বৰপেটা: বৰপেটাত অভিলাসী আঁচনিৰে নিৰ্মাণ হৈছে ৰামৰায় ষ্টেডিয়াম । শনিবাৰে নিৰ্মীয়মাণ অৱস্থাত থকা ৰামৰায় ষ্টেডিয়ামৰ কাম-কাজৰ অগ্ৰগতিৰ বুজ লয় অসম চৰকাৰৰ ক্ৰীড়া আৰু যুৱ কল্যাণ বিভাগৰ মন্ত্ৰী নন্দিতা গাৰ্লোচাই । বিগত প্ৰায় ৩৭ বছৰৰো অধিককাল ধৰি নিৰ্মাণৰত অৱস্থাত থকা ষ্টেডিয়ামখনৰ বাবে ৰাজ্যৰ ক্ৰীড়া নীতিৰ অধীনত শেহতীয়াভাৱে অসম চৰকাৰে ১১ কোটি টকা আৱণ্টন দিছিল । সম্প্রতি নিৰ্মাণ কাৰ্য দ্ৰুতগতিত অব্যাহত থকা ষ্টেডিয়ামখনৰ কাম-কাজ পৰিদৰ্শন কৰি মন্ত্ৰীগৰাকীয়ে সন্তোষ প্ৰকাশ কৰে ।

মন্ত্ৰীগৰাকীয়ে অহা ফেব্ৰুৱাৰী মাহৰ ষ্টেডিয়ামৰ প্ৰেক্ষাগৃহটো সম্পূৰ্ণ হৈ উঠিব বুলি আশা প্ৰকাশ কৰে । তেওঁ খেল মহাৰণে ৰাজ্যত খেলৰ উৎসাহজনক পৰিৱেশ সৃষ্টি কৰিছে বুলিও মন্তব্য কৰে । আনহাতে বৰপেটা জিলাত খেল মহাৰণ যথেষ্ট সফলভাৱে অনুষ্ঠিত হৈছে বুলিও তেওঁ প্ৰকাশ কৰে । ষ্টেডিয়ামখন সম্পূৰ্ণ হৈ উঠিলে বৰপেটাৰ ক্ৰীড়াৰ ক্ষেত্ৰখন আগবাঢ়ি যোৱাত যথেষ্ট সহায়ক হ'ব বুলি মন্ত্ৰীগৰাকীয়ে মত প্ৰকাশ কৰে ।

লগতে পঢ়ক: ৰাষ্ট্ৰীয় পৰ্যায়ৰ ভলীবল প্ৰতিযোগিতাত দেশৰ কেইবাখনো ৰাজ্যৰ অংশগ্ৰহণ - VOLLEYBALL TOURNAMENT IN TINSUKIA