ত কৰিবলৈ সক্ষম হয় । এই সফলতাৰ লগতে দল-সংগঠনৰ অভিজ্ঞতাৰ বাবে দলটোৱে তেওঁৰ ওপৰত আস্থা প্ৰকাশ কৰিছে ।

কেন্দ্ৰীয় গৃহমন্ত্ৰী অমিত শ্বাহৰ সৈতে নীতিন নবীন (ETV Bharat)

বিজেপিৰ সূত্ৰ অনুসৰি অহা ১৪ জানুৱাৰীৰ পিছত ৰাষ্ট্ৰীয় সভাপতি পদৰ বাবে আনুষ্ঠানিক নিৰ্বাচন অনুষ্ঠিত হ’ব । এপ্ৰিলত অনুষ্ঠিতব্য় বিজেপিৰ ৰাষ্ট্ৰীয় পৰিষদৰ বৈঠকত নীতিন নবীনৰ এই পদত নিযুক্তি অনুমোদন জনোৱা হ’ব । তাৰ পূৰ্বে সভাপতি হিচাপে নিৰ্বাচিত হোৱাৰ সকলো পদ্ধতি সম্পূৰ্ণ হোৱাৰ সম্ভাৱনা আছে বুলি দলীয় সূত্ৰই লগতে কয় ।

প্ৰধানমন্ত্ৰী মোদী, নীতিশ কুমাৰৰ অভিনন্দন :

প্ৰধানমন্ত্ৰী নৰেন্দ্ৰ মোদীয়ে দেওবাৰে নীতিনক বিজেপিৰ ৰাষ্ট্ৰীয় কাৰ্যকৰী সভাপতি হিচাপে নিযুক্তি দিয়াৰ বাবে অভিনন্দন জ্ঞাপন কৰে । বিহাৰৰ বিধায়ক আৰু মন্ত্ৰী হিচাপে নীতিনৰ কামক অতি ফলপ্ৰসূ বুলি প্ৰশংসা কৰি প্ৰধানমন্ত্ৰী মোদীয়ে তেওঁৰ শক্তি আৰু দায়বদ্ধতাই আগন্তুক দিনত দলটোক অধিক শক্তিশালী কৰিব বুলি আশা প্ৰকাশ কৰে । ইপিনে, বিহাৰৰ মুখ্যমন্ত্ৰী নীতিশ কুমাৰেও তেওঁক অভিনন্দন জনাই কয় যে বিহাৰৰ এগৰাকী নেতাক বিজেপিৰ ৰাষ্ট্ৰীয় কাৰ্যকৰী সভাপতি হিচাপে নিযুক্তি পোৱাটো অতি সুখৰ বিষয় ।

এই ঘোষণাৰ পিছতে দেওবাৰে পাটনাত উপস্থিত হোৱাৰ সময়ত বিহাৰ বিজেপিৰ ৰাজ্যিক সদৰত তেওঁক বিপুল আদৰণি জনোৱা হয় । ৰাজ্যিক বিজেপিৰ সভাপতি দিলীপ জয়ছোৱাল, উপ-মুখ্যমন্ত্ৰী সম্ৰাট চৌধুৰী আৰু বিজয় সিঙে উষ্ম আদৰণি জনায় নীতিন নবীনক ।