ৰামোজী ফিল্ম চিটীৰ উদ্যোগত চিনে মেজিকেল গ্ল’ ৰাণ শীৰ্ষক দৌৰ প্ৰতিযোগিতা

হায়দৰাবাদ: হায়দৰাবাদস্থিত ৰামোজী ফিল্ম চিটীয়ে আয়োজন কৰিছে এক অনন্য অনুষ্ঠান ৷ ১৪ মাৰ্চত অনুষ্ঠিত হ’বলগীয়া এই অনুষ্ঠানটো জনা যাব চিনে মেজিকেল গ্ল’ ৰাণ হিচাপে ৷ পদ্মশ্ৰী বঁটাপ্ৰাপক তথা কোচিপুড়ী নৃত্যশিল্পী দীপিকা ৰেড্ডী, আন্তঃৰাষ্ট্ৰীয় ধনুৰ্বিদ জ্যোতি সুৰেখা ভেন্নমে ৰামোজী ফিল্ম চিটীস্থিতি চিতাৰা হোটেলত মঙলবাৰে অনুষ্ঠানৰ জাৰ্ছী, বিজয়ীক দিবলগীয়া পদক মুকলি কৰে ৷

নৃত্যশিল্পী ৰেড্ডীয়ে চিনে মেজিকেল গ্ল’ ৰাণক ফিটনেছ, আনন্দ আৰু হাতে হাত ধৰি একেলগে আগবঢ়াৰ বাবে আয়োজিত এক প্ৰেৰণাদায়ক আৰু ঐক্যবদ্ধ অনুষ্ঠান বুলি অভিহিত কৰে ।

জাৰ্ছী মুকলি অনুষ্ঠানটোত অংশগ্ৰহণ কৰি দীপিকা ৰেড্ডীয়ে ভাষণ প্ৰসংগত কয়, ‘‘গ্ল’ ৰাণত জয় বা পৰাজয়ৰ কথা নাই । ইয়াত অংশগ্ৰহণ কৰা প্ৰতিজনেই বিজয়ী । এই দৌৰৰ জৰিয়তে আনন্দ, শক্তি আৰু নিজৰ নিজৰ গতিবিধি নিৰীক্ষণ কৰা হ’ব ৷’’ তেওঁ লগতে কয় যে এনেধৰণৰ অনুষ্ঠানে সকলো বয়সৰ লোকক সক্ৰিয় হৈ থাকিবলৈ প্ৰেৰণা যোগায় ।

আনহাতে, জ্যোতি সুৰেখা ভেন্নমে একেধৰণৰ কথাকে সমৰ্থন জনাই নিজা ভাষণৰ জৰিয়তে দৈনন্দিন জীৱনত ফিটনেছৰ বিষয়টোত গুৰুত্ব আৰোপ কৰে । ‘‘দৌৰাটো আমাৰ জীৱনশৈলীৰ অংশ হোৱা উচিত । ই আমাক শাৰীৰিক স্বাস্থ্য অটুট ৰখাত সহায় কৰে আৰু মানসিক শান্তিও প্ৰদান কৰে’’ বুলি ভেন্নমে কয় ৷

Run Director অভিষেক মিশ্ৰই অনুষ্ঠানটোৰ উদ্দেশ্য ব্যাখ্যা কৰে ৷ তেওঁ কয় যে এই অনুষ্ঠানত প্ৰথমবাৰৰ বাবে দৌৰবিদ, সাধাৰণ লোকসকল, অভিজ্ঞ খেলুৱৈকে ধৰি সকলো শ্ৰেণীৰ জনসাধাৰণৰ অংশগ্ৰহণক উৎসাহিত কৰা হৈছে । গ্ল’ ৰাণ ৩০০০, ৫০০০ আৰু ১০০০০ ৰ শাখাত অনুষ্ঠিত হ’ব ৷ অনুষ্ঠানটোৰ দৌৰ আৰম্ভ হ’ব সন্ধিয়া ৫.৩০ বজাৰ পৰা, যিয়ে অংশগ্ৰহণকাৰীসকলক অনন্য অভিজ্ঞতা প্ৰদান কৰিব ।

এই জাৰ্ছী আৰু পদক মুকলি অনুষ্ঠানত অংশগ্ৰহণ কৰাসকলৰ ভিতৰত স্বাস্থ্য বিভাগৰ মুখ্য গ্ৰোথ বিষয়া প্ৰভু, ৰেনোভা হাস্পতালৰ মুখ্য কাৰ্যবাহী বিষয়া ৰবীন্দ্ৰনাথ আৰু ৰামোজী ফিল্ম চিটীৰ উপ-সভাপতি(বিপণন) এ ভি ৰাও অন্যতম ।

পঞ্জীয়নভুক্ত অংশগ্ৰহণকাৰীসকলৰ বাবে এল বি নগৰৰ পৰা বিনামূলীয়া যাতায়াতৰ ব্যৱস্থা কৰা হ’ব বুলি আয়োজকসকলে অনুষ্ঠানটোত ঘোষণা কৰে । পঞ্জীয়ন আৰু অধিক বিৱৰণৰ বাবে অংশগ্ৰহণকাৰীসকলে www.ramojifilmcity.com চাব পাৰে বা 76598-76598 নম্বৰত যোগাযোগ কৰিব পাৰে ।

লগতে পঢ়ক: এখন বিশেষ মহিলা বজাৰ; শতাধিক মহিলা বিক্ৰেতাৰ বজাৰখন হৈ পৰিছে আকৰ্ষণৰ কেন্দ্ৰবিন্দু