সংসদৰ বাজেট অধিৱেশন ২০২৬ LIVE : যুদ্ধৰ বাবে ভাৰতীয় বিমান সংস্থাই বাতিল কৰিলে ৪৩৩৫খন বিমান, ৰাজ্যসভাত চৰকাৰৰ উত্তৰ

সোমবাৰে ৰাজ্যসভাত অসামৰিক বিমান পৰিবহণ মন্ত্ৰী কে ৰামামোহন নাইডুৱে কয় যে পশ্চিম এছিয়াৰ সংঘাতৰ বাবে ভাৰতীয় বিমান সংস্থাই এতিয়ালৈকে ৪৩৩৫খন বিমান আৰু বিদেশী বিমান সংস্থাই ১১৮৭খন বিমান বাতিল কৰিছে ।

আমেৰিকা, ইজৰাইল, ইৰাণৰ মাজত হোৱা যুদ্ধৰ বাবে মধ্যপ্ৰাচ্যৰ আকাশমাৰ্গ বন্ধ হৈ পৰাৰ ফলত বিমান সেৱাত যথেষ্ট ব্যাঘাত জন্মিছে । প্ৰশ্নোত্তৰ কালত মন্ত্ৰীগৰাকীয়ে কয় যে বিমান সংস্থাৰ পৰিচালনাৰ সুৰক্ষাই সৰ্বোচ্চ অগ্ৰাধিকাৰ । নাইডুৱে কয় যে মধ্যপ্ৰাচ্যত আকাশমাৰ্গ বন্ধ হোৱাৰ বাবে বিমান বাতিলৰ সন্দৰ্ভত এতিয়ালৈকে ভাৰতীয় বিমান সংস্থাই ৪৩৩৫খন বিমান আৰু বিদেশী বিমান সংস্থাই ১১৮৭খন বিমান বাতিল কৰিছে ।

এই কঠিন সময়ত কাৰ্যকৰী সুৰক্ষা সৰ্বোচ্চ বুলি উল্লেখ কৰে মন্ত্ৰীগৰাকীয়ে । তেওঁ উল্লেখ কৰে যে যেতিয়া আকাশমাৰ্গ বন্ধ হৈ থাকে তেতিয়া এই অঞ্চলত কাম কৰি লাভ নাই । নাইডুৱে উল্লেখ কৰে যে অসামৰিক বিমান পৰিবহণ মন্ত্ৰালয় আৰু অসামৰিক বিমান পৰিবহণ সঞ্চালকালয়ে সেই নিৰ্দিষ্ট দেশসমূহৰ নিয়ন্ত্ৰকসকলৰ সৈতে অহৰহ আলোচনাত মিলিত হৈ আছে ।

নাইডুৱে কয় যে তেওঁৰ মন্ত্ৰালয় আৰু ডিজিচিএই স্থানীয় কৰ্তৃপক্ষৰ সৈতে কাম কৰি নিৰাপদ কাৰ্যকলাপ নিশ্চিত কৰিছে । মন্ত্ৰীগৰাকীয়ে কয় যে কিছুমান আকাশমাৰ্গ এতিয়াও বন্ধ হৈ আছে আৰু আমি সেইবোৰৰ সুবিধাৰ বাবে যৎপৰোনাস্তি চেষ্টা কৰিছো । "কিন্তু প্ৰথম আৰু প্ৰধান কথাটো হ'ল আকাশমাৰ্গ মুকলি হ'ব লাগিব । ভ্ৰমণৰ বাবে ই নিৰাপদ হ'ব লাগিব । তেতিয়াহে আমি নিয়মীয়া ভ্ৰমণ আৰম্ভ কৰিব পাৰিম ।" তেওঁ কয় ৷

কেন্দ্ৰীয় বিত্তমন্ত্ৰী নিৰ্মলা সীতাৰমণে সোমবাৰে ৰাজ্যসভাত বিনিয়োগ বিধেয়ক, ২০২৬ উত্থাপন কৰে । এই বিধেয়কখনে ভাৰত চৰকাৰক অতিৰিক্ত ৰাজহুৱা ব্যয় (সাৰ, প্ৰতিৰক্ষা, খাদ্য, ৰাজসাহায্য)ৰ বাবে ভাৰতৰ সমন্বিত পুঁজিৰ পৰা ধন উলিয়াবলৈ কৰ্তৃত্ব প্ৰদান কৰে ।

