দিল্লী এইমছৰ বিৰুদ্ধে ভয়ংকৰ অভিযোগ! ১৩ বছৰে নাপালে এটা তাৰিখ, প্ৰাণ হেৰুৱালে তনভিয়ে

নতুন দিল্লী: দেশৰ আগশাৰীৰ চিকিৎসা প্ৰতিষ্ঠান দিল্লী এইমছৰ বিৰুদ্ধে গাফলতি আৰু লেহেমীয়া চিকিৎসাৰ অভিযোগ উত্থাপন হৈছে । দিল্লী এইমছৰ এনে এক মৰ্মান্তিক ঘটনা পোহৰলৈ আহিছে ।

মঙলবাৰে এইমছ চৌহদত ৰাজস্থানৰ কোটাৰ তনভি নামৰ ১৫ বছৰীয়া কিশোৰীগৰাকীয়ে প্ৰাণ হেৰুৱায় ।

মৃত কিশোৰীগৰাকীৰ পিতৃ মুকেশ পৰিয়ানীয়ে চিকিৎসালয় প্ৰশাসন আৰু চিকিৎসকৰ বিৰুদ্ধে গুৰুতৰ অভিযোগ উত্থাপন কৰি কয় যে জটিল হৃদৰোগত আক্ৰান্ত তেওঁৰ কন্যাই ১৩ বছৰ ধৰি অস্ত্ৰোপচাৰৰ তাৰিখ বিচাৰি এইমছত ঘূৰি ফুৰিছিল । কিন্তু চিকিৎসালয়ৰ লেহেমীয়া নীতিৰ বাবে সময়মতে অস্ত্ৰোপচাৰ কৰা নহ’ল । এই লেহেমীয়া নীতি আৰু গাফিলতিয়ে অৱশেষত তাইৰ জীৱন হেৰুৱাই পেলালে ।

২ বছৰ বয়সৰ পৰা এইমছত চলি আছিল চিকিৎসা

কোটাৰ বাসিন্দা তনভি জন্মগতভাৱে হৃদৰোগ (ভেণ্টিকুলাৰ ষ্টেপল ডিফেক্ট তথা ভিএছডিৰ লগতে পালমনেৰী এত্ৰেছিয়া)ত আক্ৰান্ত হৈ আছিল । যেতিয়া তনভি ২ বছৰীয়া আছিল তেতিয়াই এক আশা লৈ প্ৰথমবাৰৰ বাবে দিল্লী এইমছলৈ আনিছিল ।

পৰিয়ালৰ অভিযোগ অনুসৰি ২০১৪ চনত চিকিৎসালয়ৰ নথি-পত্ৰত অস্ত্ৰোপচাৰৰ পৰামৰ্শ দিয়া হৈছিল আৰু ২০১৫ চনত অস্ত্ৰোপচাৰৰ তাৰিখো নিৰ্ধাৰণ কৰা হৈছিল ।

কিন্তু পৰৱৰ্তী সময়ত বিভিন্ন অজুহাত দেখুৱাই অস্ত্ৰোপচাৰৰ দিন পিছুৱাই লৈ যায় । পিতৃ মুকেশ পৰিয়ানীয়ে কয় যে যদি সময় থাকোতেই চিকিৎসকে অস্ত্ৰোপচাৰ কৰিলেহেঁতেন তেন্তে তেওঁৰ কন্যা আজি জীৱিত অৱস্থাত থাকিলহেঁতেন । ২৪ আগষ্টৰ পৰা ৩১ আগষ্টলৈকে চিকিৎসকে তেওঁৰ কন্যাক এবাৰো নোচোৱাৰ অভিযোগ কৰে ।

চিকিৎসালয়ৰ ৰেকৰ্ড অনুসৰি ২৪ আগষ্টত পুনৰ এইমছত তনভিক ভৰ্তি কৰোৱা হৈছিল। চিকিৎসকে জনোৱা মতে, তেওঁৰ কম্বাইণ্ড হাৰ্ট আৰু হাওঁফাওঁ ট্ৰান্সপ্লাণ্টৰ বাবে ৱৰ্ক-আপ চলি আছিল । সোমবাৰে সন্ধিয়া প্ৰায় ৭ বজাত এণ্ড’স্কপি প্ৰক্ৰিয়া সম্পন্ন কৰা হয়, তাৰ পিছত তেওঁৰ স্বাস্থ্যৰ অৱনতি ঘটিবলৈ ধৰে ।

