পাক সেনাৰ ১৭টা চকী দখল কৰি ৪০ জন জোৱানক নিহত কৰাৰ দাবী আফগান যোদ্ধাৰ

কাবুল (আফগানিস্তান): আফগানিস্তান আৰু পাকিস্তান সীমান্তত দুয়োখন দেশৰ মাজত চলিছে তয়াময়া ৰণ । আফগান তালিবানে সীমান্তত সংঘটিত কৰা আক্ৰমণৰ প্ৰতিশোধমূলক অভিযান হিচাপে পাকিস্তানে আৰম্ভ কৰিছে 'অপাৰেচন গাজাব লিল হক' ।

এই অভিযানত পাক সেনাই ১৩০ জনতকৈ অধিক তালিবান যোদ্ধাক হত্যা কৰা বুলি দাবী কৰাৰ বিপৰীতে পাকিস্তানৰ বিমান আক্ৰমণৰ প্ৰতিশোধ হিচাপে কেইবাটাও পাক সেনা চকী দখল কৰাৰ দাবী কৰিছে আফগান বাহিনীয়ে । বৃহস্পতিবাৰে পাকিস্তানৰ বিৰুদ্ধে তালিবানে এই প্ৰত্য়াক্ৰমণ আৰম্ভ কৰে ।

পাকিস্তান চৰকাৰে বৃহস্পতিবাৰে সীমান্তত সংঘৰ্ষ সংঘটিত হোৱা বুলি নিশ্চিত কৰিছে যদিও আফগানিস্তানে সেনা চকী দখল কৰাৰ দাবীৰ কোনো তৎক্ষণিক প্ৰতিক্ৰিয়া প্ৰকাশ কৰা নাই । বৃহস্পতিবাৰে আফগান আক্ৰমণক অপ্ৰৰোচিত বুলি অভিহিত কৰিছে পাক চৰকাৰে ।

পূব আফগানিস্তানত শেহতীয়াকৈ পাকিস্তানী সেনাবাহিনীয়ে কৰা বিমান আক্ৰমণৰ প্ৰতিক্ৰিয়া প্ৰকাশ কৰিছে ইষ্টাৰ্ণ আফগানিস্তান মিলিটাৰী কৰ্পছে । এক বিবৃতিত ইষ্টাৰ্ণ আফগানিস্তান মিলিটাৰী কৰ্পছে বৃহস্পতিবাৰে নিশা তুমুল সংঘৰ্ষ সংঘটিত হোৱা বুলি উল্লেখ কৰিছে ।

আফগান চৰকাৰৰ মুখপাত্ৰ জাবিহুল্লাহ মুজাহিদে বৃহস্পতিবাৰে নিশা এক পোষ্টত কয় যে পাকিস্তানী সেনাই সঘনাই কৰা আক্ৰমণৰ প্ৰত্য়ুত্তৰ দিছে তালিবানী যোদ্ধাই । ডুৰাণ্ড লাইনৰ সমীপৰ পাকিস্তানৰ সামৰিক ঘাটি আৰু সামৰিক ইনষ্টলেশ্যনত বৃহৎ পৰিসৰৰ আক্ৰমণ সংঘটিত হোৱা বুলি এই পোষ্টটোত উল্লেখ কৰা হৈছে ।

উল্লেখ্য় যে দুয়োখন দেশৰ ২৬১১ কিলোমিটাৰ (১৬২২ মাইল) দৈৰ্ঘ্যৰ এই সীমান্তক ডুৰাণ্ড লাইন বুলি জনা যায় । অৱশ্য়ে আফগানিস্তানে এই লাইনক আনুষ্ঠানিকভাৱে স্বীকৃতি প্ৰদান কৰা নাই । আফগান প্ৰতিৰক্ষা মন্ত্ৰালয়ে কয় যে সীমান্তৰ পাঁচখন প্ৰদেশত প্ৰত্য়াক্ৰমণ সংঘটিত হৈছে ।

পাকিস্তানী সেনাৰ ১৭টা চকী দখল কৰি ৪০ জন জোৱানক নিহত কৰা বুলি আফগানিস্তানে দাবী কৰিছে । ইয়াৰে ১৩ জনৰ মৃতদেহ আফগানিস্তানলৈ ঘূৰাই অনা হয় বুলিও আফগানিস্তানে দাবী কৰিছে ।

