ধৰ্মেন্দ্ৰৰ মৃত্যুত ভাঙি পৰা হেমা মালিনীৰ স্পষ্টীকৰণ: প্ৰকাশ কৌৰ আৰু পুত্ৰদ্বয়ৰ সৈতে থকা সম্পৰ্কৰ প্ৰকৃত সত্য উন্মোচন

হায়দৰাবাদ : ধৰ্মেন্দ্ৰ যদিও আজি আমাৰ মাজত নাই, তথাপিও তেওঁ নিজৰ পৰিয়াল আৰু অনুৰাগীসকলৰ হৃদয়ত এক সুন্দৰ স্মৃতি হৈ জীয়াই আছে । শেহতীয়াকৈ ধৰ্মেন্দ্ৰক সোঁৱৰণ কৰি অতিশয় আৱেগিক হৈ পৰে অভিনেত্ৰী হেমা মালিনী । এক সাক্ষাৎকাৰত তেওঁ ধৰ্মেন্দ্ৰৰ প্ৰথমটো পৰিয়াল (প্ৰথম পত্নী প্ৰকাশ কৌৰ আৰু সন্তানসকল)ৰ সৈতে তেওঁৰ সম্পৰ্ক কেনেকুৱা, সেই বিষয়ে মুকলিকৈ মন্তব্য কৰে ।

হেমা মালিনী আৰু ধৰ্মেন্দ্ৰৰ বিবাহ তথা প্ৰথম পৰিয়ালৰ সৈতে থকা বাদ-বিবাদৰ চৰ্চা

বলীউডৰ তাৰকা অভিনেত্ৰী হেমা মালিনী আৰু প্ৰয়াত প্ৰখ্যাত অভিনেতা ধৰ্মেন্দ্ৰই ১৯৮০ চনত বিবাহপাশত আৱদ্ধ হৈছিল । হেমা মালিনীৰ সৈতে ধৰ্মেন্দ্ৰৰ এইখন দ্বিতীয় বিবাহ আছিল । ইয়াৰ পূৰ্বে ১৯৫৪ চনত ধৰ্মেন্দ্ৰৰ প্ৰথম বিবাহ প্ৰকাশ কৌৰৰ সৈতে হৈছিল । ধৰ্মেন্দ্ৰই দ্বিতীয় বিবাহ কৰাৰ সময়ৰে পৰাই তেওঁৰ প্ৰথমটো পৰিয়ালৰ সৈতে হেমা মালিনীৰ সম্পৰ্ক ভাল নহয় আৰু তেওঁলোকৰ মাজত সংঘাত চলি থকা বুলি সংবাদ মাধ্যমত অহৰহ চৰ্চা হৈ আহিছে ।

হেমা মালিনীয়ে কি ক’লে?

প্ৰায়ে সংবাদ মাধ্যমত এনে খবৰ ওলাই থাকে যে ধৰ্মেন্দ্ৰৰ প্ৰথম পত্নী প্ৰকাশ কৌৰ আৰু তেওঁৰ দুই পুত্ৰ ছানী দেওল আৰু ববী দেওলৰ সৈতে হেমা মালিনীৰ সম্পৰ্ক ভাল নহয় । আনকি ধৰ্মেন্দ্ৰৰ মৃত্যুৰ সময়তো দুয়োটা পৰিয়ালৰ মাজত থকা মতানৈক্যক লৈ বিভিন্ন ধৰণৰ চৰ্চা চলিছিল । এতিয়া শেহতীয়াকৈ হেমা মালিনীয়ে এই সকলোবোৰ উৰাবাতৰিৰ ওপৰত নিজৰ নীৰৱতা ভংগ কৰিছে আৰু দুয়োটা পৰিয়ালৰ মাজৰ প্ৰকৃত সম্পৰ্কৰ সত্যটো কি, সেই বিষয়ে মুকলিকৈ কৈছে ।