চিটিভিএছ কেন্দ্ৰৰ মুৰব্বী ডাঃ ভি দেৱগৌৰুৱে বুজাই দিয়ে যে মঙলবাৰে পুৱা প্ৰায় ২:৫০ বজাত কিশোৰীগৰাকীয়ে অত্যন্ত দুৰ্বলতা অনুভৱ কৰাৰ লগতে উশাহ-নিশাহ লোৱাত অসুবিধা পোৱা বুলি অভিযোগ উত্থাপন কৰে । কিশোৰীগৰাকীৰ অক্সিজেনৰ মাত্ৰা ৪৮ শতাংশলৈ হ্ৰাস পায় যদিও চিকিৎসকে অক্সিজেন দি সুস্থিৰ কৰাৰ চেষ্টা কৰিছিল । কিন্তু তাইক পুনৰুজ্জীৱিত কৰিব নোৱাৰি পুৱা প্ৰায় ৫:০৬ বজাত মৃত ঘোষণা কৰে ।

কন্যাৰ মৃত্যুত পৰিয়ালটো গভীৰভাৱে শোকত ভাগি পৰে । শোকসন্তপ্ত পিতৃয়ে এইমছ প্ৰশাসনৰ বিৰুদ্ধে তীব্ৰ ক্ষোভ প্ৰকাশ কৰি মৃত্যুৰ সন্তোষজনক ব্যাখ্যা প্ৰদান নকৰা বুলি উল্লেখ কৰে । তেওঁ চিকিৎসালয়ৰ কৰ্মচাৰীসকলৰ বিৰুদ্ধেও গুৰুতৰ অভিযোগ উত্থাপন কৰে যে তেওঁক বাৰে বাৰে কাগজ-পত্ৰৰে হাৰাশাস্তি কৰিছিল আৰু বহুবাৰ তেওঁক চিকিৎসালয়ৰ পৰা নিবলৈ হেঁচা প্ৰয়োগ কৰিছিল ।

সমগ্ৰ ঘটনাৰ ষড়যন্ত্ৰৰ সন্দেহ কৰি শোকসন্তপ্ত পিতৃয়ে উচ্চ পৰ্যায়ৰ তদন্তৰ দাবী জনাইছে । যেতিয়ালৈকে চিকিৎসালয় প্ৰশাসনে তেওঁলোকৰ উদ্বেগ আৰু বছৰ বছৰ ধৰি চলি থকা লেহেমীয়া নীতিৰ স্পষ্ট উত্তৰ নিদিয়ে তেতিয়ালৈকে ন্যায় দাবী কৰি পৰিয়ালটোৱে কন্যাৰ মৃতদেহ গ্ৰহণ কৰিবলৈ অস্বীকাৰ কৰিছে ।

এইমছ প্ৰশাসনৰ স্পষ্টীকৰণ

আনহাতে, এইমছৰ জ্যেষ্ঠ চিকিৎসকসকলে যুক্তি আগবঢ়ায় যে ২০১৮ চনৰ এটা পৰীক্ষাৰ সময়ত কিশোৰীগৰাকীৰ হাওঁফাওঁলৈ তেজ যোগান ধৰা মূল ৰক্তবাহী নলী (পালমনাৰী ধমনী) বিকশিত হোৱা নাছিল ।

ইয়াৰ পিছত ৰুটিন কাৰেকটিভ চাৰ্জাৰীক বিপদসংকুল বুলি গণ্য কৰা হৈছিল আৰু তেওঁক চিকিৎসকৰ তত্বাৱধানত ৰখা হৈছিল ।

কিন্তু দেশৰ সৰ্ববৃহৎ চৰকাৰী প্ৰতিষ্ঠানটোত এগৰাকী ৰোগীয়ে ১৩ বছৰ ধৰি চিকিৎসাৰ সন্ধানত হাবাথুৰি খাই অৱশেষত মৃত্যুবৰণ কৰাৰ এই ঘটনাই পুনৰবাৰ চৰকাৰী চিকিৎসা ব্যৱস্থাৰ কাম-কাজক লৈ গুৰুতৰ প্ৰশ্নৰ উত্থাপন কৰিছে ।