চৰকাৰী মুখপাত্ৰ মুজাহিদে এক্স-পোষ্টত উল্লেখ কৰা মতে, একাংশ পাকিস্তানী জোৱানক জীৱিত অৱস্থাত বন্দী কৰা হৈছে । আনহাতে, হতাহতি বা বন্দী জোৱানৰ দাবী সন্দৰ্ভত পাকিস্তানৰ পৰা কোনো আনুষ্ঠানিক বিবৃতি দিয়া হোৱা নাই ।

ইয়াৰ বিপৰীতে পাকিস্তানৰ তথ্য মন্ত্ৰালয়ে এক্সত পোষ্ট কৰি কয় যে আফগানিস্তানে খাইবাৰ পখতুনখোৱা প্ৰদেশৰ পাকিস্তান-আফগানিস্তান সীমান্তৰ কেইবাটাও স্থানত অপ্ৰৰোচিত গুলীচালনা কৰিছে । পাকিস্তানৰ নিৰাপত্তা বাহিনীয়ে এই কাৰ্যৰ তীব্ৰ প্ৰত্য়ুত্তৰ দিয়ে ।

এই বিবৃতিটোত কোৱা হৈছে যে প্ৰাৰম্ভিক বাতৰি অনুসৰি আফগান বাহিনীয়ে যথেষ্ট ক্ষতিগ্ৰস্ত হোৱাৰ লগতে কেইবাটাও পোষ্ট আৰু সামৰিক সঁজুলি ধ্বংস হৈছে । পাকিস্তানে নিজৰ ভূখণ্ডৰ অখণ্ডতা আৰু নাগৰিকৰ সুৰক্ষা নিশ্চিত কৰাৰ বাবে প্ৰয়োজনীয় সকলো পদক্ষেপ গ্ৰহণ কৰিব বুলি বিবৃতিটোত উল্লেখ কৰা হৈছে । আফগান সেনাই নিশা চলাচল কৰা সামৰিক বাহন আৰু প্ৰচণ্ড বন্দুকৰ গুলীৰ ভিডিঅ’ ফুটেজ প্ৰকাশ কৰিছে ।

উল্লেখ্য় যে কেইবামাহ ধৰি দুয়োখন চুবুৰীয়া ৰাষ্ট্ৰৰ মাজত সীমান্তত উত্তেজনা অব্য়াহত আছে । যোৱা অক্টোবৰত সীমান্তত সংঘটিত সংঘৰ্ষত কেইবা ডজন সৈনিক, সাধাৰণ নাগৰিক আৰু সন্দেহযুক্ত উগ্ৰপন্থীৰ মৃত্যু হৈছে । কাবুলত বোমা বিস্ফোৰণৰ পিছতে এই হিংসাত্মক ঘটনা সংঘটিত হয় ।

এই ঘটনাত আফগান বিষয়াসকলে পাকিস্তানক দোষাৰোপ কৰে । সেই সময়ত পাকিস্তানে আফগানিস্তানত উগ্ৰপন্থীৰ আত্মগোপন স্থানক লক্ষ্য কৰি আক্ৰমণ চলাইছিল । পিছত কাটাৰে যুদ্ধবিৰতিৰ হস্তক্ষেপ কৰে যদিও এতিয়াও গুলীচালনা অব্যাহত আছে।

যোৱা দেওবাৰে পাকিস্তানৰ সেনাই আফগানিস্তানৰ সীমান্তৰ সিপাৰে আক্ৰমণ চলাই কমেও ৭০জন উগ্ৰপন্থীক হত্যা কৰা বুলি দাবী কৰিছিল । পাকিস্তানৰ এই দাবী আফগানিস্তানে অস্বীকাৰ কৰি কয় যে মহিলা আৰু শিশুকে ধৰি কেইবা ডজন সাধাৰণ নাগৰিকৰ মৃত্যু হৈছে ।

প্ৰতিৰক্ষা মন্ত্ৰালয়ে কয় যে পাকিস্তানে এই আক্ৰমণত পূব আফগানিস্তানৰ বিভিন্ন আৱাসিক এলেকাকে ধৰি এখন মাদ্ৰাছা আৰু কেইবাটাও ঘৰ লক্ষ্য় কৰি লয় । পাকিস্তানৰ এই আক্ৰমণে আফগান আকাশমাৰ্গ আৰু সাৰ্বভৌমত্ব উলংঘা কৰা বুলি মন্ত্ৰালয়ে কয় ।