হিমন্ত বিশ্ব শৰ্মাৰ মন্তব্যত উত্তেজিত বাংলাদেশ: ঢাকাই মাতি নি জবাবদিহি কৰিলে ভাৰতীয় উচ্চায়ুক্তক

ঢাকা: "২০ জন বাংলাদেশী নাগৰিকক অসমত গ্ৰেপ্তাৰ কৰা হৈছে আৰু পিছত তেওঁলোকক বাংলাদেশলৈ ঘূৰাই পঠিওৱা হৈছে ৷" অসমৰ মুখ্যমন্ত্ৰী ডঃ হিমন্ত বিশ্ব শৰ্মাৰ এই বক্তব্যই সম্প্ৰতি উত্তেজিত কৰিছে বাংলাদেশক ৷ অসমৰ মুখ্যমন্ত্ৰী শৰ্মাই শেহতীয়াকৈ বাংলাদেশী নাগৰিক সন্দৰ্ভত কৰা মন্তব্যৰ আনুষ্ঠানিক বিৰোধিতা প্ৰদৰ্শন কৰি বাংলাদেশস্থিত ভাৰতীয় উচ্চায়ুক্ত পৱন বাধেক দেশখনৰ বৈদেশিক পৰিক্ৰমা মন্ত্ৰালয়লৈ মাতি আনিছে চৰকাৰে ।

ঢাকা ট্ৰিবিউনত প্ৰকাশিত এক প্ৰতিবেদন অনুসৰি, অসমৰ পৰা বাংলাদেশী লোকসকলক বিতাড়ন কৰাৰ সৈতে জড়িত এই মন্তব্যৰ পিছতে কূটনৈতিক হস্তক্ষেপ গ্ৰহণ কৰা হৈছে ।

বৃহস্পতিবাৰে বিয়লি বাংলাদেশস্থিত ভাৰতৰ ৰাষ্ট্ৰদূতগৰাকীক বাংলাদেশ চৰকাৰে মাতি আনি আনুষ্ঠানিকভাৱে এই কথাৰ প্ৰতিবাদ সাব্যস্ত কৰে ।

ঢাকাই শেহতীয়া ৰাজহুৱা আলোচনাৰ প্ৰকৃতি সন্দৰ্ভত উদ্বেগ প্ৰকাশ কৰি দ্বিপাক্ষিক সম্পৰ্কৰ ক্ষতি কৰিব পৰা মন্তব্য এৰাই চলাৰ প্ৰয়োজনীয়তাৰ ওপৰত গুৰুত্ব আৰোপ কৰে । উল্লেখ্য যে, বিগত ২৬ এপ্ৰিলত অসমৰ মুখ্যমন্ত্ৰী ডঃ হিমন্ত বিশ্ব শৰ্মাই প্ৰদান কৰা ভাষণৰ পিছৰে পৰা এই কূটনৈতিক উত্তেজনাৰ সৃষ্টি হৈছিল ৷ মুখ্যমন্ত্ৰীগৰাকীয়ে কৈছিল যে ২০ জন বাংলাদেশী নাগৰিকক অসমত গ্ৰেপ্তাৰ কৰা হৈছে আৰু পিছত তেওঁলোকক বাংলাদেশলৈ ঘূৰাই পঠিওৱা হৈছিল ।

সংবাদ মাধ্যমৰ বাতৰিৰ উদ্ধৃতিৰে সামাজিক মাধ্যমৰ প্লেটফৰ্ম এক্সত শ্বেয়াৰ কৰা এটা পোষ্টত মুখ্যমন্ত্ৰীয়ে ডঃ শৰ্মাই কয়, "অভদ্ৰ মানুহে সৰলতাৰ ভাষা বুজি নাপায় । অসমৰ পৰা ঘূৰি নোযোৱা অনুপ্ৰৱেশকাৰীক বহিষ্কাৰ কৰাৰ সময়ত বাৰে বাৰে এই দূৰদৰ্শী কথাষাৰ আমাৰ মনত আহে । উদাহৰণস্বৰূপে, যোৱানিশা খেদি পঠিওৱা এই ২০ জন অবৈধ বাংলাদেশী ।"

বাংলাদেশে কয় যে এনে ৰাজহুৱা মন্তব্য ক্ষতিকাৰক আৰু চুবুৰীয়া দেশ দুখনৰ মাজৰ সম্পৰ্কত যতি পৰিব পাৰে । ঢাকা ট্ৰিবিউনৰ মতে, বৈদেশিক মন্ত্ৰালয়ে দুয়োখন দেশৰ মাজত সহযোগিতাৰ মনোভাৱ বজাই ৰাখিবলৈ স্পৰ্শকাতৰ দ্বিপাক্ষিক বিষয়সমূহৰ সৈতে মোকাবিলা কৰাৰ লগতে সংযম প্ৰয়োগ কৰাৰ বিষয়ত গুৰুত্ব আৰোপ কৰে ।

১৯৭১ চনৰ মুক্তিযুদ্ধৰ পৰা উদ্ভৱ হোৱা ঐতিহাসিক, সাংস্কৃতিক আৰু নিৰাপত্তা সহযোগিতাৰ এক শক্তিশালী ভেটিৰ দ্বাৰা সংজ্ঞায়িত ভাৰত-বাংলাদেশৰ মাজৰ সম্পৰ্কৰ সৈতে জড়িত হৈ থকাৰ সময়তে এই কথা উত্থাপন হয় ৷

দুয়োখন দেশেই নিজৰ দীৰ্ঘদিনীয়া মিত্ৰতাৰ মূল নীতিসমূহ বজাই ৰাখি এই সংবেদনশীল বিষয়সমূহ সমাধানৰ বাবে উচ্চ পৰ্যায়ৰ বৈঠকত মিলিত হৈছে ।

লগতে পঢ়ক: ট্ৰাম্পৰ অৱৰোধৰ সতৰ্কবাণীৰ প্ৰভাৱ: তেলৰ মূল্য চাৰি বছৰৰ সৰ্বোচ্চ, শ্বেয়াৰ বজাৰৰ পতন