ৰাজ্যসভা স্থগিত ৰখা হৈছে আৰু দুপৰীয়া ২ বজাত পুনৰ বৈঠক অনুষ্ঠিত হ’ব ।

পশ্চিম এছিয়াত চলি থকা সংঘাতৰ মাজতে ৰাজ্যসভাৰ বিৰোধী দলৰ নেতা মল্লিকাৰ্জুন খাৰ্গে সদনত LPG যোগানৰ পৰিস্থিতিক লৈ উদ্বেগ প্ৰকাশ কৰে । এই বিষয়টোৰ প্ৰতি চৰকাৰৰ দৃষ্টি আকৰ্ষণ কৰি খাৰ্গে কয় যে এই পৰিস্থিতিয়ে মধ্যবিত্ত শ্ৰেণী, ৰেষ্টুৰেণ্ট, হোষ্টেল আৰু অন্যান্য বাণিজ্যিক ব্যৱহাৰকাৰীসকলক প্ৰভাৱিত কৰিছে । তেওঁ লগতে কয় যে বৰ্তমানৰ সংকটৰ সময়ত এল পি জিৰ উপলব্ধতা আৰু মূল্যৰ স্থিৰতা দুয়োটা গুৰুতৰ চিন্তাৰ বিষয় হৈ পৰিছে ।

খৰ্গেয়ে এল পি জিৰ অভাৱ নাই বুলি চৰকাৰৰ দাবীকো প্ৰশ্ন উত্থাপন কৰি কয় যে ভূমিৰ বাস্তৱতাই কেন্দ্ৰীয় চৰকাৰৰ আশ্বাসৰ বিৰোধী । তেওঁ লোকসভাত কেন্দ্রীয় পেট্ৰ’লিয়াম মন্ত্রীগৰাকীৰ পূর্বতে দিয়া বক্তব্যৰ উদ্ধৃতি দি তেওঁ কয় যে দেশত এল পি জিৰ অভাৱ নাই ৷

কেন্দ্ৰীয় বিত্তমন্ত্ৰী নিৰ্মলা সীতাৰমণে লোকসভাত কয় যে অপ্ৰতিনিধিত্বশীল গোট বিশেষকৈ অনুসূচিত জাতি-জনজাতি সম্প্ৰদায় আৰু মহিলাসকলৰ বাবে সুযোগ বৃদ্ধিৰ বাবে ষ্টেণ্ড আপ ইণ্ডিয়া আঁচনি আৰম্ভ কৰা হৈছে । কংগ্ৰেছৰ সাংসদ শশী থাৰুৰৰ প্ৰশ্নৰ উত্তৰত সীতাৰমণে কয় যে পূৰ্বৰ ষ্টাৰ্ট আপ ইণ্ডিয়াৰ পদক্ষেপে চহৰ অঞ্চলৰ লোকসকলক অধিক উপকৃত কৰিছিল । তেওঁ আৰু কয় যে সমগ্ৰ দেশৰ অনুসূচিত জাতি/জনজাতীয় জনগোষ্ঠী আৰু মহিলাসকলৰ বাবে উদ্যোগীকৰণ আৰু ঋণৰ অধিক সুবিধা নিশ্চিত কৰাৰ বাবে ষ্টেণ্ড আপ ইণ্ডিয়া আঁচনি আৰম্ভ কৰা হৈছিল ।

উচ্চ সদনৰ কাৰ্যকাল সম্পূৰ্ণ কৰা ন্যায়াধীশ (অৱসৰপ্ৰাপ্ত) ৰঞ্জন গগৈক সোমবাৰে ৰাজ্যসভাই বিদায় দিয়ে । সকলো দলৰ সদস্যই তেওঁৰ কাৰ্যকালত তেওঁৰ অৱদানৰ প্ৰশংসা কৰি ভৱিষ্যতৰ বাবে শুভকামনা জনায় ।

লোকসভাৰ অধ্যক্ষ ওম বিৰলাই সকলো দলৰ নেতালৈ লিখা পত্ৰ সন্দৰ্ভত প্ৰতিক্ৰিয়া প্ৰকাশ কৰি বিজেপিৰ সাংসদ কংগনা ৰনৌতে কয়, ‘‘বীৰলা জীয়ে যিয়েই নকৰক কিয়, তেওঁ সদনৰ মৰ্যাদা বজাই ৰাখিবলৈ কৰে, ঠিক যেনেকৈ জগদম্বিকা পাল জীয়েও সদনৰ মৰ্যাদাৰ বাবে কাম কৰে ।’’