১৯৭১ চনত বঙালী হিন্দুৰ ওপৰত পাকিস্তানে চলোৱা অত্যাচাৰক গণহত্যা ঘোষণাৰ দাবী সাংসদ গ্ৰেগ লেণ্ডছমেনৰ

ৱাশ্চিংটন: ১৯৭১ চনৰ ২৫ মাৰ্চত পাকিস্তানী সেনা আৰু জামাত-ই-ইছলামীয়ে বঙালী হিন্দুসকলৰ ওপৰত কৰা অত্যাচাৰক যুদ্ধজনিত অপৰাধ আৰু গণহত্যা বুলি গৰিহণা দিয়াৰ দাবী তুলি আমেৰিকাৰ সাংসদ গ্ৰেগ লেণ্ডছমেনে দেশখনৰ প্ৰতিনিধি সদনত এক প্ৰস্তাৱ উত্থাপন কৰিছে ।

শুকুৰবাৰে অহাইঅ’ৰ ডেম’ক্ৰেটিক দলৰ সাংসদ লেণ্ডছমেনে আমেৰিকাৰ প্ৰতিনিধি সদনত এই প্ৰস্তাৱ উত্থাপন কৰে ৷ পৰৱৰ্তী সময়ত প্ৰস্তাৱটো বৈদেশিক পৰিক্ৰমা মন্ত্ৰালয়লৈ প্ৰেৰণ কৰা হয় ।

১৯৭১ চনৰ ২৫ মাৰ্চৰ নিশা পাকিস্তান চৰকাৰে শ্বেখ মুজিবুৰ ৰহমানক বন্দী কৰে আৰু তেওঁৰ সামৰিক সংগঠনসমূহে জামাত-ই-ইছলামীৰ মতাদৰ্শৰ দ্বাৰা অনুপ্ৰাণিত অন্যান্য উগ্ৰ ইছলামিক সংগঠনসমূহৰ সৈতে মিলি সমগ্ৰ পূব পাকিস্তানত ‘‘অপাৰেশ্বন চাৰ্চলাইট’’ নামেৰে এক বৃহৎ অভিযান আৰম্ভ কৰে ৷ এই অভিযানত এক বিস্তৃত পৰিসৰত বহু সাধাৰণ নাগৰিকে প্ৰাণ হেৰুৱাই বুলি প্ৰস্তাৱটোত উল্লেখ কৰা হৈছে ৷

প্ৰস্তাৱটোত উল্লেখ কৰা হৈছে যে ১৯৭১ চনৰ ২৮ মাৰ্চত ঢাকাত থকা আমেৰিকাৰ কনছুল জেনেৰেল আৰ্চাৰ ব্লাডে ৱাশ্বিংটনলৈ ‘‘নিৰ্বাচিত গণহত্যা’’ শীৰ্ষক এক পত্ৰ প্ৰেৰণ কৰিছিল ৷ এই পত্ৰত তেওঁ লিখিছিল, ‘‘পাক সামৰিক বাহিনীৰ সমৰ্থনমৰ্মে অনা-বঙালী মুছলমানসকলে পৰিকল্পিতভাৱে দৰিদ্ৰ লোকে বাস কৰা অঞ্চলসমূহত আক্ৰমণ কৰি বহুসংখ্যক বঙালী আৰু হিন্দু লোকক হত্যা কৰিছিল ।’’

লেণ্ডছমেনে লক্ষ্য কৰিছিল যে ১৯৭১ চনৰ ৬ এপ্ৰিলত ‘‘ব্লাড টেলিগ্ৰাম’’ নামেৰে পৰিচিত হোৱা কনছুল জেনেৰেল ব্লাডে এই সংঘাতৰ ওপৰত আমেৰিকা চৰকাৰৰ আনুষ্ঠানিক মৌনতাৰ বিৰুদ্ধে আপত্তি দৰ্শাইছিল, য’ত ঢাকাৰ কনছুলেট জেনেৰেলৰ ২০ জন সদস্যৰ স্বাক্ষৰ আছিল ।

তেতিয়াৰ কূটনীতিবিদগৰাকীয়ে বিষয়টো সন্দৰ্ভত টেলিগ্ৰামযোগে এনেদৰে কয়, ‘‘আমি নৈতিকভাৱেও হস্তক্ষেপ নকৰাৰ সিদ্ধান্ত লৈছো ৷ কাৰণ সেয়া এখন সম্পূৰ্ণৰূপে সাৰ্বভৌম ৰাষ্ট্ৰৰ আভ্যন্তৰীণ বিষয় ৷’’ - লেণ্ডছমেনে উত্থাপন কৰা প্ৰস্তাৱটোত ১৯৭১ চনৰ ২৫ মাৰ্চত পাকিস্তানী সশস্ত্ৰ বাহিনীয়ে বাংলাদেশৰ জনসাধাৰণৰ ওপৰত কৰা অত্যাচাৰক গৰিহণা দিবলৈ প্ৰতিনিধি সদনক আহ্বান জনাই এনেদৰে কয় ৷

পাকিস্তানী সেনা আৰু ইয়াৰ ইছলামিক মিত্ৰসকলে ধৰ্ম আৰু লিংগ নিৰ্বিশেষে জনগোষ্ঠীয় বঙালীসকলৰ মাজত নিৰ্বিচাৰে গণহত্যা সংঘটিত কৰাতে ক্ষান্ত নাথাকি তেওঁলোকৰ ৰাজনৈতিক নেতা, বুদ্ধিজীৱী, পেছাদাৰী আৰু ছাত্ৰ-ছাত্ৰীসকলক হত্যা কৰাৰ লগতে হাজাৰ হাজাৰ মহিলাক যৌন দাসী হিচাপে সেৱা আগবঢ়াবলৈ বাধ্য কৰাইছিল বুলি প্ৰস্তাৱটোত উল্লেখ আছে ।

তদুপৰি ইয়াত উল্লেখ আছে যে তেওঁলোকে বিশেষভাৱে ধৰ্মীয় সংখ্যালঘু হিন্দুসকলক গণহত্যা, দলবদ্ধ ধৰ্ষণ, ধৰ্মান্তৰকৰণ আৰু বলপূৰ্বক বহিষ্কাৰৰ জৰিয়তে নিঃশেষ কৰাৰ লক্ষ্য বান্ধি লৈছিল ।

প্ৰস্তাৱটোত তেওঁলোকৰ সদস্যসকলে সংঘটিত কৰা অপৰাধৰ বাবে সমগ্ৰ জনগোষ্ঠী বা ধৰ্মীয় সম্প্ৰদায় দায়ী নহয় বুলি উল্লেখ কৰা হৈছে ৷ তদুপৰি ১৯৭১ চনৰ ভিতৰত পাকিস্তানৰ সশস্ত্ৰ বাহিনী আৰু জামাত-ই-ইছলামীয়ে বঙালী হিন্দুসকলৰ ওপৰত কৰা অত্যাচাৰক মানৱতাৰ বিৰুদ্ধে অপৰাধ, যুদ্ধজনিত অপৰাধ আৰু গণহত্যা ৰূপে স্বীকৃতি দিবলৈ আমেৰিকাৰ ৰাষ্ট্ৰপতিক আহ্বান জনোৱা হৈছে ৷

লগতে পঢ়ক: ৪৮ ঘণ্টাৰ ভিতৰত হৰমুজ প্ৰণালী মুকলি নকৰিলে ইৰাণৰ শক্তিকেন্দ্ৰত আক্ৰমণ চলাব আমেৰিকাই: ট্ৰাম্পৰ সকীয়নি