মাহেকীয়া পিছুৱাবলৈ সঘনাই টেবলেট সেৱন কৰে নেকি ? যদিহে কৰে, তেন্তে হ’ব পাৰে গুৰুতৰ বিপদ

পৰিয়ালত কোনো বিশেষ দিন উদযাপনে হওক নাইবা মন্দিৰ ভ্ৰমণ, পৰিয়ালৰ সৈতে কটোৱা অৱসৰৰ সময় আদিৰ সময়ত মহিলাসকলে প্ৰায়ে মাহেকীয়াৰ সময়ক লৈ মানসিক চাপৰ সন্মুখীন হয় । এই মানসিক চাপৰ বাবে বা কোনো বিশেষ অনুষ্ঠান বাদ পৰাৰ ভয়ৰ বাবেই তেওঁলোকে প্ৰায়ে চিকিৎসকৰ পৰামৰ্শ অবিহনেই মাহেকীয়া পিছুৱাবলৈ টেবলেট বা বড়ি সেৱন কৰে ৷ চিকিৎসকৰ পৰামৰ্শ অবিহনে এই বড়ি সেৱন কৰিলে শৰীৰত গুৰুতৰ বিপদৰ সৃষ্টি হ’ব পাৰে যিবোৰ মহিলাসকলৰ স্বাস্থ্যৰ বাবে ক্ষতিকাৰক বিবেচিত হোৱাৰ আশংকা থাকে ৷

মাহেকীয়া কেৱল গৰ্ভাৱস্থাৰ সৈতে জড়িত বিষয় নহয় । মহিলাসকলৰ সামগ্ৰিক শাৰীৰিক আৰু মানসিক স্বাস্থ্যৰ ক্ষেত্ৰত ই গুৰুত্বপূৰ্ণ সূচক । টেবলেট সেৱন কৰি মাহেকীয়া পিছুৱালে পিছলৈ ই গুৰুতৰ সমস্যাৰ সৃষ্টি কৰিব পাৰে ৷ এনে কৰিলে এগৰাকী মহিলাৰ স্বাভাৱিক ঋতুচক্ৰ সম্পূৰ্ণৰূপে বিঘ্নিত হ’ব পাৰে বুলি চিকিৎসকসকলে সকীয়াই দিয়ে ।

ৰক্তচাপ বা হৃদস্পন্দনৰ দৰেই মাহেকীয়া স্বাস্থ্যৰ বাবে এক অতি গুৰুত্বপূৰ্ণ লক্ষণ । যেতিয়া এগৰাকী মহিলাই চিকিৎসকৰ পৰামৰ্শ অবিহনে মাহেকীয়া পিছুৱাবলৈ টেবলেট বা বড়ি সেৱন কৰে, তেতিয়া তেওঁৰ শৰীৰৰ প্ৰাকৃতিক হৰম’নৰ ভাৰসাম্যত বাধাৰ সৃষ্টি হয় । মাহেকীয়া বন্ধ কৰিবলৈ ঔষধ সেৱন কৰিলে গুৰুতৰ পাৰ্শ্বক্ৰিয়া হ’ব পাৰে ৷ যেনে -

হৰম’নৰ পৰিৱৰ্তন আৰু স্বাস্থ্যজনিত প্ৰভাৱ

মাহেকীয়া পিছুৱাবলৈ ধাৰাবাহিকভাৱে বড়ি বা টেবলেট ব্যৱহাৰ কৰিলে শৰীৰৰ প্ৰাকৃতিক হৰম’নৰ ভাৰসাম্য গুৰুতৰভাৱে বিঘ্নিত হ’ব পাৰে । ইয়াৰ ফলত অনিয়মিত মাহেকীয়া, সাধাৰণতকৈ অধিক ৰক্তক্ষৰণ, তলপেটত অসহ্যকৰ বিষ আৰু শ্ৰোণী অংশত তীব্ৰ বিষ আদিৰ দৰে সমস্যাৰ সৃষ্টি হ’ব পাৰে । ইয়াৰোপৰি মহিলাসকলে মানসিক স্বাস্থ্যজনিত সমস্যা(সততে গম নোপোৱাকৈ) যেনে - অত্যাধিক মানসিক চাপ, অত্যন্ত ভাগৰ আৰু উদ্বেগ আদিও অনুভৱ কৰিব পাৰে ।

