উপ-ৰাষ্ট্ৰপতি, ৰাজ্যসভাৰ সভাপতি চি পি ৰাধাকৃষ্ণণক সদনলৈ আদৰণি প্ৰধানমন্ত্ৰীৰ

নতুন দিল্লী : ভাৰতৰ নৱ-নিৰ্বাচিত উপ-ৰাষ্ট্ৰপতি তথা ৰাজ্যসভাৰ সভাপতি চি পি ৰাধাকৃষ্ণণক সোমবাৰে সংসদৰ উচ্চ সদনত আদৰণি জনাই প্ৰধানমন্ত্ৰী নৰেন্দ্ৰ মোদীয়ে তেওঁৰ প্ৰেৰণাদায়ক ৰাজনৈতিক যাত্ৰা আৰু সমাজসেৱাৰ প্ৰতি আজীৱন দায়বদ্ধতাক আলোকপাত কৰে ৷ উপ-ৰাষ্ট্ৰপতি চি পি ৰাধাকৃষ্ণণে ২০২৫ চনৰ ছেপ্টেম্বৰ মাহত ৰাজ্যসভাৰ সভাপতিৰ পদ গ্ৰহণ কৰিছিল ৷ প্ৰধানমন্ত্ৰী মোদীয়ে উপ-ৰাষ্ট্ৰপতি ৰাধাকৃষ্ণণৰ ৰাজনৈতিক যাত্ৰাক প্ৰশংসা কৰি সাংসদসকলৰ বাবে প্ৰেৰণা আখ্যা দিয়ে ৷

প্ৰধানমন্ত্ৰীয়ে সদনৰ সভাপতিক আশ্বাস দিয়ে যে সংসদৰ কাম-কাজৰ সময়ত ৰাজ্যসভাৰ সাংসদসকলে সদনৰ আৰু সভাপতিৰ পদৰ মৰ্যাদা অক্ষুণ্ণ ৰাখিব ৷ তেওঁ কয়, "আপোনাক আদৰণি জনোৱাটো এক গৌৰৱৰ মুহূৰ্ত আৰু আপোনাৰ নিৰ্দেশনাত গুৰুত্বপূৰ্ণ সিদ্ধান্ত গ্ৰহণ কৰা হ'ব আৰু দেশখনক উন্নয়নৰ পথত আগুৱাই নিয়া হ'ব ৷ সদনৰ হৈ আপোনালৈ অভিনন্দন আৰু শুভেচ্ছা জ্ঞাপন কৰিছো ৷ মই নিশ্চিত যে ইয়াত বহি থকা সকলো সাংসদে উচ্চ সদনৰ মৰ্যাদা আৰু আপোনাৰ মৰ্যাদাও বজাই ৰাখিব ৷"

তেওঁ লগতে কয়, "আমাৰ সভাপতি এজন সাধাৰণ কৃষক পৰিয়ালৰ পৰা আহিছে আৰু তেওঁ সমাজসেৱাৰ বাবে নিজৰ জীৱন উৎসৰ্গা কৰিছে ৷ ৰাজনৈতিক ক্ষেত্ৰখন তেওঁৰ সমাজসেৱাৰ এক অংশ হৈ আহিছে ৷ যুৱ সময়ৰ পৰা তেওঁৰ কাম সমাজ সেৱাৰ প্ৰতি আগ্ৰহীসকলৰ বাবে এক প্ৰেৰণা ৷ ৰাজনীতিৰ উত্থান-পতনৰ মাজতো আপোনাৰ ইয়াত উপস্থিত হোৱাটোৱেই ভাৰতীয় গণতন্ত্ৰৰ আটাইতকৈ ডাঙৰ শক্তি ।"

প্ৰধানমন্ত্ৰীয়ে কয় "ৰাজ্যসভাৰ সভাপতি ৰাধাকৃষ্ণণৰ প্ৰট’কলৰ দ্বাৰা স্তব্ধ নোহোৱা অভ্যাসে তেওঁক ৰাজহুৱা জীৱনত ক্ষমতা প্ৰদান কৰে ৷ আপোনাক দীৰ্ঘদিন ধৰি চিনি পোৱা আৰু আপোনাৰ সৈতে কাম কৰাৰ সুযোগ পোৱাটো মোৰ বাবে এক গৌৰৱৰ কথা ৷ কইৰ ব’ৰ্ড (Coir board)ৰ সভাপতি হিচাপে আপুনি প্ৰতিষ্ঠানটোক ইতিহাসৰ আটাইতকৈ লাভজনক প্ৰতিষ্ঠানলৈ ৰূপান্তৰিত কৰিলে ৷"

