বিশ্ব আলোকচিত্ৰ দিৱস ২০২৬: অভিনয়ৰ লগতে ফটোগ্ৰাফীত পাকৈত এইসকল তাৰকা, তালিকাত আছে ৮৮ বছৰীয়া প্ৰবীণ অভিনেত্ৰীও!

হায়দৰাবাদ : আজি ১৯ আগষ্ট, ২০২৬ তাৰিখে সমগ্ৰ বিশ্বজুৰি ‘বিশ্ব আলোকচিত্ৰ দিৱস’ উদযাপন কৰা হৈছে । এই বিশেষ দিনটোত এনে কিছুমান তাৰকাৰ বিষয়ে জানো আহক, যিসকলে কেৱল অভিনয়তে নহয়, বৰঞ্চ সুন্দৰ ফটোগ্ৰাফী বা আলোকচিত্ৰ গ্ৰহণ কৰাতো অতি পাকৈত । আটাইতকৈ আচৰিত কথাটো হ’ল যে এই তালিকাত এগৰাকী ৮৮ বছৰীয়া প্ৰবীণ অভিনেত্ৰীও অন্তৰ্ভুক্ত হৈ আছে ।

এটা সময় আছিল যেতিয়া মানুহে মাত্ৰ এখন ফটো তুলিবলৈকে ফটো ষ্টুডিঅ’লৈ যাবলগীয়া হৈছিল । আগৰ দিনত ফটো ষ্টুডিঅ’বোৰত ফটো তুলিবলৈ মানুহৰ যথেষ্ট ভিৰ হৈছিল । কিন্তু ক্ৰমান্বয়ে উন্নত প্ৰযুক্তিৰ বলত এনে এটা সময় আহি পালে যে, আজিৰ দিনত প্ৰতিটো ঘৰতে এটাকৈ কেমেৰা উপলব্ধ হৈ পৰিছে । প্ৰতিটো ঘৰতে কেমেৰা থকা বুলি এই কাৰণেই ক’ব পাৰি কিয়নো আজি সকলোৰে হাতে হাতে কেমেৰাযুক্ত একোটা মোবাইল ফোন । গতিকে এতিয়া মানুহে নিজৰ প্ৰিয় ফটোবোৰ তুলিবলৈ কোনো পেছাদাৰী ফটোগ্ৰাফাৰৰ বিশেষ প্ৰয়োজন অনুভৱ নকৰে । অৱশ্যে, ঘৰুৱা সৰু-বৰ অনুষ্ঠান বা বিয়া-সবাহ আদিৰ বাবে আজিও ফটোগ্ৰাফাৰসকলৰ চাহিদা অক্ষুণ্ণ আছে ।

আজি ১৯ আগষ্ট হৈছে ‘বিশ্ব আলোকচিত্ৰ দিৱস’ । আজিৰ ছ’চিয়েল মিডিয়াৰ যুগত এই দিনটোৰ গুৰুত্ব কিছু পৰিমাণে ম্লান পৰি যোৱা যেন লাগিলেও, যিসকলৰ ফটোগ্ৰাফীৰ প্ৰতি প্ৰকৃত চখ আছে, তেওঁলোকে আজিও দামী দামী কেমেৰাৰে ফটোগ্ৰাফী কৰি আছে । যাৰ বাবে কেমেৰাৰ লেন্সৰ ব্যৱসায় আজিও সুন্দৰভাৱে চলি আছে ।

আজিৰ দিনত ইনষ্টাগ্ৰাম খুলিলেই হাজাৰ হাজাৰ ফটো দেখিবলৈ পোৱা যায়, যাৰ বেছিভাগেই মোবাইল ফোনৰ কেমেৰাৰে তোলা । বৰ্তমান সময়ত মোবাইল থকা প্ৰতিগৰাকী ব্যক্তিয়েই একো একোজন ফটোগ্ৰাফাৰ হৈ পৰিছে । কিন্তু এই সকলোবোৰৰ মাজতো কিছুমান এনেকুৱা লোক আছে, যিসকলে বিশেষভাৱে ফটোগ্ৰাফীৰ প্ৰতি গভীৰ চখ ৰাখে । এই তালিকাত চিনেমাজগতৰ কেবাজনো তাৰকা অন্তৰ্ভুক্ত হৈ আছে ।