হৰম’নৰ ভাৰসাম্যহীনতাই ক্ষুদ্ৰ অভেৰিয়ান চিষ্ট(PCOD/PCOS) হোৱাৰ সম্ভাৱনা বৃদ্ধি কৰে । ফলস্বৰূপে, কেইবাটাও অস্বস্তিকৰ শাৰীৰিক পৰিৱৰ্তন ঘটিব পাৰে ৷ যেনে -

• মুখমণ্ডলত অবাঞ্চিত নোম গজা
• অত্যধিক চুলি সৰা
• আকস্মিক আৰু অনিয়ন্ত্ৰিতভাৱে ওজন বৃদ্ধি

যদিও ই প্ৰত্যক্ষভাৱে বন্ধ্যাত্বৰ সৃষ্টি নকৰে, তথাপিও ই ডিম্বাশয়ৰ পৰা কণীৰ স্বাভাৱিক নিঃসৰণত বাধাৰ সৃষ্টি কৰি ভৱিষ্যতে গৰ্ভধাৰণত বিলম্ব ঘটাব পাৰে ।

হাড়ৰ দুৰ্বলতাৰ পৰা আৰম্ভ কৰি তেজ জমা হোৱালৈকে

স্ত্ৰীৰোগ বিশেষজ্ঞ স্বপ্নাশ্ৰী নাথে কয় যে এই বড়ি বা টেবলেটবোৰ অত্যধিক মাত্ৰাত সেৱন কৰা মহিলাসকলৰ তেজ জমা হোৱাৰ আশংকা বৃদ্ধি পায় । মাহেকীয়া পিছুৱাবলৈ ব্যৱহাৰ কৰা এই বড়িবোৰ ৩৫ বছৰৰ ওপৰৰ মহিলা আৰু মেদবহুলতা, উচ্চ ৰক্তচাপ, ডায়েবেটিছ, মাইগ্ৰেইন আদি সমস্যা থকা মহিলাসকলৰ বাবে আৰু অধিক বিপদজনক হ’ব পাৰে ।

এই বড়ি অথবা টেবলেটবোৰৰ অপ্ৰয়োজনীয় সেৱনৰ ফলত লিভাৰত অতিৰিক্ত চাপ পেলোৱাই নহয়, বৰং সময়ৰ লগে লগে মহিলাসকলৰ হাড় দুৰ্বল হ’বলৈ আৰম্ভ কৰে ।

মাহেকীয়া(ঋতুস্ৰাৱ)ৰ উপকাৰিতা

• মহিলাসকলে প্ৰায়ে মাহেকীয়াক সমস্যা বুলি গণ্য কৰে যদিও শৰীৰৰ বাবে ইয়াৰ বহু উপকাৰিতা আছে ।
• নিয়মীয়াকৈ মাহেকীয়া হোৱা মহিলাসকলৰ ৰক্তবাহী নলী সুস্থ ।
• শৰীৰত ‘বেয়া’ কলেষ্টেৰল (LDL)ৰ মাত্ৰা স্বাভাৱিক হৈ থাকে ।
• শৰীৰত সঠিক পৰিমাণৰ ইষ্ট্ৰজেন হৰম’ন থাকিলেহে হাড়ে কেলচিয়াম সঠিকভাৱে শোষণ কৰিবলৈ সক্ষম হয় ।
• ঋতুস্ৰাৱৰ সময়ত জৰায়ুৰ আৱৰণ ছিগি যায়, যাৰ ফলত কোষসমূহ জমা হোৱাত বাধা দিয়ে আৰু সংক্ৰমণ ৰোধ কৰে ।
• ই শৰীৰত অতিৰিক্ত আইৰণ জমা হোৱাত বাধা দিয়ে ।

যিহেতু প্ৰতিমাহে সঠিক সময়ত এটা কণী নিৰ্গত হয়, সেয়েহে ই বাৰ্ধক্যৰ লক্ষণসমূহ পলমকৈ দেখা দিয়াত সহায় কৰে আৰু যৌৱন অটুট ৰাখে । গতিকে এনে বড়ি বা টেবলেট অতি প্ৰয়োজনীয় সময়তহে ব্যৱহাৰ কৰিব লাগে ৷ তদুপৰি মাহেকীয়া আৰম্ভ হোৱাৰ তিনি-চাৰিদিন পূৰ্বে চিকিৎসকৰ পৰামৰ্শ লোৱাৰ পিছতহে ব্যৱহাৰ কৰিব লাগে ।

