শিলচৰ, 23 এপ্ৰিল : শিলচৰত আজি এক বিশাল ৰোড শ্ব'ত ভাগ লয় লোকসভাৰ বিৰোধী উপ-দলপতি গৌৰৱ গগৈয়ে ৷ আজি দুপৰীয়া গুৱাহাটীৰ পৰা বিমানযোগে শিলচৰ বিমানবন্দৰত উপস্থিত হৈ শিলচৰত এই  ৰোড শ্ব'ত অংশগ্ৰহণ কৰে কংগ্ৰেছ নেতাগৰাকীয়ে । শিলচৰৰ কংগ্ৰেছ প্ৰাৰ্থী সূৰ্য্যকান্ত সৰকাৰৰ হৈ প্ৰচাৰ চলায় গৌৰৱ গগৈয়ে । শিলচৰ জিলা কংগ্ৰেছ কাৰ্য্যালয়ৰ পৰা কংগ্ৰেছৰ এই বিশাল ৰোড শ্ব' আৰম্ভ হৈ চহৰৰ বিভিন্ন পথ পৰিক্ৰমা কৰি ৰাঙিৰখাৰি পইন্টত সমাপ্ত হয় । প্ৰায় দুই কিলোমিটাৰজোৰা গৌৰৱ গগৈৰ এই বিশাল এই ৰোড শ্ব'ক কেন্দ্ৰ কৰি জনসমুদ্ৰত পৰিণত হয় সমগ্ৰ শিলচৰ চহৰ । 

ৰোড শ্ব’টোৰ সময়ত গৌৰৱ গগৈক উদ্দেশ্যি পথৰ দুয়োকাষে থিয় হৈ থকা লোকসকলে ফুল ছটিওৱা দেখা যায় । পিচত সংবাদমাধ্যমক গৌৰৱ গগৈয়ে কয় যে, তৃণমূল কংগ্ৰেছে অসমত সময় নষ্ট কৰি আছে । পশ্চিম বংগত সময় দিব লাগে তৃণমূল কংগ্ৰেছে । প্ৰথম পৰ্যায়ৰ নিৰ্বাচনক লৈ তেওঁ কয় যে, বিজেপিয়ে 5 খন আসন দাবী কৰি আছে যদিও ৰাইজৰ আশীৰ্বাদ বিৰোধীৰ লগত আছে । ৰাইজে এতিয়া বিজেপিৰ সাম্প্ৰদায়িক ৰাজনীতি বুজি পাইছে বুলি মন্তব্য কৰি গৌৰৱ গগৈয়ে কয় যে দিনে দিনে বিৰোধীৰ আসন বৃদ্ধি পাইছে । বৰাকত কংগ্ৰেছৰ স্থিতি বহুত ভাল বুলিও তেওঁ দাবী কৰে ।

লগতে পঢ়ক : হিমন্ত বিশ্ব শৰ্মা অসমৰ আটাইতকৈ ভ্ৰষ্টাচাৰী ব্যক্তি : অখিল গগৈ - LOK SABHA ELECTION 2024