২০২৬ চনৰ ‘বিশ্ব আলোকচিত্ৰ দিৱস’ৰ এই বিশেষ ক্ষণত জানো আহক পৰ্দাত অভিনয় কৰাৰ লগতে কেমেৰাৰ পিছফালে থাকি সুন্দৰ ফটো তুলিবলৈ ভাল পোৱা কেইগৰাকীমান তাৰকাৰ বিষয়ে -

ৰণদ্বীপ হুদা : ৰণদ্বীপ হুদা এগৰাকী অতি বিশিষ্ট অভিনেতা, এই ক্ষেত্ৰত কোনো সন্দেহ নাই । দেখিবলৈ ধুনীয়া তথা দক্ষ অভিনেতা হোৱাৰ উপৰিও তেওঁ ৰাষ্ট্ৰীয় পৰ্যায়ৰ এজন প’ল’ খেলুৱৈ আৰু লগতে ফটো তোলাতো অতি পাকৈত । অভিনেতাগৰাকীৰ বন্যপ্ৰাণী ফটোগ্ৰাফীৰ প্ৰতি গভীৰ চখ আছে আৰু তেওঁ প্ৰায়েই নিজৰ ইনষ্টাগ্ৰাম একাউণ্টত বন্য জন্তু আৰু প্ৰকৃতিৰ অতি সুন্দৰ ফটোবোৰ শ্বেয়াৰ কৰি থাকে ।

ৰবীনা টণ্ডন : নব্বৈৰ দশকৰ অতি মোহনীয় অভিনেত্ৰী ৰবীনা টণ্ডনৰো ফটোগ্ৰাফীৰ প্ৰতি এক বিশেষ চখ আছে । ৰবীনা যেতিয়াই নিজৰ পৰিয়ালৰ সৈতে ফুৰিবলৈ ওলাই যায়, তেতিয়া সুন্দৰ প্ৰাকৃতিক দৃশ্যৰ ফটো তুলিবলৈ কেতিয়াও নাপাহৰে । ৰবীনাইও বন্যপ্ৰাণী ফটোগ্ৰাফী কৰি বৰ আনন্দ পায় । এবাৰ ৰবীনা টণ্ডনে নিজৰ ইনষ্টাগ্ৰাম একাউণ্টত এটা বাঘৰ পৰিয়ালৰ অতি সুন্দৰ ফটো শ্বেয়াৰ কৰিছিল ।

শ্বাহীৰ শ্বেইখ : টেলিভিছন জগতৰ পৰা গৈ বলীউডত প্ৰৱেশ কৰা অভিনেতা শ্বাহীৰ শ্বেইখৰো সুন্দৰ ফটো তোলাৰ এক বিশেষ চখ আছে । অতি কম বয়সতে পুনে চহৰত থকাৰ সময়ৰে পৰা শ্বাহীৰ শ্বেইখ ফটোগ্ৰাফীৰ প্ৰতি আকৰ্ষিত হৈছিল । তেওঁ প্ৰকৃতিৰ অপৰূপ সৌন্দৰ্য কেমেৰাত বন্দী কৰি বহুত ভাল পায় । নিজৰ এই কলাক অধিক নিখুঁত কৰি তুলিবলৈ তেওঁ পুনেৰ কেইবাগৰাকীও স্থানীয় ফটোগ্ৰাফাৰৰ সৈতে মিলি কামো কৰিছিল । আজিও শ্বাহীৰে নিজৰ ফটোগ্ৰাফীৰ এই সুপ্ত প্ৰতিভা প্ৰদৰ্শন কৰিবলৈ এৰা নাই ।

