আজিয়েই বিশেষজ্ঞৰ পৰা জানি লওক হৃদৰোগৰ পৰা নিজক কিদৰে বচাই ৰাখিব পাৰে

হৃদৰোগৰ সমস্যা সাম্প্ৰতিক সময়ত উদ্বেগজনক হাৰত বৃদ্ধি পাইছে ৷ কম বয়সীয়া লোকৰ ক্ষেত্ৰতো এতিয়া দেখা গৈছে হৃদৰোগৰ আশংকা ৷ শোকাৱহভাৱে বহু যুৱক-যুৱতী হাৰ্ট এটেক আৰু ষ্ট্ৰ’কত মৃত্যুমুখত পৰিছে ৷ বহুসময়ত হৃদযন্ত্ৰৰ অৱস্থাৰ বিষয়ে অজ্ঞাত হৈ থকাৰ বাবে সময়মতে চিকিৎসাৰ অভাৱত বহুলোকে অকালতে জীৱন হেৰুৱাবলগীয়া হয় ৷ হৃদৰোগৰ সমস্যা বৃদ্ধিৰ ক্ষেত্ৰত অস্বাস্থ্যকৰ জীৱনশৈলীয়ে আটাইতকৈ প্ৰধান ভূমিকা লয় ৷ অস্বাস্থ্যকৰ খাদ্যাভ্যাস, বেয়া টোপনি আৰু অত্যধিক মানসিক চাপৰ দৰে কাৰকেও হৃদযন্ত্ৰত নেতিবাচক প্ৰভাৱ পেলায় ৷

খাদ্যৰ পৰা আৰম্ভ কৰি ব্যায়ামলৈকে দৈনন্দিন জীৱনত কিছু সৰু সৰু পৰিৱৰ্তন সাধন কৰিলে হৃদযন্ত্ৰ সুস্থ কৰি ৰখাত সহায়ক হ’ব পাৰে ৷ আধুনিক জীৱনশৈলীত খাদ্য, মানসিক চাপ নিয়ন্ত্ৰণ, সুস্থ টোপনিৰ ধৰণ বজাই ৰখা আদি বিষয়বোৰ প্ৰায়ে উপেক্ষা কৰা হয় ৷ কিন্তু আপুনি সুস্থ হৈ থকাৰ বাবে খাদ্যৰ পৰা আৰম্ভ কৰি দৈনন্দিন কাম-কাজলৈকে সৰু সৰু কথাবোৰত মনোযোগ দিয়াটো অতি গুৰুত্বপূৰ্ণ ৷

প্ৰ’টিন আৰু ফাইবাৰ গ্ৰহণ

নতুন দিল্লীস্থিত এইমছৰ চিকিৎসক ডাঃ নম্ৰতা শৰ্মাই কয় যে, হৃদযন্ত্ৰ সুস্থ কৰি ৰাখিবলৈ কম চৰ্বি থকা প্ৰটিনযুক্ত খাদ্য গ্ৰহণ কৰিব লাগে ৷ এনে খাদ্যই স্বাস্থ্যসন্মত ওজন বজাই ৰখাত সহায় কৰে ৷ স্বাস্থ্যসন্মত ওজন হৃদযন্ত্ৰ সুস্থ কৰি ৰখাৰ বাবে অতি প্ৰয়োজনীয় ৷ সেয়ে খাদ্যত কণী, পনীৰ, দাইল, বীন, কম চৰ্বিযুক্ত দুগ্ধজাত সামগ্ৰী, মাছ আদি অন্তৰ্ভুক্ত কৰিব লাগে ৷

ইয়াৰ লগতে ফাইবাৰৰ বাবে সেউজীয়া শাক-পাচলি, বিভিন্ন ধৰণৰ ফাইবাৰযুক্ত ফল যেনে আপেল, নাচপতি, জামু, এভোকেডো, কল, মধুৰী, অমিতা আদি খাব লাগে ৷ এনে খাদ্যসমূহে দেহৰ বাবে প্ৰয়োজনীয়া আন আন পুষ্টিকৰ পদাৰ্থও সঠিক পৰিমাণে যোগান ধৰিব ৷

