অসমৰ পৰা ৰাজ্যসভা নিৰ্বাচনত বিজেপিৰ প্ৰাৰ্থী হ'ব মহন-গোৱালা : ৰাষ্ট্ৰীয় সভাপতি নীতিন নবীনক বিহাৰৰ পৰা প্ৰাৰ্থিত্ব

হায়দৰাবাদ : বিজেপিয়ে ঘোষণা কৰিলে ৰাজ্যসভাৰ অসমৰ দুখন আসনৰ বাবে প্ৰাৰ্থীৰ নাম । এজন হ’ল তেৰছ গোৱালা আনজন হ’ল যোগেন মহন ৷ এই ঘোষণাৰ লগে লগে এটা কথা নিশ্চিত হ'ল যে আগন্তুক বিধানসভা নিৰ্বাচনত দুলিয়াজান আৰু মাহমৰা সমষ্টিৰ পৰা বিজেপিয়ে নতুন মুখক প্ৰাৰ্থিত্ব দিব ৷ উল্লেখ্য় যে বৰ্তমান মন্ত্ৰী যোগেন মহন মাহমৰা সমষ্টিৰ আৰু তেৰছ গোৱালা দুলিয়াজান সমষ্টিৰ বিধায়ক হৈ আছে ৷

উল্লেখ্য যে, মঙলবাৰে ভাৰতীয় জনতা পাৰ্টীয়ে অসম, বিহাৰ, ছত্তীশগড়, হাৰিয়ানা, ওড়িশা আৰু পশ্চিম বংগৰ ৰাজ্যসভাৰ প্ৰাৰ্থীৰ নাম ঘোষণা কৰে । সেই অনুসৰি, বিহাৰৰ পৰা ৰাজ্যসভাৰ বাবে মনোনীত হৈছে দলৰ নতুন সভাপতি নীতিন নবীন । নীতিন নবীনৰ লগতে গেৰুৱা দলটোৱে বিহাৰৰ পৰা শিৱেশ কুমাৰকো প্ৰক্ষেপ কৰিছে ৷

বংগৰ কথা ক’বলৈ গ’লে গেৰুৱা দলটোৱে বিজেপিৰ প্ৰাক্তন সভাপতি ৰাহুল সিনহাক ৰাজ্যসভাৰ প্ৰাৰ্থীৰূপে ঘোষণা কৰিছে । ২০১২ চনৰ পৰা ২০১৫ চনলৈ ৰাহুল সিনহা পশ্চিম বংগ বিজেপিৰ সভাপতি আছিল । তেওঁৰ নেতৃত্বত ২০১৩ আৰু ২০১৪ চনত পশ্চিম বংগত পঞ্চায়ত নিৰ্বাচনত দলটোৱে প্ৰতিদ্বন্দ্বিতা কৰিছিল ।

আনহাতে বিজেপি শাসিত ছত্তীশগড়ত দলটোৰ ৰাজ্যিক বিজেপিৰ উপ-সভাপতি লক্ষ্মী বাৰ্মাক প্ৰাৰ্থী হিচাপে ঘোষণা কৰিছে ৷ লগতে ওড়িশাৰ পৰা প্ৰাৰ্থী হিচাপে ঘোষণা কৰা হৈছে বিজেপি নেতা সুজিত কুমাৰ আৰু মনমোহন ছামালক ৷

ইফালে লোকসভাৰ প্ৰাক্তন সাংসদ সঞ্জয় ভাটিয়াক হাৰিয়ানাত প্ৰাৰ্থিত্ব দিয়া হৈছে ।

বিজেপিয়ে ঘোষণা কৰা দলটোৰ ন গৰাকী প্ৰাৰ্থী হ'ল -

অসম :

1. যোগেন মহন
2. তেৰছ গোৱালা

বিহাৰ :

1. নীতিন নবীন
2. শিৱেশ কুমাৰ

ছত্তীশগড়

1. লক্ষ্মী বাৰ্মা

হাৰিয়ানা :

1. সঞ্জয় ভাটিয়া

ওড়িশা :

1. সুজিত কুমাৰ
2. মনমোহন ছামাল

পশ্চিম বংগ :

1. ৰাহুল সিনহা