'আমাৰ পৰিয়াল একগোট, AI-ৰ উৰাবাতৰিত বিশ্বাস নকৰিব': হেমা মালিনী

এক সাক্ষাৎকাৰত হেমা মালিনীয়ে স্পষ্টকৈ কয় যে, কৃত্ৰিম বুদ্ধিমত্তা বা AI-ৰ জৰিয়তে বিয়পাই দিয়া প্ৰতিটো কথাতে কোনেও চকু মুদি বিশ্বাস কৰিব নালাগে । তেওঁ কয় যে, তেওঁলোকৰ পৰিয়ালটো সম্পূৰ্ণৰূপে একগোট হৈ আছে আৰু তেওঁলোকে ইজনে সিজনৰ সৈতে অতি সুখেৰে দিন কটাইছে । অভিনেত্ৰীগৰাকীয়ে লগতে উল্লেখ কৰে যে, মানুহে তেওঁলোকৰ বিষয়ে কি কৈছে, সেই কথাক লৈ তেওঁ আৰু ধৰ্মেন্দ্ৰই কেতিয়াও চিন্তা কৰা নাছিল । তেওঁলোকে সদায় নিজৰ মতে জীৱন জীয়াইছিল । যিসকলে তেওঁলোকৰ ওপৰত আঙুলি উঠাইছিল, তেওঁলোকক তেওঁলোকে কেতিয়াও গুৰুত্ব দিয়া নাছিল । হেমা মালিনীৰ মতে, তেওঁলোকৰ সম্পৰ্কটো আছিল সঁচা প্ৰেমৰ ওপৰত প্ৰতিষ্ঠিত । তেওঁলোকে প্ৰথমৰে পৰাই জানিছিল যে তেওঁলোক ইজনে সিজনৰ বাবেই সৃষ্টি হৈছে আৰু এই সত্যক কোনেও সলনি কৰিব নোৱাৰে ।

ধৰ্মেন্দ্ৰৰ মৃত্যুত আৱেগিক হেমা মালিনী: ক’লে, 'এই কষ্ট কেতিয়াও শেষ নহয়'

প্ৰয়াত অভিনেতা ধৰ্মেন্দ্ৰক নিজৰ অন্তৰংগ জীৱনসংগী বুলি অভিহিত কৰি হেমা মালিনী অতিশয় আৱেগিক হৈ পৰে । তেওঁ কয় যে, ভাগ্যই তেওঁলোকক ইজনে সিজনৰ বাবে নিৰ্বাচিত কৰিছিল । ধৰ্মেন্দ্ৰক সোঁৱৰণ কৰি হেমা মালিনীয়ে কয় যে, জীৱনসংগী হিচাপে তেওঁ এজন অতি অসাধাৰণ আৰু উদাৰ মানুহ লাভ কৰিছিল । তেওঁৰ সৈতে কটোৱা এনে বহু সুন্দৰ স্মৃতি আছে, যিবোৰ তেওঁ গোটেই জীৱন বুকুত সাৱটি ৰাখিব । হেমা মালিনীৰ মতে, তেওঁ কৰা প্ৰতিটো কামতে ধৰ্মেন্দ্ৰই সদায় তেওঁৰ কাষত থিয় দিছিল আৰু তেওঁক উৎসাহিত কৰি কৈছিল, "আগবাঢ়ি যোৱা, কেতিয়াও থমকি নোৰোৱা । তোমাৰ নৃত্য সদায় চলাই নিয়া ।"

অভিনেত্ৰীগৰাকীয়ে লগতে কয় যে, ধৰ্মেন্দ্ৰৰ বিশ্বাস আছিল যে নৃত্যৰ মাজত এক আধ্যাত্মিক প্ৰশান্তি লুকাই থাকে, যিয়ে তেওঁক মনৰ আনন্দ দিয়াৰ লগতে সুস্থ কৰি ৰখাত সহায় কৰিছিল ৷ হেমা মালিনীয়ে স্বীকাৰ কৰে যে, আজি তেওঁ যি কৰিবলৈ সক্ষম হৈছে, সেয়া কেৱল ধৰ্মেন্দ্ৰৰ সংগ আৰু সাহসৰ বলতেই সম্ভৱ হৈছে । এতিয়া তেওঁ স্বামীৰ অভাৱ বৰকৈ অনুভৱ কৰে আৰু এই শূন্যতা জীৱনত কেতিয়াও পূৰণ হ’ব নোৱাৰে । তেওঁ প্ৰতিটো পলতে ধৰ্মেন্দ্ৰৰ কথাকে চিন্তা কৰি থাকে । মানুহে প্ৰায়ে তেওঁক সোধে যে তেওঁ এই গভীৰ শোকৰ পৰা মুক্ত হ’ব পাৰিছেনে, কিন্তু তেওঁ অনুভৱ কৰে যে এই হেৰুৱাৰ বেদনা বা কষ্ট আচলতে কেতিয়াও শেষ নহয়, তেওঁ ধৰ্মেন্দ্ৰক প্ৰতি মুহূৰ্ততে মিছ কৰে ।

লগতে পঢ়ক : ধৰ্মেন্দ্ৰৰ সৈতে অন্যতম সুন্দৰ স্মৃতি প্ৰকাশ হেমা মালিনীৰ