অধিক চৰ্বিযুক্ত খাদ্যৰ পৰা আঁতৰি থাকক

বিশেষজ্ঞসকলে কয় যে, হৃদযন্ত্ৰ সুস্থ কৰি ৰাখিবলৈ হ’লে অধিক চৰ্বিযুক্ত খাদ্য পৰিহাৰ কৰিব লাগে ৷ এনে খাদ্যসমূহে মেদবহুলতাত অৰিহণা যোগায় ৷ শৰীৰৰ অত্যধিক ওজনৰ ফলত ইনচুলিনৰ ভাৰসাম্যহীনতা হ’ব পাৰে, যাৰ ফলত ডায়েবেটিছ হ’ব পাৰে ৷ এই সমস্যা আপোনাৰ হৃদযন্ত্ৰৰ বাবে ক্ষতিকাৰক ৷

সঠিক ব্যায়াম

বিশেষজ্ঞসকলে কয় যে, যেতিয়া হৃদযন্ত্ৰৰ উপকাৰৰ বাবে আমি অতি সহজ ব্যায়ামৰ অভ্যাস কৰা উচিত ৷ অনুলোম বিলোম প্ৰাণায়াম আৰু কপালভাটি হৈছে এনে শ্বাস-প্ৰশ্বাসৰ ব্যায়াম, যি শৰীৰৰ অভ্যন্তৰীণ অংগসমূহলৈ অক্সিজেনৰ প্ৰবাহ উন্নত কৰে আৰু লগতে আপোনাৰ মানসিক স্বাস্থ্যৰ উপকাৰ কৰে ৷

ডাঃ নম্ৰতা শৰ্মা কয় যে, পুৱাৰ সৰু সৰু ব্যায়ামসমূহ দৈনন্দিন জীৱনত অন্তৰ্ভুক্ত কৰিলে আৰু কম চৰ্বিযুক্ত খাদ্য, চৰ্বিহীন প্ৰটিন, ফাইবাৰযুক্ত শাক-পাচলি, মাহজাতীয় শস্য, দাইল আদি অন্তৰ্ভুক্ত কৰিলে হৃদযন্ত্ৰ সুস্থ কৰি ৰখাত সহায়ক হ’ব পাৰে ৷

এই কথাবোৰো অতি গুৰুত্বপূৰ্ণ

মানসিক চাপে কেৱল মানসিক স্বাস্থ্যৰ ক্ষতি কৰাই নহয়, শাৰীৰিক স্বাস্থ্যৰো ক্ষতি কৰে ৷ গতিকে মানসিক স্বাস্থ্য পৰিচালনা কৰাটো অতি গুৰুত্বপূৰ্ণ ৷ ইয়াৰ বাবে দৈনিক ধ্যান-ধাৰণা কৰিব লাগে, প্ৰকৃতিৰ মাজত সময় কটাব লাগে, পুষ্টিকৰ খাদ্য খাব লাগে আৰু ভাল লগা কামবোৰ, যেনে- শিল্প, সংগীত, আত্ম-যত্ন, বাগিচা আদিৰ সৈতে জড়িত হ’ব লাগে ৷

দৈনন্দিন জীৱনত প্ৰতিদিনে ৩০ মিনিট খোজ কঢ়াৰ লক্ষ্য নিৰ্ধাৰণ কৰিব পাৰে ৷ ই আপোনাৰ ওজন বজাই ৰখাত সহায় কৰে আৰু হৃদযন্ত্ৰ, হাওঁফাওঁ, পাচনতন্ত্ৰকে ধৰি বহু অংগক উপকৃত কৰে ৷ সুস্থ হৃদযন্ত্ৰ বজাই ৰাখিবলৈ টোপনিৰ মান উন্নত কৰা উচিত ৷ ইয়াৰ দ্বাৰা আপোনাৰ মানসিক চাপ নিয়ন্ত্ৰণতো সহায়ক হ’ব ৷ প্ৰতি নিশা সঠিক সময়ত শুবলৈ আৰু প্ৰতিদিনে পুৱা সঠিক সময়ত সাৰ পোৱাটো অভ্যাস কৰক ৷

লগতে পঢ়ক