গোলাঘাট, 2 মাৰ্চ: গোলাঘাট জিলাৰ বিভিন্ন প্ৰান্তত দিনক দিনে বৃদ্ধি পাবলৈ ধৰিছে চুৰিকাণ্ডৰ ঘটনা । বাসগৃহত কোনো নথকাৰ সুযোগ লৈ চুৰিকাণ্ডৰ ঘটনাৰ লগতে বিভিন্ন অপৰাধমূলক ঘটনা সংঘটিত হৈ আহিছে যদিও বৰ্তমানলৈকে অপৰাধীক নাকী লগাবলৈ আৰক্ষীয়ে কোনোধৰণৰ বাস্তৱ প্ৰদক্ষেপ গ্ৰহণ কৰা পৰিলক্ষিত নহ'ল ।  

পৰিণতিত এইবাৰ চোৰে লক্ষ্য কৰি লৈছে চিকিৎসকৰ বাসগৃহ । গোলাঘাট জিলাৰ দেৰগাঁও আৰক্ষী থানাৰ অন্তৰ্গত বনগাঁৱৰ এজন চিকিৎসকৰ ঘৰত কোনো নথকাৰ সুযোগ লৈ চলালে চাফাই অভিযান চলালে চোৰে । চিকিৎসকৰ ঘৰৰ পৰা চোৰে লুটি নিলে প্ৰায় ১৫ লাখ টকাৰ সা-সামগ্ৰী ৷ বনগাঁৱৰ হেমন্ত বৰা নামৰ চিকিৎসকগৰাকীৰ ঘৰত মানুহ নথকাৰ সুযোগ লৈ খিৰিকীৰ গ্ৰীল ভাঙি ভিতৰত প্ৰবেশ কৰি চোৰে চলালে চাফাই অভিযান ।

নিশা বোকাখাত চিকিৎসালয়ত কৰ্তব্য সমাপন কৰি আহি ঘৰৰ ভিতৰত সকলো সামগ্ৰী লণ্ডভণ্ড হৈ থকা দেখাৰ পিচতে সমগ্ৰ চুৰিকাণ্ডৰ ঘটনা পোহৰলৈ আহে । ইতিমধ্যে ভুক্তভোগী চিকিৎসক হেমন্ত বৰাই দেৰগাঁও আৰক্ষী থানাত ঘটনা সন্দৰ্ভত গোচৰ দাখিল কৰিছে ৷ চিকিৎসক হেমন্ত বৰাই সাংবাদিকক জনাবলৈ দিয়া মতে তেওঁ এতিয়া নিৰাপত্তাহীনতাত ভুগিছে । কাৰণ তেওঁ এজন চৰকাৰী চিকিৎসক ।

উল্লেখ্য যে কিছুদিনৰ ভিতৰতে বৃহত্তৰ অঞ্চলটোত কেবাটাও চুৰিকাণ্ডৰ ঘটনা সংঘটিত হৈ আহিছে ৷ কিন্তু তাৰ পিচতো দেৰগাঁও আৰক্ষীয়ে চোৰক গ্ৰেপ্তাৰ কৰিব সক্ষম হোৱা নাই ।

লগতে পঢ়ক: সন্ধিয়া সৰুপথাৰৰ ৰাজপথত জ্বলিল মনোজ কুমাৰ গোস্বামীৰ পুত্তলিকা