"এনে সুযোগ মাত্ৰ দুই এজনেহে পায় ৷ ঝাৰখণ্ডৰ জনজাতীয় লোকৰ সৈতে যিদৰে আপোনাৰ যেনেদৰে সম্পৰ্ক গঢ়ি উঠিছিল, মুখ্যমন্ত্ৰীয়েও উল্লেখ কৰিছিল ৷ হেলিকপ্টাৰ পাওক বা নাপাওক, আপুনি আগবাঢ়ি গৈ থাকিল ৷ মই আপোনাক এজন শ্ৰমিক হিচাপে দেখিছো, এজন সাংসদ হিচাপে দেখিছো আৰু মই উপলব্ধি কৰিছো যে সাধাৰণতে মানুহ প্ৰট'কলৰ দ্বাৰা স্তব্ধ হৈ পৰে, কিন্তু প্ৰট'কলৰ লগত আপোনাৰ কোনো সম্পৰ্ক নাই ৷ প্ৰট’কলৰ পৰা মুক্ত জীৱনত এটা শক্তি আছে আৰু আমি সদায় আপোনাৰ মাজত সেইটো অনুভৱ কৰি আহিছো ৷" প্ৰধানমন্ত্ৰীয়ে কয়৷

চি পি ৰাধাকৃষ্ণণে ভাৰতৰ ১৫ সংখ্যক উপ-ৰাষ্ট্ৰপতি নিৰ্বাচনত ৪৫২টা ভোট লাভ কৰি জয়ী হোৱাৰ বিপৰীতে বিৰোধী প্ৰাৰ্থী তথা উচ্চতম ন্যায়ালয়ৰ প্ৰাক্তন ন্যায়াধীশ বি সুদৰ্শন ৰেড্ডীয়ে ৩০০টা ভোট লাভ কৰিছিল । জ্যেষ্ঠ বিজেপি নেতাগৰাকীয়ে ইয়াৰ পূৰ্বে ২০২৩ চনৰ ফেব্ৰুৱাৰী মাহৰ পৰা ২০২৪ চনৰ জুলাইলৈকে মহাৰাষ্ট্ৰৰ ৰাজ্যপাল আৰু ঝাৰখণ্ডৰ ৰাজ্যপাল হিচাপে কাৰ্যনিৰ্বাহ কৰিছিল ৷ তেওঁ ২০২৪ চনৰ মাৰ্চৰ পৰা জুলাই মাহলৈ তেলেংগানা আৰু পুডুচেৰীৰ অতিৰিক্ত ৰাজ্যপাল হিচাপেও দায়িত্বভাৰ গ্ৰহণ কৰিছিল ৷ তামিলনাডু বিজেপিৰ ৰাজ্যিক সভাপতিও আছিল চি পি ৰাধাকৃষ্ণণ ।

উল্লেখ্য যে, আজিৰ পৰা আৰম্ভ হৈছে সংসদৰ শীতকালীন অধিৱেশন ৷ নতুন সভাপতিক উচ্চ সদনলৈ আনুষ্ঠানিকভাৱে আদৰণি জনোৱাৰ বিপৰীতে বিশেষ নিবিড় সংশোধন (SIR)ক লৈ বিৰোধীয়ে কৰা প্ৰতিবাদৰ বাবে লোকসভা দুপৰীয়ালৈ স্থগিত ৰখা হয় ।

লগতে পঢ়ক : নাটকৰ বাবে বহু ঠাই আছে, ইয়াত ডেলিভাৰীৰ প্ৰয়োজন : সংসদৰ অধিৱেশনৰ পূৰ্বে বিৰোধীক কটাক্ষ প্ৰধানমন্ত্ৰী মোদীৰ