নীট পৰীক্ষাৰ প্ৰশ্নকাকত ফাদিলৰ ফলত প্ৰভাৱিত শিক্ষাৰ্থীৰ বাবে এটা ভাল খবৰ

কোটা: দেশৰ সৰ্ববৃহৎ মেডিকেল প্ৰৱেশ পৰীক্ষা নীট ইউজিৰ (NEET UG 2026) প্ৰশ্নকাকত ফাদিলক লৈ দেশজুৰি প্ৰতিক্ৰিয়া অব্যাহত আছে । তাৰ মাজতে এক গুৰুত্বপূৰ্ণ খবৰ । অহা ২১ জুনত পুনৰ পৰীক্ষা অনুষ্ঠিত হোৱাৰ সম্ভাৱনা আছে । লগতে প্ৰভাৱিত শিক্ষাৰ্থীসকলক প্ৰৱেশ পৰীক্ষাৰ বাবে পূৰ্বে পৰিশোধ কৰা মাচুলো ঘূৰাই দিয়াৰ সিদ্ধান্ত লোৱা হৈছে ।

ইতিমধ্যে নেশ্ব'নেল টেষ্টিং এজেন্সিয়ে যোৱা ২২ মে'ৰ পৰা নিজৰ অফিচিয়েল ৱেবছাইটত মাচুল ঘূৰাই দিয়াৰ প্ৰক্ৰিয়া আৰম্ভ কৰিছে । প্ৰথমে মাচুল ঘূৰাই বিচৰাৰ বাবে আবেদনৰ সময়সীমা ২৭ মে' নিৰ্ধাৰণ কৰা হৈছিল । কিন্তু এই নিৰ্দিষ্ট সময়সীমাৰ ভিতৰত মাত্ৰ ১৩ লাখ পৰীক্ষাৰ্থীয়েহে মাচুল ঘূৰাই বিচাৰি আবেদন কৰিবলৈ সক্ষম হয় । অৱশ্যে শিক্ষাৰ্থীসকলে সন্মুখীন হোৱা বিভিন্ন অসুবিধাৰ কথা বিবেচনা কৰি নেশ্ব'নেল টেষ্টিং এজেন্সিয়ে আবেদন কৰাৰ সময়সীমা ২০২৬ চনৰ ২২ জুনলৈ বৃদ্ধি কৰিছে ।

কোটাৰ এটা ব্যক্তিগত প্ৰতিষ্ঠানৰ কেৰিয়াৰ কাউন্সেলিং বিশেষজ্ঞ পাৰিজাত মিশ্ৰই কয়, "এনটিএই ২৭ মে' বুধবাৰে নিশা অফিচিয়েল পৰ্টেলত এক অধিসূচনা জাৰি কৰিছিল । এই অধিসূচনা অনুসৰি নীট ইউজিৰ বাবে আবেদন কৰা ২২.৭৯ লাখ প্ৰাৰ্থীৰ ভিতৰত মাত্ৰ ১৩ লাখ প্ৰাৰ্থীয়েহে ধন ঘূৰাই বিচাৰি বেংকৰ সবিশেষ দাখিল কৰিছে । ফলস্বৰূপে এই সময়সীমা বৃদ্ধি কৰা হৈছে; শিক্ষাৰ্থীসকলে এতিয়া ২২ জুনৰ নিশা ১১:৫০ বজালৈকে আবেদন পাৰিব ।"

