জন আশীৰ্বাদ যাত্ৰাত হাতী-বুলড'জাৰত উঠি ৰাইজে আদৰিলে মুখ্যমন্ত্ৰীক

মৰিগাঁও: বিজেপিৰ জন আশীৰ্বাদ যাত্ৰাৰ আজি আছিল দ্বিতীয়টো দিন । শোণিতপুৰ জিলাৰ বৰছলাত শনিবাৰে এই যাত্ৰা আৰম্ভ হোৱাৰ পিচত দেওবাৰে মুখ্যমন্ত্ৰী উপস্থিত হয় মৰিগাঁও জিলাৰ জাগীৰোডত । এই যাত্ৰাৰ দ্বিতীয়টো দিনত জাগীৰোডত অংশগ্ৰহণ কৰি হাজাৰ হাজাৰ সমৰ্থকে মুখ্যমন্ত্ৰী ড৹ হিমন্ত বিশ্ব শৰ্মাৰ আদৰণি জনায় ।

উল্লেখ্য় যে বিজেপিৰ জন আশীৰ্বাদ যাত্ৰাত জাগীৰোডত মুখ্যমন্ত্ৰী ড৹ হিমন্ত বিশ্ব শৰ্মাক বুলড'জাৰৰ লগতে হাতীৰে আদৰণি জনায় দলীয় সমৰ্থকসকলে । মুখ্য়মন্ত্ৰীয়েও দলীয় সমৰ্থকৰ সৈতে হাত মিলাই তেওঁলোকক উৎসাহ যোগায় ।

শনিবাৰে ঢেকীয়াজুলিৰ পৰা এই যাত্ৰা আৰম্ভ কৰি শোণিতপুৰ জিলাৰ পাঁচটা সমষ্টিৰ ভোটাৰ ৰাইজৰ সৈতে যাত্ৰা কৰাৰ পিছত দেওবাৰে জাগীৰোডৰ দেওশাল মন্দিৰৰ পৰা আনুষ্ঠানিকভাৱে যাত্ৰা আৰম্ভ কৰে মুখ্য়মন্ত্ৰীয়ে । মুখ্যমন্ত্ৰীয়েও সমৰ্থকৰ সৈতে নাচি-বাগি ভোটাৰ ৰাইজৰ দৃষ্টি আকৰ্ষণ কৰিবলৈ চেষ্টা চলায় ।

হাজাৰ হাজাৰ সমৰ্থকৰ সৈতে নাচিলে মুখ্যমন্ত্ৰীয়ে (ETV Bharat Assam)

জনসাধাৰণৰ সৈতে পোনপটীয়াকৈ সংযোগ স্থাপনৰ লক্ষ্য়ৰে বিজেপিয়ে আৰম্ভ কৰিছে জন আশীৰ্বাদ যাত্ৰা । বিজেপিয়ে পথসভা আৰু চৰকাৰৰ উন্নয়নমূলক আঁচনি, আন্তঃগাঁথনিৰ উন্নয়ন, শিক্ষা-স্বাস্থ্য খণ্ডৰ সংস্কাৰ আৰু আত্মনিৰ্ভৰ অসমৰ দৃষ্টিভংগী আদিৰ বিষয়ে ৰাইজৰ মাজত প্ৰচাৰ কৰিব ।

অসমত আগন্তুক বিধানসভা নিৰ্বাচনৰ প্ৰাকক্ষণত আৰম্ভ কৰা জন আশীৰ্বাদ যাত্ৰাই দেওবাৰে মৰিগাঁও জিলাখনৰ বিভিন্ন অঞ্চল পৰিভ্ৰমণ কৰাত সমৰ্থকসকলৰ মাজত ব্যাপক উৎসাহ-উদ্দীপনাৰ সৃষ্টি হয় । অৱশ্যে বিজেপিৰ এই জন আশীৰ্বাদ যাত্ৰা লাহৰীঘাটত উপস্থিত নোহোৱাত দলীয়ে কৰ্মীৰ মাজত প্ৰতিক্ৰিয়াৰ সৃষ্টি হৈছে ।

উল্লেখ্য় যে বিগত লোকসভাৰ নিৰ্বাচনত বিজেপি দলৰ প্ৰাৰ্থীগৰাকীয়ে লাহৰীঘাট সমষ্টিৰ পৰা প্ৰায় ৫৫ হেজাৰ ভোট লাভ কৰিছিল ।