দৰং, ২ মাৰ্চ: দৰং-ওদালগুৰি লোকসভা সমষ্টিত বিজেপিয়ে আজি সাংসদ দিলীপ শইকীয়াক প্ৰাৰ্থিত্ব প্ৰদান কৰাৰ লগে লগে দলৰ দৰং জিলাৰ মঙলদৈ কাৰ্যালয়ত আনন্দৰ পৰিবেশৰ সৃষ্টি হয় । জিলাখনৰ মঙলদৈ, ছিপাঝাৰ আৰু দলগাঁও সমষ্টিৰ দলীয় কৰ্মকৰ্তাসকলে ফটকা ফুটাই, নাচি-বাগি আনন্দ প্ৰকাশ কৰে । দুই শতাধিক দলীয় বিষয়ববীয়া ,কৰ্মকৰ্তাৰ উপস্থিতিত সাংসদ দিলীপ শইকীয়াই পুনৰ প্ৰাৰ্থিত্ব লাভ কৰি দৰং -ওদালগুৰি তথা অসমৰ ৰাইজৰ সেৱা কৰি যাব বুলি কয় ।  

সাংসদ দিলীপ শইকীয়াই পুনৰ কয়," প্ৰধানমন্ত্ৰী নৰেন্দ্ৰ মোদী আৰু মুখ্যমন্ত্ৰী ড৹ হিমন্ত বিশ্ব শৰ্মাৰ নেতৃত্বত আজি উন্নয়নৰ ধাৰা বৈছে । এই ধাৰা অব্যাহত ৰাখি আমি দেশৰ হৈ জাতিৰ হৈ কাম কৰিম । " তেওঁ মঙলদৈ চহৰৰ সোমাজেৰে যোৱা ১৫ নং ৰাষ্ট্ৰীয় ঘাইপথৰ বাইপাছৰ কাম দ্ৰুতগতিত হৈ থকা প্ৰসংগ উত্থাপন কৰি দৰং ওদালগুৰি জিলাৰ শেহতীয়া উন্নয়নৰ বিভিন্ন দিশ উল্লেখ কৰে । সাংসদগৰাকীয়ে আগন্তুক নিৰ্বাচনত সকলো শ্ৰেণীৰ ৰাইজৰ সহযোগিতা কামনা কৰে ।

জিলা কাৰ্যালয়ত দৰং জিলা বিজেপিৰ সভাপতি অমৰেন্দ শৰ্মা , দৰং জিলা অগপৰ সাধাৰণ সম্পাদক স্বৰাজ ডেকা, জিলা বিজেপিৰ উপ সভাপতি মকুন্দ ডেকা, শেৱালি গোস্বামী কলিতা , অ'বিচি মৰ্চা দৰঙৰ সভাপতি নৃফন নাথ , মহিলা মৰ্চাৰ সভানেত্ৰী ৰূপালী দেবী, অনুসুচীত জাতি মৰ্চাৰ সভানেত্ৰী গিতীমা দাস আদি উপস্থিত থাকে ।

লগতে পঢ়ক:জিলা আয়ুক্তৰ কাৰ্যালয়ত ধোৱাচাঙত কৰ্ম-সংস্কৃতি