মাজুলী, 31 জুলাই: উজনি মাজুলীৰ জেংৰাইমুখ থানাৰ অন্তৰ্গত জাৱৰচুক কাঠনিত মঙলবাৰৰ সন্ধিয়া সংঘটিত হয় এক শোকাৱহ ঘটনা ৷ সন্ধিয়া প্রায় 6.30 বজাত মাছ মাৰিবলৈ গৈ হাত নাও ডুবি এগৰাকী বৃদ্ধা সন্ধানহীন হৈছে বুলি জানিব পৰা গৈছে । 

জানিব পৰা মতে, উজনি মাজুলীৰ জাৱৰচুক কাঠনিত মঙলবাৰৰ সন্ধিয়া হাত নাও লৈ চাৰিগৰাকী মহিলা মাছ মাৰিবলৈ বুলি গৈছিল আৰু তেতিয়াই ব্ৰহ্মপুত্ৰৰ সুঁতিত নাওখনত পানী সোমোৱাৰ ফলত ডুব যায় । ততাতৈয়াকৈ একাংশ প্ৰত্যক্ষদৰ্শীয়ে নাওখনত থকা তিনিগৰাকী মহিলাক উদ্ধাৰ কৰিবলৈ সক্ষম হয় যদিও তাৰ মাজৰে এগৰাকী মহিলা ব্ৰহ্মপুত্ৰৰ সুঁতিটোত সন্ধানহীন হৈ পৰে ।

সন্ধানহীন মহিলাগৰাকী 70 উৰ্ধৰ জেতুকী পেগু বুলি জানিব পৰা গৈছে ৷ ঘটনাস্থলীত এছ ডি আৰ এফৰ দল উপস্থিত হৈ মহিলাগৰাকীৰ সন্ধানত নদীত অভিযান চলায় যদিও আন্ধাৰ হোৱাৰ বাবে অভিযান সামৰিবলৈ বাধ্য হয় ।

বুধবাৰৰ পুৱাৰ পৰা পুনৰ এছ ডি আৰ এফৰ দলে মহিলাগৰাকীৰ সন্ধানত অভিযান আৰম্ভ কৰিছে ৷ এই ঘটনাৰ পিছত সন্ধানহীন মহিলাগৰাকীৰ ঘৰৰ লগতে অঞ্চলজুৰি এক শোকাকুল পৰিৱেশৰ সৃষ্টি হৈছে ।

লগতে পঢ়ক: অসমকে ধৰি দেশত সংঘটিত হৈছিল এইসমূহ শোকাৱহ তথা বহু চৰ্চিত নাও দুৰ্ঘটনা - Boat Capsize Incidents