মিশ্ৰই লগতে কয় যে প্ৰাৰ্থীসকলে বেংকৰ সবিশেষ-বিশেষকৈ যিটো একাউণ্টত তেওঁলোকে ধন ঘূৰাই বিচাৰে-ৱেবছাইটত আপলোড কৰিব লাগিব । সংস্থাটোৱে শিক্ষাৰ্থীসকলৰ সম্পূৰ্ণ মাচুল সেই একাউণ্টসমূহলৈ প্ৰেৰণ কৰিব; এই সুবিধাৰ বাবে পৰীক্ষাৰ্থীসকলে একাউণ্ট নম্বৰ, নাম, বেংকৰ নাম, আইএফএছচি নম্বৰ আৰু এখন কেনচেল চেকৰ ফটো আপলোড কৰিব লাগিব । চেকখনৰ ফটো আপলোড কৰাটো বাধ্যতামূলক নহয় যদিও তথ্যৰ কোনো ধৰণৰ অমিল হ'লে প্ৰদান কৰা সবিশেষ পৰীক্ষা কৰিবলৈ ইয়াক ব্যৱহাৰ কৰিব পাৰে । মিশ্ৰই লগতে কয় যে শিক্ষাৰ্থীসকলে এনটিএৰ অফিচিয়েল ৱেবছাইটত উপলব্ধ নিৰ্দিষ্ট মাচুল ঘূৰাই দিয়া পৰ্টেলত ক্লিক কৰিব লাগিব । পৰ্টেলত তেওঁলোকে তেওঁলোকৰ এপ্লিকেশ্ব'ন নম্বৰ আৰু পাছৱৰ্ড ব্যৱহাৰ কৰি লগ ইন কৰিব লাগিব, তাৰ পিছত তেওঁলোকে প্ৰয়োজনীয় তথ্য পূৰণ কৰিব লাগিব ।

এনটিএয়ে অধিসূচনাত স্পষ্টভাৱে উল্লেখ কৰিছে যে এবাৰ এজন ছাত্ৰই তেওঁলোকৰ বেংকৰ সবিশেষ পূৰণ কৰি জমা দিলে সেই সবিশেষ চূড়ান্ত আৰু শুদ্ধ বুলি গণ্য কৰা হ'ব । তাৰ পিছত তথ্যসমূহ শুধৰণিৰ আৰু কোনো সুযোগ দিয়া নহ'ব ।

ধন ঘূৰাই বিচাৰি আবেদন কৰিবলৈ এই নথি-পত্ৰসমূহৰ প্ৰয়োজন :

• একাউণ্ট নম্বৰ
• একাউণ্ট হ'ল্ডাৰৰ নাম
• বেংকৰ নাম
• আইএফএছচি নম্বৰ
• কেনচেল চেকৰ ফটো

কিমান মাচুল ঘূৰাই পাব ?

পাৰিজাত মিশ্ৰই উল্লেখ কৰে যে পৰীক্ষাৰ প্ৰ-পত্ৰ পূৰণৰ সময়ত জেনেৰেল শিক্ষাৰ্থীৰ পৰা ১৭০০ টকা, অ'বিচি আৰু ইডব্লিউএছ শিক্ষাৰ্থীৰ পৰা ১৬০০ টকা, অনুসূচিত জাতি, অনুসূচিত জনজাতি আৰু বিশেষভাৱে সক্ষম পৰীক্ষাৰ্থীৰ পৰা ১০০০ টকা মাচুল সংগ্ৰহ কৰা হৈছিল । এই সমগ্ৰ ধন শিক্ষাৰ্থীয়ে উল্লেখ কৰা বেংক একাউণ্টলৈ পোনপটীয়াকৈ প্ৰেৰণ কৰা হ'ব ।

মাচুল ঘূৰাই দিয়া প্ৰক্ৰিয়া

• এনটিএৰ ৱেবছাইটত থকা মাচুল ঘূৰাই দিয়া (ৰিফান্ণ্ড) লিংকত ক্লিক কৰক
• এবাৰ পৰ্টেল খোলাৰ পিছত আপোনাৰ নীট ইজি এপ্লিকেশ্ব'ন নম্বৰ আৰু পাছৱৰ্ড ব্যৱহাৰ কৰি লগ ইন কৰক
• আপুনি বেংক একাউণ্টৰ সবিশেষ লিখক
• চেক এখনৰ ফটো আপলোড কৰক

লগতে পঢ়ক :

পূৰ্বৰ ভুলৰ পৰা কোনো শিক্ষা নল’লে ! NEET-UG ৰ কাকত ফাদিল সন্দৰ্ভত কেন্দ্ৰৰ উত্তৰ বিচাৰিলে সৰ্বোচ্চ ন্য়ায়ালয়ে

২৫ লাখত নীটৰ প্ৰশ্নকাকত ক্ৰয়, একেটা পৰিয়ালৰ পাঁচ শিক্ষাৰ্থী নীটত উত্তীৰ্ণৰ ৰহস্য