বিশ্বনাথ, 12 ফেব্ৰুৱাৰী: বিশ্বনাথ চাৰিআলিৰ শান্তিপুৰত দেওবাৰৰ নিশা সংঘটিত হয় এক চাঞ্চল্যকৰ ঘটনা ৷ নিজ কোঠাৰ ভিতৰতে অগ্নিদগ্ধ হৈ মৃত্যু হ'ল এগৰাকী এশ বছৰীয়া বৃদ্ধাৰ ৷ শান্তিপুৰৰ 5 নং ৱাৰ্ডত সংঘটিত হৈছে এই ঘটনা ৷ ঘটনাস্থলীত আৰক্ষী উপস্থিত হৈ ঘটনাৰ তদন্ত আৰম্ভ কৰিছে ৷ 

পৰিয়ালৰ লোকে জানিবলৈ দিয়া মতে কোঠাৰ ভিতৰত হঠাতে ধোঁৱা দেখিবলৈ পোৱাত পৰিয়ালৰ লোকৰ মাজত হৈ চৈ লাগে ৷ কোঠাৰ ভিতৰলৈ সোমাই গৈ বৃদ্ধাগৰাকীক অগ্নিদগ্ধ অৱস্থাত প্ৰত্যক্ষ কৰে পৰিয়ালে । পানী আনি জুই নিৰ্বাপনৰ চেষ্টা কৰা হয় যদিও ইতিমধ্যে বৃদ্ধাগৰাকীৰ মৃত্যু ঘটিছিল বুলি পৰিয়ালৰ লোকে জানিবলৈ দিয়ে ৷ 

পৰিয়ালৰ লোকে জানিবলৈ দিয়া মতে, বৃদ্ধাগৰাকীয়ে মাজে-সময়ে ভ্ৰম বকে । কোঠাৰ ভিতৰত অকলশৰীয়া অৱস্থাত থকা বৃদ্ধাগৰাকী জ্বলি যোৱা ঘটনাটোত আৰক্ষীয়ে ৰহস্যৰ গোন্ধ পাইছে ৷ ঘটনা সংঘটিত হোৱা কোঠাটো আৰক্ষীয়ে দণ্ডাধীশৰ উপস্থিতিত ছীল কৰিছে  ৷ আৰক্ষীৰ তদন্তৰ পিচতহে এইয়া হত্যা নে দুৰ্ঘটনা স্পষ্ট হ'ব ।

লগতে পঢ়ক: বহিঃৰাজ্যত ৰহস্যজনক মৃত্যু অসমৰ যুৱতীৰ