গোলাঘাট, 20 মে’ : "অ’ মা আমি বজাৰৰ পৰা আহোগৈ ৷ দুটামান সৰু-সুৰা বস্তু লাগতিয়াল হৈ আছে, তাকেই লৈ আহোগৈ ৷" শাহুৱেকক ডাঙৰ বোৱাৰীয়েকে ক’লেহি এই কথা ৷ বোৱাৰীয়েক বজাৰলৈ যাব বুলি শুনি শাহুৱেকেও ঘৰৰ দুই-এপদ সামগ্ৰী আনিবলৈ দি সোনকালে ঘৰ সোমাবলৈ দিলে বোৱাৰীদ্বয়ক ৷ তাৰ পিচত কথামতেই হাতত এহাজাৰ টকা এটা লৈ দুই বোৱাৰীয়ে বাট বুলিলে মঙলবৰীয়া বজাৰলৈ ৷

এই ঘটনা হৈছে যোৱা 7 মে’ৰ ৷ গোলাঘাট জিলাৰ মেৰাপানী অঞ্চলৰ অন্তৰ্গত চাউদাং পথাৰ ৰূপালীচুকৰ দুগৰাকী বোৱাৰী মঙলবাৰে বজাৰলৈ যাঁও বুলি যোৱাৰ পিচত আৰু ঘৰলৈ উভতি নাহিল ৷ তাৰ পিচৰে পৰা বিগত 13 দিন ধৰি নিৰুদ্দেশ হৈ আছে দুয়োগৰাকী বোৱাৰী ৷ দুই বোৱাৰী সম্বন্ধত জা-জোৱালি ৷

ঘড়়ীৰ সময় চাইহে চাই কিন্তু ঘৰলৈ নাহিল দুই বোৱাৰী ৷ এনেকৈ পাৰ হ’ল 13 টা দিন ৷ দিন বাগৰি যোৱাৰ লগে লগে দুই বোৱাৰীৰ অপক্ষাত ঘৰৰ লোকৰ খাৱন-শোৱন নোহোৱা গৈছে ৷ দুয়োগৰাকী বোৱাৰীৰ চাৰি বছৰীয়া দুটাকৈ পুত্ৰ সন্তান আছে ৷

নিৰুদ্দেশ হোৱা বোৱাৰীদ্বয়ৰ পৰিয়ালৰ লোকে কোৱা অনুসৰি তেওঁলোকে দুপৰীয়া 12 বজাতে ঘৰ আহি পাম বুলি কৈ ওলাই গৈছিল ৷  অৱশেষত উপায়ন্তৰ হৈ মেৰাপানী আৰক্ষীৰ কাষ চাপিছে দুৰ্ভগীয়া পৰিয়ালটোৱে ৷ এই ঘটনা সম্পৰ্কে এখন লিখিত অভিযোগ দাখিল কৰিছে বোৱাৰী দুগৰাকীৰ পৰিয়ালৰ লোকে । বৰ্তমানলৈকে আৰক্ষীয়েও বিচাৰ খোচাৰ কৰিছে যদিও কোনোধৰণৰ শুংসূত্ৰ পাবলৈ সক্ষম হোৱা নাই বোৱাৰীদ্বয়ৰ ।

এতিয়া প্ৰশ্ন হয় যে, মেৰাপানী অঞ্চলত বিগত দিনটো এনে ঘটনা সংঘটিত হৈ অহাৰ পিচত কিয় নিৰ্বিকাৰ ভূমিকা পালন কৰিছে আৰক্ষীয়ে ৷ প্ৰকৃততে বোৱাৰী দুগৰাকী ক’লৈ গ’ল ?

লগতে পঢ়ক: Facebook-ত পুলিচৰ সৈতে চিনাকি হৈ ক’ত গ’ল দুই সন্তানৰ মাতৃ জানমণি ?