ডিব্ৰুগড়, 7 এপ্ৰিল : লোকসভা নিৰ্বাচনৰ পিচতেই ৰাইজৰ দল আৰু অসম জাতীয় পৰিষদ একত্ৰিত হৈ নতুন দল গঠন কৰিব বুলি অখিল গগৈয়ে কৰা ঘোষণাক কটাক্ষ মন্ত্ৰী জয়ন্ত মল্লবৰুৱাৰ ৷ "যাৰ ভবিষ্যত নাই সি যি-টি ঘোষণা কৰিব পাৰে" বুলি বিধায়ক অখিল গগৈ আৰু ডিব্ৰুগড় লোকসভা সমষ্টিৰ বিৰোধী ঐক্যৰ প্ৰাৰ্থী লুৰীণজ্যোতি গগৈক কটাক্ষ মন্ত্ৰীগৰাকীৰ ৷ 

তেওঁ কয় যে, যাৰ কোনো ভৱিষ্যতেই নাই, জিকাৰ কোনো কথাই আহিব নোৱাৰে তেওঁলোকে কোৱাত একো অসুবিধা নাই ৷ তেওঁলোকে নিজেই জানে যে, জিকিবৰ কাৰণে তেওঁলোকে নিৰ্বাচন খেলা নাই ৷ সেইবাবে তেওঁলোকে যি-টি ক’ব পাৰে, তাত কোনো অসুবিধা নাই বুলি মন্তব্য কৰে মন্ত্ৰী জয়ন্ত মল্লবৰুৱাই ৷

ইফালে ডিব্ৰুগড় লোকসভা সমষ্টিত বিজেপি দলৰ প্ৰতিদ্বন্দ্বিতাই নাই বুলি মন্তব্য কৰে মন্ত্ৰী বৰুৱাই ৷ লগতে সমষ্টিটোত বিজেপি প্ৰাৰ্থীগৰাকী যি বিশাল ভোটৰ ব্যৱধানত জয়ী হ’ব তাক প্ৰতিদ্বন্দ্বিতা নকয়, তাক একচেটীয়া বিজয় কয় বুলিও উল্লেখ কৰে মন্ত্ৰীগৰাকীয়ে ৷ আনহাতে কংগ্ৰেছৰ লগত থাকি জাতীয়তাবাদৰ কোনো মূল্য নাই বুলি কয় মন্ত্ৰী বৰুৱাই ৷ 

তেওঁ কয় যে, জাতিটোৰ জাতীয়তাবাদৰ ওপৰত প্ৰচণ্ড আক্ৰমণ কৰিছিল কংগ্ৰেছ দলে ৷ 855 জন শ্বহীদ কৰা কংগ্ৰেছ দলৰ লগত থাকি কোনোবাই জাতীয়তাবাদৰ কথা ক’ব, সেই জাতীয়তাবাদক কোনো স্বীকৃতি দিব ৷ তেনেকুৱা ভুৱা জাতীয়তাবাদী অসমৰ ৰাইজে চিনি পাই আৰু এইবাৰৰ নিবাৰ্চনৰ পিচতেই ৰাইজে চিনি পাব ভুৱা জাতীয়তাবাদৰ স্থিতি কি বুলি মন্তব্য কৰে মন্ত্ৰী জয়ন্ত মল্লবৰুৱাই ৷

লগতে পঢ়ক : মুখ্যমন্ত্ৰীৰ এটাই চিন্তা ৰাজ্যৰ পৰৱৰ্তী মুখ্যমন্ত্ৰী কোন হ’ব : ভূপেন বৰা - Lok Sabha Election 2024