মুকাভিনয়, দেৱাল অংকন, নিৰ্বাচনী বিহুগীতেৰে যুৱ ভোটাৰক আকৰ্ষণৰ চেষ্টা
মৰিগাঁও জিলা প্ৰশাসনে ‘অমূল্য’ শীৰ্ষক এটি শুভংকৰ আৰু ‘আমাৰ ভোট অমূল্য ভোট’ শীৰ্ষক প্ৰচাৰ বাক্যৰে নৱপ্ৰজন্মৰ ভোটাৰক আকৰ্ষণ কৰিবলৈ চেষ্টা কৰি আহিছে ৷
Published : March 26, 2026 at 8:11 PM IST
মৰিগাঁও: মৰিগাঁৱত ভোটাৰৰ প্ৰণালীবদ্ধ শিক্ষা আৰু নিৰ্বাচনী অংশগ্ৰহণ চমুকৈ স্বীপ কোষৰ উদ্যোগত ভোটাৰৰ মাজত ব্যাপক সজাগতা কাৰ্যসূচী অব্যাহত আছে । এজনো যোগ্য নাগৰিক যাতে এই বৃহৎ গণতান্ত্ৰিক প্ৰক্ৰিয়াৰ পৰা বাদ নপৰে, সেয়া সুনিশ্চিত কৰাৰ বাবে বিভিন্ন কাৰ্যসূচী ৰূপায়ণ কৰা হৈছে ।
ভোটাৰসকলক আকৰ্ষিত কৰি ভোটদানৰ হাৰ বৃদ্ধি কৰাৰ বাবে অলপতে 'অমূল্য' শীৰ্ষক এটি শুভংকৰ মুকলি কৰা হয় । লগতে "আমাৰ ভোট অমূল্য ভোট" শীৰ্ষক প্ৰচাৰ বাক্য, প্ৰতীকচিহ্ন আৰু নিৰ্বাচনী গীত মুকলি কৰা হয় । স্বীপ কোষৰ উদ্যোগত নিৰ্বাচনী বিহুগীত মুকলি কৰি সজাগতা সৃষ্টিৰ প্ৰয়াস কৰা হৈছে ।
তদুপৰি সংগীত নাটক অকাডেমী বঁটাপ্ৰাপক তথা উত্তৰ-পূৰ্বাঞ্চলত মুকাভিনয়ৰ পথ প্ৰদৰ্শকস্বৰূপ মইনুল হকৰ মুকাভিনয়েৰে ভোটাৰ সজাগতা অভিযান চলোৱা হৈছে । জাগীৰোড বিধানসভা সমষ্টিৰ ১০৯ বছৰীয়া সৰুমলা মেধিয়ে তৃণমূল পৰ্যায়ৰ প্ৰচাৰ আইকন হিচাপে সকলোকে ভোটদানৰ বাবে আহ্বান জনায় । ইয়াৰোপৰি স্বীপ কোষৰ উদ্যোগত বলীউডৰ জনপ্ৰিয় ছবিৰ সংলাপ ব্যৱহাৰ কৰি সজাগতা সৃষ্টিৰ প্ৰয়াস কৰা হৈছে ।
ভোটদাতাসকলৰ মাজত সজাগতা সৃষ্টিৰ বাবে 'গণতন্ত্ৰ বজাৰ' শিৰোনামেৰে বজাৰসমূহত ব্যৱসায়ী আৰু ৰাইজৰ মাজত গণতন্ত্ৰৰ বাৰ্তা বিলাই দিয়াৰ প্ৰয়াস অব্যাহত আছে । লগতে স্বীপ কোষৰ উদ্যোগত সমাজ কল্যাণ বিভাগৰ দ্বাৰা ভোটদানৰ বাবে সজাগতা অভিযান চলোৱা হৈছে । মহাবিদ্যালয়সমূহত ছাত্ৰ-ছাত্ৰীসকলকো ভোটদানৰ প্ৰতি সজাগ কৰাৰ প্ৰয়াস কৰা হৈছে ।
আনহাতে একেটা উদ্দেশ্যৰে ২৭ মাৰ্চ অৰ্থাৎ শুকুৰবাৰে বাতৰি পৰিৱেশন প্ৰতিযোগিতাৰো আয়োজন কৰা হৈছে । তদুপৰি বিশ্ব জল দিৱসত পানী যোগান আঁচনিসমূহৰ সৈতে ৰাইজৰ দ্বাৰা ভোটাৰ সজাগতাৰ বাবে ভোটদানৰ বাবে সমূহীয়া সংকল্প গ্ৰহণৰ কাৰ্যসূচী ৰূপায়ণ কৰা হয় । 'গণতন্ত্ৰৰ দেৱাল' শিৰোনামেৰে জিলা আয়ুক্তৰ কাৰ্যালয় চৌহদ আৰু বিভিন্ন ঠাইত দেৱাল অংকন কৰিও সজাগতা সৃষ্টিৰ প্ৰয়াস কৰা হৈছে ।
উল্লেখ্য যে, ৯ এপ্ৰিলত অসমত এটা পৰ্যায়ত অসম বিধানসভাৰ নিৰ্বাচন অনুষ্ঠিত হ'ব । যাক কেন্দ্ৰ কৰি মৰিগাঁও জিলা প্ৰশাসনে যুদ্ধংদেহী প্ৰস্তুতি অব্যাহত ৰাখিছে ৷
লগতে পঢ়ক: মহানন্দ সৰকাৰে ২ কোটিত টিকট লৈ ৫ কোটিত বিক্ৰী কৰিছে : বৰপেটাত বিস্ফোৰক অভিযোগ টিকট বঞ্চিত কংগ্ৰেছীৰ
