ভাৰত হিন্দু ৰাষ্ট্ৰ আৰু ইয়াৰ প্ৰধানমন্ত্রী সদায়েই এগৰাকী হিন্দু ব্যক্তি হ'ব...মুখ্যমন্ত্রীৰ এক মন্তব্যই গৰম কৰিছে ৰাজনীতি

গুৱাহাটী: "অখিল গগৈ ৰজা হৈ থাকক । মোৰ কোনো আপত্তি নাই । আমি প্ৰজা হৈ থাকিলে হ'ল । তেওঁ ৰজা হৈ থাকিলে ভাল আৰু আমি প্ৰজা হৈ থাকিলে ভাল ।"-এই মন্তব্য মুখ্যমন্ত্রী হিমন্ত বিশ্ব শৰ্মাৰ । বিধায়ক অখিল গগৈয়ে নিজকে উজনিৰ ৰজা বুলি কোৱাৰ প্ৰসংগত শনিবাৰে গুৱাহাটীত সংবাদ মাধ্যমৰ আগত মুখ্যমন্ত্রীয়ে এনেদৰে প্ৰতিক্ৰিয়া ব্যক্ত কৰে ।

অখিল গগৈক কটাক্ষ কৰি মুখ্যমন্ত্রীয়ে কয়,"কেৱল অখিল গগৈয়ে যাতে ফেচবুক লাইভ কৰাটো এৰি নিদিয়ে । ৰাতি চাই ভাল লাগে । যোৱাকালি কৈছে তেওঁ ইংলেণ্ড, আমেৰিকাৰ পৰা উকিল আনিব । তেওঁ ইমানখিনিও নাজানে যে ইংলেণ্ড, আমেৰিকাৰ উকিলে ভাৰতৰ আদালতত থিয় হ'ব নোৱাৰে । আইনমতেই থিয় হ'ব নোৱাৰে । তেওঁৰ ইমানখিনিও জ্ঞান নাই । তেওঁ এণ্টাৰনেটইমেণ্ট দিয়ে । এণ্টাৰনেটইমেণ্ট লওক, ৰাতি শুনক, আৰাম পাব ।"

কংগ্ৰেছৰ যোগদান অভিযানৰ প্ৰসংগত মুখ্যমন্ত্রীয়ে কয়,"গৌৰৱ গগৈয়ে যিবোৰ মানুহক যোগদান কৰাই আছে, সেইবোৰ মানুহৰ নাম মই মোৰ ২৫ বছৰীয়া ৰাজনীতিত পোৱা নাই । এইবোৰ প্ৰকৃততে নাটক । অসমৰ কি হ'বলগীয়া আছে সেইটো জনতাই কৈ দিছে । ইয়াৰ আগে-পিছে একো নাই । সেইটো অধ্যায় এতিয়া বন্ধ । মানুহে মন স্থিৰ কৰি লৈছে যে কাক ভোট দিব লাগে আৰু কাক দিব নালাগে ।"

ইফালে আছাউদ্দিন ওৱেইছিৱে কৰা মন্তব্যৰ প্ৰসংগত মুখ্যমন্ত্রীয়ে কয়,"দেশৰ প্ৰধানমন্ত্রী হোৱাৰ ক্ষেত্রত সাংবিধানিকভাৱে কোনো বাধা নাই । যিকোনো ভাৰতীয় লোক প্ৰধানমন্ত্রী হ'ব পাৰে । কিন্তু ভাৰতবৰ্ষ এখন হিন্দু ৰাষ্ট্ৰ । হিন্দু সভ্যতাৰ ৰাষ্ট্ৰ । সেয়ে আমি সদায়ে বিশ্বাস কৰো আৰু দৃঢ়তাৰে ক'ব পাৰো যে ভাৰতৰ প্ৰধানমন্ত্রী সদায়ে এগৰাকী হিন্দু ব্যক্তি হ'ব ।"

উল্লেখ্য যে মহাৰাষ্ট্ৰৰ এখন প্ৰচাৰ সভাত এ আই এম আই এমৰ মুৰব্বী আছাউদ্দিন ওৱেইছিয়ে সংবিধানৰ উৰ্দ্ধৃতৰে কৈছিল যে এনে এটা দিন আহিব যিদিনা হিজাব পিন্ধা কন্যা এই দেশৰ প্ৰধানমন্ত্রী হ'ব । ওৱেইছিৰ এনে মন্তব্যৰ প্ৰতিক্ৰিয়া প্ৰকাশ কৰি মুখ্যমন্ত্রীয়ে এনেদৰে কয় ।

ইফালে নিযুক্তিৰ প্ৰসংগত মুখ্যমন্ত্রীয়ে কয়,"আজি আমাৰ নিযুক্তি প্ৰক্ৰিয়াই ১.৫৬ লাখত ভৰি দিলে আৰু কেইবাটাও বিভাগৰ নিযুক্তি বাকী আছে এতিয়াও । পৰ্যায়ক্ৰমে ১০ ফেব্ৰুৱাৰীৰ পূৰ্বে গোটেই নিযুক্তিখিনি সমাপন কৰিম । আমি কোনো গোচৰ নোহোৱাকৈ এক লাখৰ ঠাইত ১.৬০ হাজাৰ নিযুক্তি দিবলৈ সক্ষম হৈছোঁ । এইটো যোৱা পাঁচ বছৰৰ এটা ডাঙৰ প্ৰাপ্তি । গোটেই নিযুক্তিখিনি হ'লে ১ লাখ ৭০ হাজাৰ নাইবা ১ লাখ ৭৫ হাজাৰ হ'ব । ইয়াত ঠিকাভিত্তিকখিনি অহা নাই । আমাৰ এই মডেলটো বিভিন্ন ৰাজ্যই গ্ৰহণ কৰিছে । এ ডি আৰ ইৰ তৃতীয় ফেজ নিৰ্বাচনৰ পাছত হ'ব ।"