অৱশেষত বিজেপি ত্য়াগ মন্ত্রী নন্দিতা গাৰ্লোছাৰ: সোমবাৰে হাফলঙৰ কংগ্ৰেছৰ প্ৰাৰ্থী হিচাপে দিব মনোনয়ন?

গুৱাহাটী : '২৬ৰ বিধানসভা নিৰ্বাচনত টিকট বঞ্চিত হোৱা কেবিনেট মন্ত্রী নন্দিতা গাৰ্লোছাই বহু জল্পনা-কল্পনাৰ অৱসান ঘটাই অৱশেষত দেওবাৰে নিশা কংগ্ৰেছ দলত যোগদান কৰে । সোমাবাৰ হৈছে মনোনয়ন দাখিলৰ অন্তিম দিন । তাৰ পূৰ্বে দেওবাৰে নিশা হাফলঙত মন্ত্রী নন্দিতা গাৰ্লোছাই কংগ্ৰেছ দলত যোগদান কৰে ।

বিগত কেইদিন ধৰি মন্ত্রীগৰাকীৰ কংগ্ৰেছত যোগদান কৰিব বুলি চৰ্চা চলি আহিছিল । আনকি গুৱাহাটীৰ ৰাজীৱ ভৱনত যোগদান কাৰ্যসূচীৰো আয়োজন কৰা হৈছিল । কিন্তু কিবা অংক নিমিলাৰ বাবে সেয়া হৈ উঠা নাছিল ।

অৱশেষত অংক মিলিল আৰু নন্দিতা গাৰ্লোছাই কংগ্ৰেছত যোগদান কৰিলে । সোমবাৰে কংগ্ৰেছ দলৰ প্ৰাৰ্থী হিচাপে মনোনয়ন দাখিল কৰিব পাৰে নন্দিতা গাৰ্লোছাই । হাফলং সমষ্টিৰ পৰা কংগ্ৰেছৰ প্ৰাৰ্থী হ'ব পাৰে নন্দিতা গাৰ্লোছা ।

অৱশ্যে কংগ্ৰেছ দলে দেওবাৰে ঘোষণা কৰা সাতজনীয়া অন্তিমখন প্ৰাৰ্থী তালিকাত হাফলং সমষ্টিৰ বাবে প্ৰাৰ্থী হিচাপে নিৰ্মল লাংথাছাৰ নাম ঘোষণা কৰিছিল । কিন্তু নিশাটোৰ ভিতৰতে খেল সলনি হোৱাত নামো সলনি হ'ব পাৰে ।

বিজেপিৰ পৰা টিকট নাপোৱা বাবেই কংগ্ৰেছৰ শৰণাপন্ন হৈছে নন্দিতা গাৰ্লোছা । তেনেস্থলত টিকটৰ অংক কৰিয়েই কংগ্ৰেছলৈ আহিছে । নন্দিতা গাৰ্লোছাই কংগ্ৰেছত যোগদান কৰাৰ কথা সদৰী কৰিছে প্ৰদেশ কংগ্ৰেছৰ মিডিয়া কোষৰ অধ্যক্ষ বেদব্ৰত বৰাই ।

উল্লেখ্য যে, মন্ত্ৰী নন্দিতা গাৰ্লোছাই ডিফুত নিৰ্মল লাংথাছাৰ বাসগৃহত কংগ্ৰেছ দলত আনুষ্ঠানিকভাৱে যোগদান কৰে । মন্ত্ৰী নন্দিতা গাৰ্লোচাৰ সোমবাৰে হাফলং সমষ্টিৰ বাবে কংগ্ৰেছ দলৰ পৰা মনোনয়ন দাখিল কৰাৰ সম্ভাৱনা আছে ।

পূৰ্বৰ তথ্য অনুসৰি, ২০২১ৰ নিৰ্বাচনত ভাৰতীয় জনতা পাৰ্টীৰ প্ৰাৰ্থী আছিল নন্দিতা গাৰ্লোছা । বিগত নিৰ্বাচনত ৬৭ হাজাৰ ৭৯৭টা ভোট লাভ কৰিছিল নন্দিতা গাৰ্লোছাই । ১৮ হাজাৰ ৫৯৮টা ভোটত জয়লাভ কৰিছিল নন্দিতা গাৰ্লোছাই ।