ল’বলগীয়া সাৱধানতা

আজিকালি বহু মহিলাই চিকিৎসকৰ পৰামৰ্শ নোলোৱাকৈ ফাৰ্মাচীৰ পৰা পোনপটীয়াকৈ ঔষধ কিনি সেৱন কৰাৰ বদ অভ্যাস গঢ়ি তুলিছে । চিকিৎসকে সকীয়াই দিছে যে এইটো অতি বিপদজনক । চিকিৎসকে এগৰাকী মহিলাৰ বৰ্তমানৰ স্বাস্থ্য, ওজন, বয়স আৰু পূৰ্বৰ যিকোনো চিকিৎসাজনিত অৱস্থাৰ বিষয়ে বিবেচনা কৰি ঔষধৰ মাত্ৰা আৰু সময় নিৰ্ধাৰণ কৰে ।

ধৰ্মীয় অনুষ্ঠান বা বিশেষ অনুষ্ঠানৰ সময়ত মাহেকীয়া পিছুৱাবলৈ কেইবাসপ্তাহ ধৰি টেবলেট সেৱন কৰিব নালাগে । সাধাৰণতে বড়ি বা টেবলেট বন্ধ কৰাৰ ২-৩ দিনৰ ভিতৰত মাহেকীয়া আৰম্ভ হয় । যদি টেবলেট সেৱন বন্ধ কৰাৰ ১০ দিনৰ ভিতৰত মাহেকীয়া আৰম্ভ নহয়, তেন্তে লগে লগে চিকিৎসকৰ পৰামৰ্শ লোৱা উচিত ।

একাংশ মহিলাই গৰ্ভৱতী বুলি গম নোপোৱাকৈয়ে মাহেকীয়া পিছুৱাবলৈ টেবলেট কিনি সেৱন কৰে । ইয়াৰ ফলত গৰ্ভস্থ শিশুৰ গুৰুতৰ ক্ষতি হ’ব পাৰে । যদি কোনো মহিলাই চিকিৎসকৰ পৰামৰ্শ লয়, তেন্তে তেওঁলোকে প্ৰথমে গৰ্ভাৱস্থা পৰীক্ষা কৰি গৰ্ভৱতী হোৱা-নোহোৱাটো নিশ্চিত কৰিব লাগে ৷ ইয়াৰ পিছতহে তেওঁলোকক চিকিৎসকে বড়ি বা টেবলেট সেৱন কৰিবলৈ অনুমতি দিয়ে ৷

চিকিৎসকৰ পৰামৰ্শ অবিহনে এনে হৰম’নযুক্ত বড়ি বা টেবলেট কিনি খোৱাটো কঠোৰভাৱে পৰিহাৰ কৰা উচিত । ক্ষন্তেকীয়া লাভৰ বাবে স্বাস্থ্য যাতে বিপদত নপৰে তাৰ প্ৰতি ধ্যান দিয়া উচিত । যোগ্য চিকিৎসকৰ তত্বাৱধানতহে আৰু অতি প্ৰয়োজনীয় সময়তহে এনেবোৰ টেবলেট সেৱন কৰাটো শৰীৰৰ বাবে আটাইতকৈ নিৰাপদ ।

(অস্বীকাৰ: ইয়াত দিয়া সকলো তথ্য আৰু পৰামৰ্শ কেৱল সাধাৰণ তথ্যৰ বাবেহে । এই তথ্য বৈজ্ঞানিক গৱেষণা, অধ্যয়ন আৰু চিকিৎসা আৰু স্বাস্থ্য বিশেষজ্ঞৰ পৰামৰ্শৰ ওপৰত ভিত্তি কৰি দিয়া হৈছে। এই পৰামৰ্শসমূহ গ্ৰহণ কৰিবলৈ চেষ্টা কৰাৰ আগতে চিকিৎসকৰ পৰামৰ্শ লোৱাটোৱেই উত্তম।)

লগতে পঢ়ক: কেম'থেৰাপীৰ বিকল্প; কৰ্কটৰ নতুন 'স্মাৰ্ট' ঔষধ প্ৰস্তুত গুৱাহাটী আইআইটি বিজ্ঞানীৰ