অচিৰেই সহজ হৈ পৰিব ভুৱা বেংক ৱেবছাইটৰ চিনাক্তকৰণ

নতুন দিল্লী: ডিজিটেল বেংকিঙে ভাৰতৰ অৰ্থনীতিক এক নতুন মাত্ৰা প্ৰদান কৰিছে যদিও একে সময়তে চাইবাৰ অপৰাধীৰ বাবে অপৰাধৰ ৰম্যভূমিও হৈ পৰিছে ৷ চাইবাৰ প্ৰৱঞ্চকে ভুৱা ৱেবছাইট, ইমেইল লিংক আৰু ম’বাইলৰ মেছেজৰ জৰিয়তে মানুহক টাৰ্গেট কৰি কষ্টোপাৰ্জিত ধন অনায়াসে লুণ্ঠন কৰিছে ।

ইফালে ভাৰতীয় ৰিজাৰ্ভ বেংকে শেহতীয়াকৈ বেংকিং খণ্ডত চাইবাৰ সুৰক্ষা শক্তিশালী কৰাৰ লগতে অনলাইন অপৰাধ ৰোধৰ বাবে এক বৃহৎ পদক্ষেপ গ্ৰহণ কৰিছে । এই সন্দৰ্ভত আৰ বি আইয়ে সকলো বেংককে নিজৰ অফিচিয়েল ৱেবছাইট ডমেইন ‘.bank.in’ লৈ সলনি কৰিবলৈ নিৰ্দেশ দিয়াৰ সিদ্ধান্ত লয় ।

মন কৰিবলগীয়া যে আৰ বি আইৰ এই পদক্ষেপ কেৱল নাম সলনি নহয়, বৰঞ্চ সমগ্ৰ ডিজিটেল বেংকিং পৰিৱেশ তন্ত্ৰত ব্যৱস্থাগত স্বচ্ছতাৰ দিশত এক উল্লেখযোগ্য পদক্ষেপ । এই পদক্ষেপে বেংকৰ গ্ৰাহকৰ নগদ ধন আৰু ব্যক্তিগত তথ্যৰ সুৰক্ষা নিশ্চিত কৰাত গুৰুত্বপূৰ্ণ ভূমিকা ল’ব পাৰে ।

'.bank.in' ডমেইন কি ?

এটা কোম্পানীৰ ডমেইন নাম হ’ল ইয়াৰ ৱেবছাইটৰ ঠিকনা । বেংকৰ '.bank.in' হৈছে ভাৰতীয় বেংকৰ বাবে বিশেষভাৱে ডিজাইন কৰা এটা সুৰক্ষিত শীৰ্ষ পৰ্যায়ৰ ডমেইন । ইয়াক ইনষ্টিটিউট ফৰ ডেভেলপমেণ্ট এণ্ড ৰিচাৰ্চ ইন বেংকিং টেকন’ল’জি (আই ডি আৰ বি টি) আৰু ইলেক্ট্ৰনিকছ এণ্ড ইনফৰ্মেশ্যন টেকন’ল’জি মন্ত্ৰালয়(মেইটৱাই) ৰ সহযোগত প্ৰস্তুত কৰা হৈছিল ।

এই ডমেইন কেৱল অনুমোদিত আৰু স্বীকৃতিপ্ৰাপ্ত বেংককহে প্ৰদান কৰা হ’ব । অৰ্থাৎ কোনো প্ৰৱঞ্চনামূলক বা অকৰ্তৃত্বশীল সত্তাই ইয়াত প্ৰৱেশ কৰিব নোৱাৰিব । ইয়াৰ পঞ্জীয়ন, পৰীক্ষণ আৰু পৰিচালনা সম্পূৰ্ণৰূপে নিয়ন্ত্ৰিত আৰু সুৰক্ষিত হ’ব ।

কিয় এই পদক্ষেপ গ্ৰহণ কৰিলে ভাৰতীয় ৰিজাৰ্ভ বেংকে ?

আৰ বি আইৰ তথ্য অনুসৰি, যোৱা কিছু বছৰত ভুৱা বেংক ৱেবছাইট আৰু ডমেইন ক্ল’নিঙৰ ফলত যথেষ্ট সংখ্যক চাইবাৰ অপৰাধ সংঘটিত হৈছিল । চাইবাৰ অপৰাধীয়ে সাধাৰণতে গ্ৰাহকৰ পৰা ব্যক্তিগত তথ্য চুৰি কৰিবলৈ প্ৰকৃত ৱেবছাইটৰ দৰে দেখা ডমেইন তৈয়াৰ কৰে, প্ৰায়ে তেওঁলোকক প্ৰতাৰণা কৰে ।

এই সমস্যাৰ সমাধানৰ বাবে আৰ বি আইয়ে সিদ্ধান্ত লয় যে প্ৰতিটো বেংকৰ ৱেবছাইট ডমেইন এতিয়া ‘.bank.in’ ৰে শেষ হ’ব । উদাহৰণস্বৰূপে, এছ বি আইৰ ৱেবছাইট হ’ব www.icici.bank.in । ইয়াৰ ফলত গ্ৰাহকে প্ৰকৃত আৰু ভুৱা ৱেবছাইটৰ মাজত পাৰ্থক্য নিৰ্ণয় কৰিবলৈ সহজ হ’ব আৰু প্ৰৱঞ্চনামূলক কাৰ্যকলাপ হ্ৰাস পাব ।

এই ডমেইনে অনলাইন সুৰক্ষা কেনেকৈ বৃদ্ধি কৰিব ?

এতিয়া প্ৰতিটো বেংকৰ ৱেবছাইট ‘.bank.in’ ৰে শেষ হোৱাৰ লগে লগে গ্ৰাহকে গম পাব যে তেওঁলোক প্ৰকৃত চাইটত আছে নে ভুৱা চাইটত আছে । ইয়াৰ উপৰিও, এই ডমেইনত DNS সুৰক্ষা সম্প্ৰসাৰণ, ইমেইল প্ৰমাণীকৰণ আৰু SSL/TLS এনক্ৰিপচনৰ দৰে প্ৰযুক্তিসমূহো অন্তৰ্ভুক্ত কৰা হ'ব, যিয়ে কোনো তথ্য বা লেনদেনক বাধা দিয়াত প্ৰতিবন্ধকতা আৰোপ কৰিব ৷

লগতে পঢ়ক: অষ্টম দৰমহা আয়োগে কেতিয়া দাখিল কৰিব প্ৰতিবেদন ? কিমান বৃদ্ধি পাব কৰ্মচাৰীৰ দৰমহা