ছেপ্টেম্বৰত ১৪ দিনৰ বাবে বন্ধ থাকিব বেংক: বেংকলৈ ওলোৱাৰ পূৰ্বে পৰীক্ষা কৰক বন্ধৰ তালিকা

হায়দৰাবাদ: ছেপ্টেম্বৰ মানেই যেন উৎসৱৰ বতৰ । উৎসৱ বুলিলেই বিভিন্ন চৰকাৰী কাৰ্যালয়ৰ দৰে বেংক কৰ্মচাৰীয়েও বন্ধৰ সুবিধা লাভ কৰে । বিগত বৰ্ষবোৰৰ দৰে এইবাৰো ভাৰতীয় ৰিজাৰ্ভ বেংকে ছুটীৰ তালিকা প্ৰকাশ কৰিছে ।

সেই তালিকা অনুসৰি সমগ্ৰ দেশৰ বিভিন্ন ৰাজ্যত উৎসৱ, আঞ্চলিক অনুষ্ঠান আৰু অন্যান্য বিশেষ অনুষ্ঠানৰ বাবে ২০২৬ চনৰ ছেপ্টেম্বৰ মাহত বেংকসমূহ কেইবাদিনো বন্ধ থাকিব ।

বেংকৰ ছুটীৰ দিন ৰাজ্য আৰু চহৰ অনুসৰি নিৰ্ধাৰণ কৰা হয় । অৰ্থাৎ এখন ৰাজ্য বা চহৰত বেংক বন্ধ থকা মানে আন এখন ৰাজ্যত বন্ধৰ দিন হ’বই লাগিব বুলি ক’ব নোৱাৰি । গতিকে বেংকলৈ যোৱাৰ পূৰ্বে নিজৰ চহৰৰ বাবে ছুটীৰ তালিকাখন নিশ্চয়কৈ পৰীক্ষা কৰি ল'ব ।

২০২৬ চনৰ ছেপ্টেম্বৰ মাহৰ উৎসৱ আৰু বিশেষ অনুষ্ঠানৰ বন্ধৰ সম্পূৰ্ণ তালিকা তলত দিয়া হ’ল:

• ৪ ছেপ্টেম্বৰ: জন্মাষ্টমী উপলক্ষে আহমেদাবাদ, ভূপাল, চণ্ডীগড়, চেন্নাই, ডেৰাডুন, হায়দৰাবাদ, জয়পুৰ, কলকাতা, লক্ষ্ণৌ, পাটনাকে ধৰি কেইবাখনো চহৰত বেংক বন্ধ থাকিব ।
• ১১ ছেপ্টেম্বৰ: জয়পুৰ পৌৰ নিগম অঞ্চলত নিৰ্বাচনৰ বাবে কেৱল জয়পুৰৰ বেংক কৰ্মচাৰীসকলে ছুটী লাভ কৰিব ।
• ১৪ ছেপ্টেম্বৰ: গণেশ চতুৰ্থী উপলক্ষে বেলাপুৰ, বেংগালুৰু, ভুৱনেশ্বৰ, চেন্নাই, হায়দৰাবাদ, মুম্বাই, নাগপুৰ, পানাজী আৰু বিজয়াৱাড়াত বেংক বন্ধ থাকিব ।
• ১৫ ছেপ্টেম্বৰ: সম্বৎসৰী/নুৱাখাই/গণেশ চতুৰ্থীৰ দ্বিতীয়দিন উপলক্ষে আহমেদাবাদ, ভুৱনেশ্বৰ আৰু পানাজীত বেংক বন্ধ থাকিব ।
• ২১ ছেপ্টেম্বৰ: শ্ৰীমন্ত শংকৰদেৱ জন্মোৎসৱ আৰু শ্ৰী নাৰায়ণ গুৰু সমাধি উপলক্ষে অসম, ভুৱনেশ্বৰ আৰু তিৰুৱনন্তপুৰমত ছুটীত থাকিব বেংকৰ কৰ্মচাৰীসকল ।
• ২২ ছেপ্টেম্বৰ: কৰ্ম পূজাৰ বাবে কেৱল ৰাঁচীত বন্ধ থাকিব বেংক ।
• ২৩ ছেপ্টেম্বৰ: মহাৰাজা হৰি সিং জীৰ জন্ম বাৰ্ষিকী উপলক্ষে জম্মু-শ্ৰীনগৰত বন্ধ থাকিব বেংক ।
• ২৫ ছেপ্টেম্বৰ: ইন্দ্ৰজাত্ৰা উৎসৱৰ বাবে গেংটকত বন্ধ থাকিব বেংক ।

ইয়াৰ উপৰিও আৰবিআইৰ নিয়ম অনুসৰি প্ৰতি মাহৰ দ্বিতীয় আৰু চতুৰ্থ শনিবাৰে বেংক বন্ধ থাকে । ২০২৬ চনৰ ছেপ্টেম্বৰ মাহত সমগ্ৰ দেশৰ সকলো বেংক ১২ ছেপ্টেম্বৰ (দ্বিতীয় শনিবাৰ) আৰু ২৬ ছেপ্টেম্বৰ (চতুৰ্থ শনিবাৰ) উপলক্ষে বন্ধ থাকিব । ইয়াৰ উপৰিও দেওবাৰৰ দিনটোত সাপ্তাহিক বন্ধৰ দিন হ’ব ।

বেংকসমূহ বন্ধ হোৱাৰ সময়ত আপোনাৰ বেংকৰ সেৱা সম্পূৰ্ণৰূপে প্ৰভাৱিত নহয় । ইউপিআই, ইণ্টাৰনেট বেংকিং, আৰু ম'বাইল বেংকিং আদি ডিজিটেল সেৱা প্ৰতিদিনৰ দৰে ২৪ ঘণ্টাই চলি থাকিব । আপুনি আপোনাৰ ধন ট্ৰান্সফাৰ কৰিব পাৰে বা অনলাইন পেমেণ্ট কৰিব পাৰে ।

নগদ ধন উলিওৱাৰ বাবেও খোলা থাকিব এটিএম । আৰবিআইৰ তথ্য অনুসৰি বছৰত ৩৬৫ দিন আৰ টিজিএছ সেৱাও উপলব্ধ হ'ব । কিন্তু নথি-পত্ৰ সম্পৰ্কীয় উদ্দেশ্য যেনে পাছবুক প্ৰিন্টিং বা ঋণ প্ৰক্ৰিয়াকৰণৰ বাবে বেংকসমূহ খোলাৰ বাবে অপেক্ষা কৰিব লাগিব ।

লগতে পঢ়ক: বৰপেটা সত্ৰত মহাপুৰুষ মাধৱদেৱৰ ৪৩০ সংখ্যক তিৰোভাৱ তিথি পালন