ফাকুৱাৰ সময়ছোৱাত ৰুক্ষতা, মৰি যোৱা ছাল আদিৰ পৰা কেনেকৈ আপোনাৰ ছালখনক সুৰক্ষিত কৰি ৰাখিব, জানো আহক...

মঙলবাৰৰ পৰা আৰম্ভ হৈছে ৰঙৰ উৎসৱ ফাকুৱা । ৰাজ্যজুৰি ৰঙৰ উৎসৱ ফাকুৱাক লৈ ব্যাপক উৎসাহ-উদ্দীপনা দেখা গৈছে । হিন্দু ধর্মৰ এটা অতি পবিত্ৰ উৎসৱ ফাকুৱা । এই ফাকুৱাৰ দিনত প্ৰথমে ভগৱান শ্ৰীকৃষ্ণৰ চৰণত ফাকুৱা দিয়াৰ পাছত ইজনে-সিজনক প্ৰেম আৰু ভাতৃত্ববোধৰ এনাজৰীডাল কটকটীয়া কৰাৰ উদ্দেশ্যেৰে ফাকুৱা খেলা হয় ।

অৱশ্যে এই ফাকুৱাৰ ৰং বহুতে ভয় কৰা দেখা যায় । কিন্তু এই উৎসৱৰ আমাৰ ছাল-চুলিৰ সুন্দৰ্যৰ লগত এক বিশেষ সম্পৰ্ক আছে ।

যিহেতু এয়া ফাগুনৰ সময় । এই সময়ছোৱাত বতাহৰ বাবে ছালখন শুকান হৈ যায়, আনকি ছালত মৃতকোষৰ সৃষ্টি হয় । ফাকুৱা সময়ত আবিৰৰ ৰং গালত লগোৱাৰ ফলত এই সমূহ সমস্যা দূৰ হয় ।

আজিকালি বজাৰত উপলব্ধ অধিকাংশ আবিৰৰ গুৰিত বহু কেমিকেল মিহলি কৰা হয় ৷ কিন্তু পূৰ্বে কেমিকেলৰ সলনি আবিৰৰ গছ বা ফুলৰ গুৰি, শাকৰৰ গুৰিৰে ফাকুৱা আবিৰ প্ৰস্তুত কৰি এই উৎসৱ পালন কৰা হৈছিল । যিবোৰ মানৱ শৰীৰৰ বাবে প্ৰয়োজনীয় কিছুমান বনৌষধিযুক্ত আছিল ।

ফাকুৱাৰ সময়ছোৱাত কিদৰে আপোনাৰ ছালখনৰ যতন ল'ব ?

বৰ্তমান সময়ত যিহেতু বজাৰত ভিন্ন ধৰণৰ আবিৰৰ ৰং উপলব্ধ । ফাকু পাউদাৰৰ উপৰিও ভিন্ন ধৰণৰ জুলীয়া ৰঙো বজাৰত উপলব্ধ হৈছে । এই ফাকু ৰঙৰ পৰা ছালৰ বহুত ৰোগ হোৱা পৰিলক্ষিত হয়, সেয়ে এইসময়ছোৱাত ছালৰ যতন লোৱাটো অতি আৱশ্যক ।

সৌন্দৰ্য বিশেষজ্ঞা মালা মহন্তই উল্লেখ কৰা মতে, বৰ্তমান বজাৰত হাৰ্বেল ফাকুগুৰিও উপলব্ধ, সেয়ে কেমিকেলযুক্ত ফাকুগুৰিৰ সলনি হাৰ্বেল ফাকুগুৰি ব্যৱহাৰ কৰিব পৰা যায় । ইয়াৰোপৰি ঘৰুৱাভাৱেও ফাকুগুৰি প্ৰস্তুত কৰি ল’ব পৰা যায় ৷ হালধীয়া ৰঙৰ বাবে হালধি গুৰি, ৰঙা ৰঙৰ বাবে গোলাপ ফুলৰ পাহি শুকুৱাই গুৰি কৰি ল’ব পৰা যায় বুলিও তেওঁ কয় ।

ফাকুৱাৰ ৰঙৰ পৰা ছালখন বচাবলৈ কি কৰিব ?

সৌন্দৰ্য বিশেষজ্ঞা মালা মহন্তই কয়, ‘‘এপাহি সুগন্ধি গোলাপ ফুল, কেঁচা গাখীৰ, কাঠ বাদাম আৰু এলোভেৰা জেল ল’ব । প্ৰথমে গোলাপ ফুলটো ভালদৰে ধুই পাহিখিনি আঁতৰাই কেঁচা গাখীৰত তিয়াই থ’ব ৷ লগতে কেইটামান কাঠ বাদামো একেলগে তিয়াই থ’ব । এই সামগ্ৰীখিনিৰে এটা মিশ্ৰণ প্ৰস্তুত কৰি অকমান অলিভ অইল মিহলাই ফ্ৰীজিং কৰি থ’ব ৷ ফাকু খেলি ঘূৰি অহাৰ পাছত ভালদৰে মুখখন পানীৰে ধুই ২০ মিনিটৰ বাবে এই মিশ্ৰণটো মুখত লগাই থৈ দিব । ২০ মিনিটৰ পাছত ভালদৰে মুখখন ধুই মশ্বেইৰাইজাৰ লগাব ।’’

এনে কৰিলে মুখৰ ৰুক্ষতা নাইকিয়া হয় আৰু ছালৰ উজ্জ্বলতা বৃদ্ধি পায় ৷ লগতে ছালৰ সমস্যাও নাইকিয়া হয় ৷ উল্লেখিত মিশ্ৰণ লগালে ছালৰ বহু সমস্যাই নাইকিয়া হয় বুলি ই টিভি ভাৰতৰ আগত উল্লেখ কৰে সৌন্দৰ্য বিশেষজ্ঞা মালা মহন্তই ৷

গোলাপ ফুল, কেঁচা গাখীৰ, কাঠ বাদাম আৰু এলোভেৰা জেলৰ উপৰিও কেৱল তিঁয়হ আৰু এলোভেৰাৰ এটা মিশ্ৰণো লগাব পৰা যায় বুলিও কয় সৌন্দৰ্য বিশেষজ্ঞাগৰাকীয়ে ৷

তেওঁ কয়, ‘‘প্ৰথমে এটা কুমলীয়া তিঁয়হ ভালদৰে ধুই তাৰ ৰসখিনি উলিয়াই ল’ব লাগিব । তাৰ লগত এলোভেৰা জেলী মিহলি কৰি ফ্ৰিজিং কৰি থ’ব । ফাকুৱাৰ দিন কেইটাত ভালদৰেই মুখখন ধুই এই মিশ্ৰণটো ২০ মিনিট ছালত লগাই ৰাখিব । ২০ মিনিটৰ পাছত ভালদৰে মুখখন ধুই মশ্বেইৰাইজাৰ লগাব ।’’ এনে কৰিলেও ছালখন সুস্থ থাকে বুলি মন্তব্য কৰে সৌন্দৰ্য বিশেষজ্ঞা মালা মহন্তই ৷