জুবিন গাৰ্গৰ গানত কোৰিয়ান বাছ চালকৰ নৃত্যই জিনিলে লাখ লাখ অসমীয়াৰ হৃদয়

হায়দৰাবাদ : অসমীয়া সংগীতৰ জনপ্ৰিয়তা এতিয়া কেৱল অসমতে সীমাবদ্ধ হৈ থকা নাই, এয়া এতিয়া দেশ-বিদেশৰ চৰ্চা ৷ অসমীয়া সংগীত জগতৰ হীৰা জুবিন গাৰ্গৰ সংগীতে অসমীয়াৰ লগতে প্ৰতিনিয়ত বিশ্ববাসীক মোহিত কৰি ৰাখিছে ৷

কোৰিয়াৰ জনপ্ৰিয় কণ্টেণ্ট ক্ৰিয়েটৰ মিকি ষ্টাইল, এজন স্থানীয় প্ৰাণৱন্ত বাছ চালকে জুবিন গাৰ্গৰ চিৰসেউজ জনপ্ৰিয় গীত 'চকুলে চাই'-ৰ তালে তালে নাচি এটি ভিডিঅ’ সামাজিক মাধ্যমত আপলোড কৰিছে ৷

আপলোডৰ পাছত তৎক্ষণাত ভিডিঅ’টো ভাইৰেল হৈ পৰিছে ৷ বৰ্তমান ছ’চিয়েল মিডিয়াত অসমীয়া ৰাইজে কোৰিয়ান ব্যক্তিগৰাকীক প্ৰশংসাৰে ওপচাই পেলাইছে ৷ এই ঘটনাই আকৌ এবাৰ প্ৰমাণ কৰিলে যে সংগীতৰ কোনো ভাষা নাই আৰু ই সকলোৰে হৃদয় স্পৰ্শ কৰিব পাৰে ।

কোৰিয়াৰ এজন ব্যক্তি, যাৰ ইনষ্টাগ্ৰাম হেণ্ডেলৰ নাম মিকি ষ্টাইল, তেওঁ জুবিন গাৰ্গৰ সুমধুৰ অসমীয়া গীত 'চকুলে চাই'-ৰ তালে তালে নিজৰ এক বিশেষ শৈলীত সুন্দৰকৈ নৃত্য কৰিছে । তেওঁৰ ইনষ্টাগ্ৰাম বায়’ত কোৰিয়ান বাছ চালক বুলি উল্লেখ আছে ৷

জুবিন গাৰ্গৰ অতি জনপ্ৰিয় গীতটোৰ তালে তালে এই কোৰিয়ান বাছ চালকজনে কৰা নৃত্যৰ ভিডিঅ’টোৱে এতিয়া ইণ্টাৰনেটত বহুতৰে হৃদয় জয় কৰিছে । এই ঘটনাই অসমীয়া সংগীতৰ প্ৰতি থকা বিশ্বজোৰা আদৰ আৰু মৰমকে প্ৰতিফলিত কৰিছে ।

চকুলে চাই জুবিন গাৰ্গৰ এটি পুৰণি গীত ৷ এই গীতটো হেঙুল থিয়েটাৰৰ এটা অন্যতম জনপ্ৰিয় গীত ৷ এইবাৰ হেঙুলৰ মঞ্চতো এই গীতটো দৰ্শকে উপভোগ কৰিবলৈ পাব ৷ সদ্যহতে এই গীতটোৰ হুক ষ্টেপত বহুতেই ইতিমধ্যে ৰীল বনাই সামাজিক মাধ্যমত এৰিছে ৷

অসমীয়াৰ হিয়াৰ আমঠু জুবিন গাৰ্গে কণ্ঠদান কৰা গীতটোৰ কথা আৰু সুৰ পলাশ সূৰ্য গগৈৰ ৷ এতিয়া জুবিনৰ কায়িক অনুপস্থিতিত আজি বিদেশী ৰাষ্ট্ৰত হঠাতে কোনোবাই তেওঁৰেই গান এটা গাবলৈ চেষ্টা কৰি কৰি কৰা নৃত্যই প্ৰতিগৰাকী অনুৰাগীকে আৱেগিক কৰি তুলিছে ৷

উপাসনা নাথৰ সম্পাদনাত প্ৰকাশিত

লগতে পঢ়ক : ভাষাৰ হেঙাৰ ভাঙি জুবিন গাৰ্গৰ কালজয়ী গীত গালে সিদ শ্ৰীৰামে, প্ৰশংসাৰে ওপচাই দিলে অসমীয়া অনুৰাগীয়ে