অৰুণাচলী কণমানিক 'চাইনীজ' বুলি কৰা মন্তব্যই তোলপাৰ লগাইছে দেশত

ইটানগৰ(অৰুণাচল প্ৰদেশ) :অৰুণাচল প্ৰদেশবাসীক লৈ একাংশৰ কেতিয়া সলনি হ'ব চিন্তাধাৰা ? কাৰণ এগৰাকী কণমানিৰ কাতৰ আহ্বানে দেশবাসীক পুনৰ ভবাই তুলিছে ৷

ভাৰতীয় নাগৰিক হোৱাৰ পাছতো অৰুণাচল প্ৰদেশৰ লোকক একাংশ লোকে চীনা নাগৰিক বুলিয়ে ইতিকিং কৰি আহিছে, সেয়া লাগিলে সামাজিক মাধ্যম বা ৰাজহুৱা স্থানতে হওক ৷ উল্লেখ্য যে সামাজিক মাধ্যমত কেতবোৰ ৰীল আপলোড কৰাৰ পাছত, সেই ৰীলত একাংশ ব্যৱহাৰকাৰীয়ে অৱাস্তব প্ৰশ্নই উক্ত কথাবোৰ মনলৈ আনিছে !

শেহতীয়াকৈ এগৰাকী অৰুণাচল প্ৰদেশৰ কণমানিয়ে পৰিচয় দিবলগীয়া হৈছে যে, তেওঁ চীনৰ নাগৰিক নহয়, তেওঁ ভাৰতৰহে নাগৰিক ৷ এই ঘটনাটোক সচেতন নাগৰিকে অতি দুৰ্ভাগ্যজনক ঘটনা বুলি আখ্যা দিছে ৷ সাংসদ মহুৱা মৈত্ৰই এক্সত এনে ঘটনাৰ তীব্ৰ সমালোচনা কৰে ৷

ঘটনা অনুসৰি, ইটানগৰৰ কাৰ্গা টিংকল গংগোৱ নামৰ কণমানিটোক এজন সামাজিক মাধ্যম ব্যৱহাৰকাৰীয়ে চাইনীজ বুলি মন্তব্য কৰিছিল ৷ এই মন্তব্যৰ পাছত সামাজিক মাধ্যম যোগে তথা নিউজ এজেঞ্চী এএনআইৰ আগত কণমানি কয়,"মোক চাইনীজ বুলি নক'ব, মই ভাৰতী ৷"

কণমানিজনীৰ এই আহ্বানে সামাজিক মাধ্যমত তোলপাৰ লগাইছে ৷ কণমানী কাৰ্গা টিংকল গংগোৱে কয়,"এগৰাকী দাদাই মোক চাইনীজ বুলি মাতিছিল ৷ গতিকে মই তেওঁক ক’লো, মোক চাইনীজ বুলি নক’ব, ভাৰতীয় বুলি কওক।"

আনহাতে, ভাৰতীয় বুলি প্ৰমাণ দিবলৈ কণমানিজনীয়ে ৰাষ্ট্ৰীয় সংগীত 'জন গণ মন' গাব লগীয়া হ'ল ৷ ঘটনাৰ সন্দৰ্ভত কণমানি গংগোৰ মাতৃয়ে কয়,"এখন দোকানত গংগোৱে আইচক্ৰীম ক্ৰয় কৰি থাকোটে এটা ভিডিঅ' প্ৰস্তুত কৰা হৈছিল ৷ মোৰ পৰা আইচক্ৰীম কিনিবলৈ তাই ১০ টকা খুজিছিল ৷ সেই ভিডিঅ' অপলোড কৰা হৈছিল ৷"

তেওঁ লগতে কয়,"সেই ভিডিঅ'টো দেখি এজন সামাজিক মাধ্যম ব্যৱহাৰকাৰীয়ে এই চীনা শিশুৱে কিয় হিন্দী কথা কৈছে ? বুলি কমেন্ট কৰিছিল ৷ যাৰ বাবে আমি দুখেৰে ক'বলগীয়া হ'ল, আমি চাইনীজ নহয়, আমি ভাৰতীয় বুলি ৷ আমি ভাৰতীয় হোৱাৰ পাছতো আমাক চাইনীজ বুলি কোৱাটে দুৰ্ভাগ্যজনক ৷"

লগতে পঢ়ক: বিজেপিত 'জেন জি' জিন্দাবাদ: নৱগঠিত 'জেন জি' সমিতিৰ সৈতে নীতিন নবীনৰ প্ৰথম বৈঠক