এইবাৰ ৰূপালী পৰ্দাই ক'ব 'লভ ইউ জুবিন দা'

গুৱাহাটী : জুবিনলৈ শ্ৰদ্ধাঞ্জলি জনাই গ্ৰীবছ মিডিয়া এণ্ড প্ৰডাকশ্বন প্ৰাইভেট লিমিটেড আৰু বৰ্ষা মুভীজৰ সহযোগত এখন বাংলা ছবি নিৰ্মাণ কৰা হ'ব । ছবিখনৰ প্ৰযোজনা ফাৰুক উদ্দিনৰ আৰু পৰিচালনা কৰিব শ্ৰী প্ৰীতমে । শনিবাৰে জ্যোতি চিত্ৰবনৰ কলাগুৰু প্ৰেক্ষাগৃহত ছবিখনৰ পোষ্টাৰ মুকলি কৰা হয় । জুবিন গাৰ্গক ভালপোৱা এজন অনুৰাগীক লৈয়েই ছবিখন নিৰ্মাণ কৰা হ'ব ।

এই ছবিখনত থাকিব জুবিন গাৰ্গে পূৰ্বে মুক্তি নিদিয়া দুটা গান । জীৱিত অৱস্থাতে এটা গান তেওঁ বাংলা ভাষাত গাইছিল, আনটো গাইছিল অসমীয়া ভাষাত । প্ৰায় ২০০৬ চনতেই অসমীয়া ভাষাৰ গানটো গাইছিল জুবিন গাৰ্গে, সেই মুক্তি লাভ নকৰা গান দুটা এই ছবিখনৰ জৰিয়তেই শ্ৰোতা-দৰ্শকৰ মাজলৈ আহিব । অসম আৰু পশ্চিমবংগত ছবিখনৰ দৃশ্যগ্ৰহণৰ কাম আৰম্ভ হ'ব ।

ছবিখনৰ সন্দৰ্ভত গৰিমা শইকীয়া গাৰ্গে কয়, "শ্ৰী প্ৰীতমৰ লগত জুবিনে আগতে বহুত গান গাইছে । তেওঁ ছবিখনৰ কাহিনীটো লিখিছে । জুবিনৰ লগত আচলতে তেওঁ খুব আৱেগিক ভাৱে জড়িত । ছবিখনৰ পৰিচালনাৰ লগতে সংগীত পৰিচালনাও শ্ৰী প্ৰীতমে কৰিব । অসম আৰু পশ্চিমবংগৰ পটভূমিত ছবিখন নিৰ্মাণ কৰা হ'ব ।"

তেওঁ লগতে কয়, "লভ ইউ জুবিন দা- ছবিখনৰ নাম, যাৰ জৰিয়তে জুবিনৰ প্ৰতি ভালপোৱা বা আৱেগখিনিয়ে নিশ্চয় প্ৰকাশ কৰিব বিচাৰিছে । জুবিনৰ পূৰ্বে মুক্তি লাভ নকৰা দুটা গীত ছবিখনত থাকিব । ছবিখনত অসমীয়া বহু শিল্পী কলা-কুশলীও জড়িত হৈ থাকিব । প্ৰথম যেতিয়া তেওঁলোকে কথাটো কৈছিল মই তেতিয়া বহুত সুখী হৈছিলোঁ ।"

আনহাতে ছবিখনৰ সন্দৰ্ভত পৰিচালক শ্ৰী প্ৰীতমে কয়, "ছবিখন এখন মিউজিকেল ড্ৰামা । জুবিন দাৰ এগৰাকী অনুৰাগীৰ আধাৰত ছবিখন নিৰ্মাণ কৰা হৈছে । ছবিখনত জুবিন দাৰ প্ৰতিগৰাকী অনুৰাগীয়ে নিজকে বিচাৰি পাব । জুবিন দাৰ প্ৰতি শ্ৰদ্ধাঞ্জলি জ্ঞাপন কৰি আমি এই ছবিখন নিৰ্মাণ কৰিছোঁ ।"

তেওঁ পুনৰ কয়, "কলিকতা আৰু গুৱাহাটীত ছবিখনৰ দৃশ্যগ্ৰহণ কৰা হ'ব । ছবিখন অসমীয়া আৰু বাঙালী ভাষাত মুক্তিলাভ লাভ কৰিব । এই বৰ্ষৰ শেষৰফালে ছবিখন মুক্তি দিয়াৰ পৰিকল্পনা কৰিছোঁ । জুলাইৰ প্ৰথম ভাগৰ পৰা দৃশ্যগ্ৰহণ কৰা হ'ব । প্ৰথমে কলিকতাত দৃশ্যগ্ৰহণ কৰা হ'ব তাৰ পাছত গুৱাহাটীত কৰা হ'ব ।"