ইক্কিছৰ স্ক্ৰীণিং: অগস্ত্য নন্দলৈ ৰেখাৰ মৰম, ধৰ্মেন্দ্ৰৰ পোষ্টাৰ চাই আৱেগিক ছানী দেওল, ছলমান খান

হায়দৰাবাদ : সোমবাৰে শ্ৰীৰাম ৰাঘৱনৰ আগন্তুক ছবি ইক্কিছৰ বিশেষ প্ৰদৰ্শনত অংশগ্ৰহণ কৰে বলীউডৰ বহু তাৰকাই । পৰম বীৰ চক্ৰৰ কনিষ্ঠতম প্ৰাপক দ্বিতীয় লেফটেনেণ্ট অৰুণ খেতাৰপালৰ জীৱনৰ আধাৰত নিৰ্মাণ কৰা ই এখন যুদ্ধৰ বায়’পিক ।

বিগত মাহত মৃত্যু হোৱা কিংবদন্তি অভিনেতা ধৰ্মেন্দ্ৰ অভিনীত অন্তিমখন ছবি ইক্কিছ ৷ এই ছবিখনেৰে অমিতাভ বচ্চনৰ নাতি অগস্ত্য নন্দই প্ৰথমবাৰৰ বাবে থিয়েটাৰৰ পৰ্দাত ধৰা দিব ।

চলচ্চিত্ৰ জগতৰ বহু পৰিচিত মুখে ইক্কিছৰ প্ৰদৰ্শনীত অংশগ্ৰহণ কৰে ৷ তাৰ মাজতে দুটা মুহূৰ্তই সকলোৰে হৃদয় চুই যায় । এটা আছিল, যেতিয়া ছানী দেওল পিতৃ ধৰ্মেন্দ্ৰৰ প্ৰতি আৱেগিক শ্ৰদ্ধাঞ্জলি নিবেদন কৰে আৰু আনটো আছিল যেতিয়া অভিনেত্ৰী ৰেখাই অমিতাভ বচ্চনৰ নাতি অগস্ত্য নন্দৰ প্ৰতি মৰম প্ৰকাশ কৰে ।

সুস্থ ৰূপতে ছানী দেওল স্ক্ৰীণিঙত উপস্থিত হয় যদিও স্পষ্টভাৱে আৱেগিক যেন দেখা গৈছিল । স্ক্ৰীণিঙলৈ যোৱাৰ পূৰ্বে ফটোৰ বাবে পোজ দিয়ে অভিনেতাগৰাকীয়ে ৷ ছানীয়ে নিজৰ পিতৃ বলীউডৰ হি-মেনক মৌন হৈ শ্ৰদ্ধাঞ্জলি জনায় । প্ৰদৰ্শনীত অংশগ্ৰহণ কৰা ছলমান খানকো ধৰ্মেন্দ্ৰৰ ফটো থকা ইক্কিছৰ পোষ্টাৰখন চাই আৱেগিক হৈ পৰা দেখা গৈছিল ।

আন এটা মৰ্মস্পৰ্শী মুহূৰ্ত আহিল অভিনেত্ৰী ৰেখাৰ পৰা । ৰেড কাৰ্পেটত খোজকাঢ়ি গৈ থাকোতে তেওঁ প্ৰথমে ধৰ্মেন্দ্ৰৰ পোষ্টাৰৰ সন্মুখত ৰৈ যায় । হাতযোৰ কৰি মূৰ দোঁৱাই কেইমুহূৰ্তমান থিয় হৈ প্ৰয়াত অভিনেতাগৰাকীক সন্মান জনায় তেওঁ ।

ইয়াৰ পিছত ৰেখা পোষ্টাৰত থকা অগস্ত্য নন্দৰ ফটোখনৰ ফালে আগবাঢ়ি গ’ল । আলফুলে অগস্ত্যৰ মুখত হাতখন থৈ আশীৰ্বাদ স্বৰূপে এটা চুমা যাচে ৰেখাই । তেনেই সাধাৰণ অথচ আৱেগিক ইংগিতটোৱে বহুতৰে হৃদয় জয় কৰে ।

অগস্ত্যই ইক্কিছত দ্বিতীয় লেফটেনেণ্ট অৰুণ খেতাৰপালৰ চৰিত্ৰত অভিনয় কৰিছে । ছবিখনত জয়দীপ আহলাৱত, সুহাসিনী মুলায়, ছিকন্দৰ খেৰ, ৰাহুল দেৱেও অভিনয় কৰিছে । ইয়াৰ পূৰ্বে এখন প্ৰদৰ্শনীত ছবিখন উপভোগ কৰি অমিতাভ বচ্চনে নিজৰ ব্লগত এটা আৱেগিক টোকা শ্বেয়াৰ কৰে । জন্মৰ পৰা ডাঙৰ পৰ্দাত অগস্ত্যৰ অভিনয় চোৱালৈকে সকলো বিষয়ে লিখি বচ্চনে নাতিয়েকৰ সৎ আৰু স্বাভাৱিক অভিনয়ৰ প্ৰশংসা কৰে ।

মূলতঃ বৰদিনৰ দিনা মুক্তিৰ পৰিকল্পনা কৰা ইক্কিছ এতিয়া ২০২৬ চনৰ ১ জানুৱাৰীত চিনেমাগৃহত মুক্তি পাব । ছবিখন কেৱল যুদ্ধৰ কাহিনী নহয়, আৱেগ আৰু পাৰিবাৰিক বন্ধনো ইয়াৰ মূল উপাদান ।

লগতে পঢ়ক : বচ্চনৰ নাতিয়েকৰ সৈতে অন্তিমবাৰৰ বাবে পৰ্দাত ধৰ্মেন্দ্ৰ