নৱগ্ৰহ শ্মশানত ৰাজ্যিক মৰ্যাদাৰে শেষ বিদায় দিয়া হ'ব শিল্পী সমৰ হাজৰিকাক

গুৱাহাটী: ৰাজ্যিক মৰ্যদাৰে শেষকৃত্য সম্পন্ন কৰা হ'ব প্ৰথিতযশা শিল্পী সমৰ হাজৰিকাৰ । নৱগ্ৰহ শ্মশানত শেষকৃত্য সম্পন্ন কৰা হ'ব । নিজৰাপাৰৰ বাসগৃহৰ পৰা আকাশবাণী, দীপক সংঘত শেষ শ্ৰদ্ধাঞ্জলি জনোৱাৰ পিছত নৱগ্ৰহ শ্মশানলৈ যোৱা হ'ব । নিমোনিয়াত ভুগি থকা শিল্পীগৰাকীয়ে ৭৯ বছৰ বয়সত মঙলবাৰে পুৱা শেষ নিশ্বাস ত্যাগ কৰে ।

মন্ত্ৰী বিমল বড়াই বাসগৃহত উপস্থিত হৈ শিল্পীগৰাকীক শেষ শ্ৰদ্ধাঞ্জলি জনায় । তেওঁ সংবাদমাধ্যমৰ আগত কয়, "উৰুকাৰ পুৱাই এটা দুঃসংবাদে সকলোৰে মন ব্যথিত কৰিছে । সমৰ হাজৰিকা আমাৰ মাজৰ পৰা আঁতৰি গৈছে । সমৰ হাজৰিকাৰ কথা কোৱাৰ লগে লগে মনলৈ আহে ভূপেন হাজৰিকাৰ কথা । সুধাকণ্ঠৰ আঙুলিত ধৰি সাংস্কৃতিক ক্ষেত্ৰত কনিষ্ঠ ভাতৃ সমৰ হাজৰিকাই ভৰি দিছিল । যোৱা সাতটা দশক ধৰি জীৱন কালৰ অনবদ্য সাংস্কৃতিক সমলেৰে সাংস্কৃতিক ক্ষেত্ৰখন চহকী কৰি গৈছে ।"

মন্ত্ৰী বড়াই কয়, "তেওঁৰ এই মৃত্যু অপূৰণীয় । তেওঁৰ মৃত্যুত আমি গভীৰ শোক প্ৰকাশ কৰিছো । চিৰশান্তি কামনা কৰিছো । নৱগ্ৰহ শ্মশানত ৰাজ্যিক মৰ্যদাৰে শেষকৃত্য সম্পন্ন কৰা হ'ব আকাশবাণী, দূৰদৰ্শন কেন্দ্ৰ আৰু দীপক সংঘত শেষ শ্ৰদ্ধাঞ্জলি জনোৱা হ'ব । গায়ন বায়নে শ্মশানলৈ লৈ যোৱা হ'ব শিল্পীগৰাকীৰ নশ্বৰদেহ ।"

ইয়াৰোপৰি আন এক সিদ্ধান্তৰ কথাও ৰাজহুৱা কৰে মন্ত্ৰীগৰাকীয়ে । তেওঁ কয়, "তেওঁক মৰণোত্তৰভাৱে শিল্পী সন্মান প্ৰদান কৰা হ'ব । অসম চৰকাৰৰ পৰা প্ৰতিবছৰে আগবঢ়োৱা 'শিল্পী সন্মান' শিল্পী দিৱসৰ দিনটোত প্ৰদান কৰা হয় । এইবাৰ আমি সমৰ হাজৰিকাক প্ৰদান কৰাৰ সিদ্ধান্ত গ্ৰহণ কৰিছিলো । কিন্তু দুখৰ বিষয় তেওঁ জীৱিতকালত আমি এই বঁটা তেওঁৰ হাতত তুলি দিব নোৱাৰিলো । মৰণোত্তৰভাৱে তেওঁক এই বঁটাৰে সন্মানিত কৰিম ।"

ইফালে শিল্পীগৰাকীৰ বাসগৃত উপস্থিত হৈ বিশিষ্ট শিল্পী তথা বৌয়েক মনীষা হাজৰিকাই আবেগিক হৈ কয়, "অসম তথা চিনেমা জগতৰ বাবে এটা দুখৰ খবৰ । ১৯৭৭ পৰা বহু গান গালে । এমাহ আগতে তেওঁ নিজে এক অনুষ্ঠানত গান গাইছে । আমাৰ ঘৰখন খালী হৈ গ'ল । আমি বন্ধুৰ নিচিনা আছিলো ।"

একেদৰে শিল্পীগৰাকীলৈ শ্ৰদ্ধাঞ্জলি জনাই বিশিষ্ট শিল্পী দ্বীপেন বৰুৱাই বাল্য কালৰ স্মৃতি ৰোমন্থন কৰে । তেওঁ কয়, "আমি বাল্য বন্ধু আছিলো ।"

লগতে সুঁৱৰিলে আন বহু কথা । আনহাতে শিল্পীগৰাকীৰ মৃত্যুত মুখ্যমন্ত্ৰী ড৹ হিমন্ত বিশ্ব শৰ্মা, কেন্দ্ৰীয় মন্ত্ৰী সৰ্বানন্দ সোণোৱালকে ধৰি বিভিন্ন দল-সংগঠনে শিল্পীগৰাকীৰ মৃত্যুত শোক প্ৰকাশ কৰে ।