মৰাণ, ২৮ ফেব্ৰুৱাৰীঃ অসম চৰকাৰে ৰাজ্যৰ একাংশ মহাবিদ্যালয় একত্ৰীকৰণ ঘোষণাৰে তালিকা প্ৰকাশ কৰা পাছতে তীব্ৰ প্ৰতিক্ৰিয়াৰ সৃষ্টি হৈছে শৈক্ষিক মহলত ৷ ডিব্ৰুগড় জিলাৰ বৃহত্তৰ খোৱাং অঞ্চলৰ একমাত্ৰ স্ত্ৰী শিক্ষাৰ অনুষ্ঠান পিথুবৰ ছোৱালী স্নাতক মহাবিদ্যালয়ৰ নামো এই তালিকাত স্থান পোৱাত আশ্বৰ্য প্ৰকাশ কৰিছে মহাবিদ্যালয় কৰ্তৃপক্ষ, শিক্ষক-কৰ্মচাৰী, ছাত্ৰী সকলৰ লগতে অঞ্চলটোৰ সচেতন ৰাইজে ৷  

১৯৮৯ চনত খোৱাং অঞ্চলৰ একাংশ শিক্ষানুৰাগী লোকৰ বহু ত্যাগ আৰু প্ৰচেষ্টাৰ বলত স্থাপিত হোৱা মহাবিদ্যালয়খন বৰ্তমান অঞ্চলটোৰ এখন আগশাৰীৰ শিক্ষানুষ্ঠান । ২০১৩ বৰ্ষত মহাবিদ্যালয়খনৰ একাংশ শিক্ষক-কৰ্মচাৰীৰ পদ প্ৰাদেশিকীকৰণ হয় যদিও বাকীসকলে এতিয়াও বিনা বেতনেৰে সেৱা আগবঢ়াই আহিছে । ২৬৯ গৰাকী ছাত্ৰীয়ে অধ্যয়ন কৰি থকা মহাবিদ্যালয়খন একত্ৰীকৰণৰ খবৰে খোৱাং অঞ্চলত তীব্ৰ প্ৰতিক্ৰিয়া সৃষ্টি কৰিছে ৷  

গ্ৰামাঞ্চলৰ বহু দৰিদ্ৰ পৰিয়ালৰ ছাত্ৰীয়ে অধ্যয়ন কৰি থকা এই মহাবিদ্যালয়খনৰ আশে-পাশে কোনো মহাবিদ্যালয় নাই ৷ তেনেস্থলত শৈক্ষিক প্ৰতিষ্ঠানখন একত্ৰীকৰণৰে ছাত্ৰীসকলৰ লগতে শিক্ষক-কৰ্মচাৰীসকলৰ ভৱিষ্যত অন্ধকাৰলৈ ঠেলি নিদিবলৈ চৰকাৰক অনুৰোধ জনাইছে মহাবিদ্যালয় কৰ্তৃপক্ষ, ছাত্ৰী একতা সভা আৰু সচেতন ৰাইজে ৷

লগতে পঢ়ক:একত্ৰীকৰণৰ নামত বিদ্যালয়ৰ পাচত মহাবিদ্যালয় বন্ধ কৰিবলৈ দিয়া নহ’ব : কৃষক মুক্তি সংগ্ৰাম সমিতি