মিৰ্জা, ১৮ আগষ্ট : এইবাৰ দক্ষিণ কামৰূপৰ ছয়গাঁৱত চিমেণ্ট কাৰখানা স্থাপনৰ বিৰুদ্ধে ৰাইজে জনালে প্ৰতিবাদ । কোনো কাৰণতেই চিমেণ্ট কাৰখানা হ'বলৈ নিদিয়াৰ হুংকাৰ স্থানীয় ৰাইজৰ । দেওবাৰে দক্ষিণ কামৰূপৰ ছয়গাঁৱত চিমেণ্ট কাৰখানা স্থাপনৰ বিৰুদ্ধে ৰাইজে আয়োজন কৰিলে প্ৰতিবাদী সভা আৰু ধৰ্ণা কাৰ্যসূচী ৷ চৌধুৰীখাত, কাৱৈমাৰী, দক্ষিণ বাংকাকাটা, বেলগুৰি, ধোৱাৰগাঁও, লাট ভূমি সংৰক্ষণ সমিতিৰ উদ্যোগত ছয়গাঁও পান্টান সাততালুক পৰগণা সভাগৃহত বিশাল ৰাজহুৱা সভা অনুষ্ঠিত হয় ।

উক্ত সভাতেই অঞ্চলটোৰ ৫২ খন ৰাজহ গাঁৱৰ পুৰুষ মহিলাই চিমেণ্ট কাৰখানা স্থাপনৰ বিৰোধিতা কৰে । কৃষিপ্ৰধান অঞ্চলত কোনো কাৰণতে চিমেণ্ট উদ্যোগ স্থাপন কৰিবলৈ নিদিয়াৰ হুংকাৰ দিয়ে স্থানীয় ৰাইজে । ৰাজপথ বন্ধ কৰি তেজ দি হ'লেও চিমেণ্ট কাৰখানা স্থাপনত বাধা প্ৰদান কৰিব প্ৰতিবাদী জনতাই । চিমেণ্ট কাৰখানাৰ বাবে বহিৰাগত বনিয়াক ভূমি হস্তান্তৰ কৰা স্থানীয় মাটিৰ দালালসকলক সকীয়াই দিয়ে ৰাইজে । প্ৰতিবাদী সভাত ছয়গাঁও ছাত্ৰ সন্থা, ৰাভা ছাত্ৰ সন্থা, প্ৰদূষণ নিয়ন্ত্ৰণ ব'ৰ্ডৰ বিষয়া, বহুতো দল সংগঠনকে ধৰি অঞ্চলটোৰ বহু সংখ্যক ব্যক্তি উপস্থিত থাকে ।

লগতে পঢ়ক:8 আৰু 9 নৱেম্বৰত অনুষ্ঠিত হ’ব জাতিংগা মহোৎসৱ: ঘোষণা দেৱলাল গাৰ্লোচাৰ - Jatinga Festival 2024