তিনিচুকীয়া, ২০ ফেব্ৰুৱাৰী: তিনিচুকীয়া জিলাৰ ডুমডুমাত সোমবাৰে নিশা গৰু সৰবৰাহ কৰা ট্ৰাকৰ পৰা বজৰং দলৰ নামত ধন লুট কৰাৰ অভিযোগ উত্থাপিত হৈছে ৷ অৰুণাচল প্ৰদেশৰ পৰা অহা এখন গৰুভৰ্তি ট্ৰাক ডুমডুমাৰ হাঁহচৰাত ৰখাই চালকক মাৰপিট কৰাৰ লগতে দলটোৱে নগদ ধনৰ লগতে ম'বাইল লৈ উধাও হয় বুলি অভিযোগ কৰিছে ট্ৰাকৰ চালকে ৷ মদ্যপান কৰি থকা যুৱকৰ দলটোৱে চালকৰ পৰা নগদ ৮১ হাজাৰ টকাৰ লগতে দুটা ম'বাইল লৈ উধাও হয় ৷

ইয়াৰ পিচতেই ডুমডুমা আৰক্ষী কাষত উপস্থিত হয় ট্ৰাক দুখনৰ চালক দুজন ৷ দুৰ্বৃত্তৰ দলটোৱে বজৰং দলৰ সদস্য বুলি চিনাকি দিয়াৰ অভিযোগ কৰিছে ট্ৰাক চালকে ৷ পৰৱৰ্তী সময়ত সাংবাদিক উপস্থিত হোৱাত ঘটনাস্থলীৰ পৰা পলায়ন কৰে বজৰং দল বুলি চিনাকি দিয়া দুৰ্বৃত্তৰ দলটোৱে ৷ ইফালে, ট্ৰাকখনত গৰু সৰবৰাহ কৰা 'কেটেল পাৰ্মিট' নথকাৰ কথা স্বীকাৰ কৰে ট্ৰাকৰ চালকে ৷  

উল্লেখ্য় যে প্ৰতি নিশাই তিনিচুকীয়া জিলাৰ মাজেৰে সৰবৰাহ হয় কেটেল পাৰ্মিট অবিহনেই ইখনৰ পাছত সিখন গৰুভৰ্তি ট্ৰাক ৷ আৰক্ষীয়ে এনে বেহাৰ বিৰুদ্ধে ব্যৱস্থা লোৱাৰ পৰিৱৰ্তে একাংশ দুষ্টচক্ৰই ধন সংগ্ৰহৰ সুবিধা লৈ আহিছে ৷ আনহাতে, ট্ৰাকত গৰুৰ ভিডিঅ' সংগ্ৰহ কৰোতে গৰুৰ আক্ৰমণত আহত হয় বৈদ্যুতিন মাধ্যমৰ এজন সাংবাদিক ৷

লগতে পঢ়ক:অথলে গৈছে গো-ব্যৱসায়ক লৈ চৰকাৰী নিৰ্দেশনা