বৰপেটাৰোড,৩০ মাৰ্চ: বৰপেটাৰোডৰ সমীপৰ বালাৰভিঠাৰ ২৭ নম্বৰ ৰাষ্ট্ৰীয় ঘাইপথৰ জামতলত শনিবাৰে দুপৰীয়াৰ ভাগত সংঘটিত হয় এক ভয়ংকৰ পথ দুৰ্ঘটনা । পথ দুৰ্ঘটনাটোত থিতাতে নিহত একেটা পৰিয়ালৰে তিনিটিকৈ কিশোৰ-কিশোৰী । পথ দুৰ্ঘটনাত মৃত্যু হোৱা তিনিগৰাকী কিশোৰ-কিশোৰী ক্ৰমে শ্বাহজাহান আলী আচমা খাতুন আৰু জেছমিন পাৰবীন বুলি জানিব পৰা গৈছে । এই শোকাৱহ ঘটনাই সমগ্ৰ বৰপেটাৰোড অঞ্চলত গভীৰ শোকৰ ছাঁ পেলাইছে ৷  

উল্লেখ্য যে, বৰপেটাৰোডৰ সাতভইনীটুপৰ ৰিজাৰ্ভৰ এই পৰিয়ালটোৱে বিগত তিনিদিন পূৰ্বে ক্ৰয় কৰিছিল এখন স্কুটী । শনিবাৰে সেই স্কুটীৰে পৰিয়ালটোৰ চাৰিগৰাকী কিশোৰ-কিশোৰীয়ে ৰাষ্ট্ৰীয় ঘাইপথৰ কাষতে থকা পেহীয়েকৰ ঘৰলৈ ফুৰিবলৈ গৈ আছিল । সেইসময়তে পিছফালৰ পৰা অহা তীব্ৰবেগী এখন ট্ৰাকে মহতিয়াই নিয়ে স্কুটীখন । ফলত ঘটনাস্থলীতেই নিহত হয় তিনিগৰাকীকৈ কিশোৰ-কিশোৰী । আনহাতে দুৰ্ঘটনাটোত গুৰুতৰভাৱে আহত আন এগৰাকী কিশোৰক ততাতৈয়াকৈ প্ৰেৰণ কৰা হয় চিকিৎসালয়লৈ । 

লগতে পঢ়ক: তিনিচুকীয়াত সুৰাপায়ী চালকৰ তাণ্ডৱ - Road Accident In Tinsukia