দিয়া মিৰ্জা : বলীউড অভিনেত্ৰী দিয়া মিৰ্জাৰো প্ৰকৃতি আৰু বন্যপ্ৰাণী ফটোগ্ৰাফীৰ প্ৰতি গভীৰ আগ্ৰহ আছে । দিয়াই কেইবাবাৰো প্ৰাকৃতিক দৃশ্যৰ এনেকুৱা কিছুমান সুন্দৰ ফটো ছ’চিয়েল মিডিয়াত শ্বেয়াৰ কৰিছে, যিবোৰ দেখাৰ পিছতহে তেওঁৰ অনুৰাগীসকলে গম পাইছিল যে, তেওঁ এগৰাকী অভিনেত্ৰী হোৱাৰ উপৰিও ফটোগ্ৰাফীৰো এক বিশেষ চখ ৰাখে । তেওঁ কেৱল এগৰাকী অভিনেত্ৰীয়েই নহয়, বৰঞ্চ ৰাষ্ট্ৰসংঘৰ পৰিৱেশ সজাগতা দূত হিচাপেও কাম কৰে । তেওঁৰ কেমেৰাৰে তোলা ফটোবোৰে অনুৰাগীসকলক প্ৰকৃতি আৰু পৰিৱেশ সংৰক্ষণৰ প্ৰতি অনুপ্ৰাণিত কৰে ।

হৰ্ষবৰ্ধন কাপুৰ : অনিল কাপুৰৰ পুত্ৰ হৰ্ষবৰ্ধন কাপুৰৰ অভিনয় কেৰিয়াৰে যদিও বলীউডত আশানুৰূপ সফলতা লাভ কৰা নাই, তথাপিও কেৱল অভিনয়েই তেওঁৰ একমাত্ৰ চখ নহয় । তেওঁ ফটোগ্ৰাফী বা আলোকচিত্ৰ গ্ৰহণ কৰিও বহুত ভাল পায় । ‘ভাৱেশ জোশী ছুপাৰহিৰো’’খ্যাত অভিনেতাগৰাকীৰ ফটো তোলাৰ এক বিশেষ চখ আছে আৰু তেওঁৰ ছ’চিয়েল মিডিয়া একাউণ্টত থকা ছবিবোৰে তেওঁৰ সৃজনীশীলতা আৰু প্ৰতিভাক সুন্দৰভাৱে প্ৰতিফলিত কৰে ।

ৱাহীদা ৰহমান : হিন্দী চিনেমাৰ প্ৰবীণ অভিনেত্ৰী ৱাহীদা ৰহমান যেতিয়া কেমেৰাৰ সন্মুখলৈ আহিছিল, তেতিয়া দৰ্শকৰ চকু তেওঁৰ ওপৰতেই আৱদ্ধ হৈ পৰিছিল । তেওঁৰ অনবদ্য অভিনয় আৰু অপূৰ্ব অভিব্যক্তিয়ে পোনপটীয়াকৈ দৰ্শকৰ হৃদয় স্পৰ্শ কৰিছিল । আজিকালি তেওঁ চিনেমা জগতখনত বেছিকৈ সক্ৰিয় হৈ থকা নাই যদিও, বৰ্তমান ফটোগ্ৰাফীয়েই তেওঁৰ আটাইতকৈ প্ৰিয় কাম হৈ পৰিছে । আজি ৮৮ বছৰ বয়সতো তেওঁৰ ফটোগ্ৰাফীৰ প্ৰতি থকা চখ সজীৱ হৈ আছে । ৱাহীদা ৰহমানৰ এই চখ বহুত আগৰে পৰাই আছিল, যিটো বৰ্তমান তেওঁৰ জীৱনৰ আটাইতকৈ গুৰুত্বপূৰ্ণ অংশ হৈ পৰিছে । তেওঁৱো বন্যপ্ৰাণী ফটোগ্ৰাফী কৰিবলৈ বহুত ভাল পায় । নিজৰ এই চখ পুৰণ কৰিবলৈ তেওঁ বিভিন্ন দেশ-বিদেশ ভ্ৰমণো কৰিছে ।

বোমান ইৰাণী : বলীউডত অভিনয় কেৰিয়াৰ আৰম্ভ কৰাৰ আগতে বোমন ইৰাণী এগৰাকী বৃত্তিগত ফটোগ্ৰাফাৰ আছিল । আজিও তেওঁৰ ফটোগ্ৰাফীৰ প্ৰতি থকা হেঁপাহ কম হোৱা নাই ।

লগতে পঢ়ক : প্ৰকৃতিয়েই দিয়ে জীৱন... বানত সৰ্বস্বান্ত অসমীয়াৰ দুখ বুজি নীলোৎপলৰ কণ্ঠৰে নিগৰিল এটি সুমধুৰ গীত